മരപ്പൊടിയെന്ന വ്യാജേന ചാക്കുകളിലാക്കി കോഴി ഫാമില് 60 കിലോ കഞ്ചാവ് സൂക്ഷിച്ച കേസ്...എലി കരണ്ടപ്പോള് കഞ്ചാവ് പുറത്ത്, ചാക്കുകള് എലി വെട്ടി അകത്തുള്ള കഞ്ചാവ് പുറത്തുവീണു, താന് ചതിക്കപ്പെടുകയായിരുന്നുവെന്ന് തിരിച്ചറിഞ്ഞ ഫാം ഉടമ എക്സൈസിന് രഹസ്യവിവരം നല്കി,തന്നെ വിചാരണ കൂടാതെ കുറ്റവിമുക്തനാക്കണമെന്ന രണ്ടാം പ്രതിയുടെ വിടുതല് ഹര്ജി കോടതി തള്ളി, പ്രതികളെ കൃത്യവുമായി ബന്ധിപ്പിക്കുന്ന പ്രഥമദൃഷ്ട്യാ തെളിവുകള് ഉണ്ടെന്ന് കോടതി
വെഞ്ഞാറമൂട് മണലിമുക്കില് മരപ്പൊടിയെന്ന വ്യാജേന ചാക്കുകളിലാക്കി കോഴി ഫാമില് സൂക്ഷിച്ചിരുന്ന 60 കിലോ കഞ്ചാവ് എക്സൈസ് എന്ഫോഴ്സ്മെന്റ് പിടിച്ചെടുത്ത കേസില് തന്നെ വിചാരണ കൂടാതെ കുറ്റ വിമുക്തനാക്കണമെന്നാവശ്യപ്പെട്ടുള്ള ഫാം ഉടമയുടെ ബന്ധുവായ രണ്ടാം പ്രതിയുടെ വിടുതല് ഹര്ജി തലസ്ഥാന വിചാരണ കോടതി തള്ളി ഉത്തരവായി. തിരുവനന്തപുരം നാലാം അഡീ. ജില്ലാ സെഷന്സ് കോടതി ജഡ്ജി ശ്രീമതി ആജ് സുദര്ശന്റേതാണുത്തരവ്.
തനിക്കെതിരായ എക്സൈസ് കുറ്റപത്രം അടിസ്ഥാന രഹിതമാകയാല് തന്നെ വിചാരണ കൂടാതെ വിട്ടയക്കണമെന്നായിരുന്നു വിടുതല് ഹര്ജിയിലെ പ്രതിയുടെ ആവശ്യം. അതേ സമയം കേസ് റെക്കോര്ഡുകള് പരിശോധിച്ചതില് പ്രതികളെ കൃത്യവുമായി ബന്ധിപ്പിക്കുന്ന പ്രഥമദൃഷ്ട്യാ തെളിവുകള് ഉണ്ടെന്ന് നിരീക്ഷിച്ചാണ് കോടതിയുത്തരവ്.
മൂന്നു പ്രതികളും വിചാരണ നേരിടണമെന്നും കോടതി ഉത്തരവിട്ടു. 2021 ഒക്ടോബര് 24 മുതല് റിമാന്റില് കഴിയുന്ന ഫാം ഉടമയുടെ ബന്ധുവായ ഒന്നാം പ്രതിയുടെ ജാമ്യഹര്ജിയും കോടതി തള്ളി. ഒന്നാം പ്രതി കസ്റ്റോഡിയല് വിചാരണ നേരിടാനും കോടതി ഉത്തരവിട്ടു. ഒന്നാം പ്രതി നെടുമങ്ങാട് അഴിക്കോട് കരിമരക്കോട് സ്വദേശി അക്ബര്ഷാ എന്ന ഷാന് (29) ആണ് കസ്റ്റോഡിയല് വിചാരണ നേരിടേണ്ടത്. കൂട്ടു പ്രതികളായ രണ്ടാം പ്രതി യദുകൃഷ്ണന് , മൂന്നാം പ്രതി മുഹമ്മദ് യുനൈസ് എന്നിവര് ജാമ്യത്തിലാണ്.
വെഞ്ഞാറമൂടിനു സമീപം മണലിമുക്കില് പ്രവര്ത്തിക്കുന്ന കോഴി ഫാമിലാണ് മൂന്ന് ചാക്കുകളില് 26 പൊതികളിലായി കഞ്ചാവ് സൂക്ഷിച്ചിരുന്നത്. ഫാമിന്റെ ഉടമയുടെ അകന്ന ബന്ധു അക്ബര് ഷായാണ് ആദ്യം അറസ്റ്റിലായത്. മരപ്പൊടിയാണെന്നു ഉടമയെ തെറ്റിദ്ധരിപ്പിച്ച് ഇയാള് ചാക്കുകെട്ടുകള് കൊണ്ടു വയ്ക്കുകയായിരുന്നുവെന്ന് എക്സൈസ് കുറ്റപത്രത്തില് പറയുന്നു.
കൃത്യം എക്സൈസ് കണ്ടു പിടിക്കുന്നതിന് മൂന്നു ദിവസം മുന്പ് അക്ബര്ഷാ മൂന്നു ചാക്കുകളുമായി എത്തി മരപ്പൊടിയാണെന്നും 8 ചാക്കുകള് കൂടി എത്താനുണ്ടെന്നും എല്ലാം കൂടി ഒരുമിച്ചു കൊണ്ടു പോകാമെന്നും പറഞ്ഞു വിശ്വസിപ്പിച്ച് ബന്ധുവിന്റെ കോഴി ഫാമില് വയ്ക്കുകയായിരുന്നു. രണ്ട് ദിവസം കഴിഞ്ഞപ്പോള് ചാക്കുകള് എലി വെട്ടി അകത്തുള്ള കഞ്ചാവ് പുറത്തുവീണു.
താന് ചതിക്കപ്പെടുകയായിരുന്നുവെന്ന് തിരിച്ചറിഞ്ഞ ഫാം ഉടമ എക്സൈസ് ഉന്നതാധികാരികളെ രഹസ്യമായി വിവരമറിയിക്കുകയായിരുന്നു. എക്സൈസ് സംഘം സ്ഥലത്തെത്തി പരിശോധന നടത്തി ചാക്കില് കഞ്ചാവാണന്നു സ്ഥിരീകരിച്ചതിനു ശേഷം അക്ബര്ഷായെ നെടുമങ്ങാട് വീട്ടില് നിന്ന് അറസ്റ്റു ചെയ്തു. എക്സൈസ് എന്ഫോഴ്സ്മെന്റ് സ്ക്വാഡ് സിഐ അനില്കുമാറിന്റെ നേതൃത്വത്തിലുള്ള സംഘമാണ് അറസ്റ്റിന് നേതൃത്വം നല്കിയത്.
അന്വേഷണത്തില് മറ്റു പ്രതികളുടെ പങ്കും പങ്കാളിത്തവും കണ്ടെത്തിയതിനാല് അവരെ കൂടി പ്രതിസ്ഥാനത്ത് ചേര്ത്ത് കുറ്റപത്രം സമര്പ്പിക്കുകയായിരുന്നു.
https://www.facebook.com/Malayalivartha
