സെന്‍ട്രല്‍ ബാങ്ക് മാനേജരും ആധാരമെഴുത്തുകാരുമടക്കം 13 പേര്‍ പ്രതികളായ ആറു കോടി രൂപയുടെ സെന്‍ട്രല്‍ ബാങ്ക് വായ്പാ തട്ടിപ്പ് കേസില്‍ ഒന്നാം പ്രതി സെന്‍ട്രല്‍ ബാങ്ക് ഓഫ് ഇന്ത്യയുടെ ആലപ്പുഴ ചെങ്ങന്നൂര്‍ ബ്രാഞ്ചിലെ സീനിയര്‍ മാനേജര്‍ എന്‍. ഗണേശന് ജാമ്യമില്ലാ അറസ്റ്റ് വാറണ്ടും ജപ്തി വാറണ്ടും കോടതി പുറപ്പെടുവിച്ചു.


തിരുവനന്തപുരം സിബിഐ കോടതിയുടേതാണുത്തരവ്. വിചാരണ തീയതി ഷെഡ്യൂള്‍ ചെയ്യാന്‍ പ്രതികള്‍ ഹാജരാകാന്‍ ഉത്തരവിട്ടതിന് പിന്നാലെ ഒന്നാം പ്രതി ഒളിവില്‍ പോകുകയായിരുന്നു. ഒക്ടോബര്‍ 20 നകം അറസ്റ്റ് ചെയ്യാനും ജപ്തി വിളംബര റിപ്പോര്‍ട്ട് ഹാജരാക്കാനും സിബിഐ കോടതി ഉത്തരവിട്ടു.

അതേ സമയം കേസ് വിചാരണ ചെയ്യാനായി സാക്ഷി വിസ്താര തീയതിപ്പട്ടിക ഹാജരാക്കാന്‍ 2017 നവംബര്‍ 9 മുതല്‍ കോടതി ആവശ്യപ്പെട്ടിട്ടും സി ബി ഐ ഹാജരാക്കാത്തതിനാല്‍ സി ബി ഐ ക്ക് അന്ത്യശാസനം കോടതി നല്‍കിയിരുന്നു. വിചാരണക്ക് മുന്നോടിയായി 2017 ഒക്ടോബര്‍ 24 ന് പ്രതികള്‍ക്ക് മേല്‍ സി ബി ഐ കോടതി കുറ്റം ചുമത്തിയിരുന്നു.


ക്രിമിനല്‍ നടപടി ക്രമത്തിലെ വകുപ്പ് 228 പ്രകാരം കുറ്റം ചുമത്തിയ ശേഷം വകുപ്പ് 230 പ്രകാരം പ്രോസിക്യൂഷന്‍ ഭാഗം സാക്ഷി വിസ്താര തീയതി കോടതി തീരുമാനിക്കാന്‍ തുടങ്ങവേ തീയതിപ്പട്ടിക തങ്ങള്‍ സമര്‍പ്പിക്കാമെന്ന് സിബിഐ പ്രോസിക്യൂട്ടര്‍ കോടതി മുമ്പാകെ 2017 ഒക്ടോബര്‍ 24 ന് ബോധിപ്പിച്ചു. എന്നാല്‍ നാളിതു വരെ പ്രോസിക്യൂഷന്‍ സാക്ഷി വിസ്താര തീയതിപ്പട്ടിക സി ബി ഐ ഹാജരാക്കിയിട്ടില്ല. വ്യാജ വായ്പാ രേഖകള്‍ അസല്‍ പോലെ ഉപയോഗിച്ച് 2005- 06 ല്‍ നടത്തിയ വന്‍ വായ്പാതട്ടിപ്പില്‍ 2010 ല്‍ സിബിഐ തന്നെ കുറ്റപത്രം സമര്‍പ്പിച്ച കേസിന്റെ വിചാരണ 8 വര്‍ഷം കഴിഞ്ഞിട്ടു പോലും വൈകിപ്പിക്കാന്‍ സിബിഐ തന്നെയാണ് ശ്രമിക്കുന്നത്.


സെന്‍ട്രല്‍ ബാങ്ക് ഓഫ് ഇന്ത്യയുടെ ആലപ്പുഴ ചെങ്ങന്നൂര്‍ ബ്രാഞ്ചിലെ സീനിയര്‍ മാനേജര്‍ എന്‍. ഗണേശന്‍ , തട്ടിപ്പ് ആസൂത്രണം ചെയ്ത ചങ്ങനാശ്ശേരി തോപ്പില്‍ ജോസി വര്‍ഗ്ഗീസ് , തോപ്പില്‍ ജോഗി വര്‍ഗ്ഗീസ് , ആലപ്പുഴ എടത്വ ലതാ ഭവനില്‍ എസ്. സുധാകാരന്‍ , എസ് . പ്രശാന്ത് , ചങ്ങനാശ്ശേരി പഴയ മഠത്തില്‍ എസ് . ബാലാജി , ചങ്ങനാശ്ശേരി നടപ്പുറത്ത് എസ്. പ്രമോദ് , ഷീബാ ജോസി , ജോസുകുട്ടി എന്ന റ്റി.സി. ജോസഫ് ( മരണപ്പെട്ടു ) , ജോഷി തോമസ് , ഇടുക്കി പീരുമേട് സ്വദേശികളും ആധാരമെഴുത്തുകാരുമായ പാടത്ത് സി. പി . ബിനു , വാരിക്കോട് വി. കെ. ഷിബു , ഇയാളുടെ ഭാര്യാ സഹോദരന്‍ അനൂപ് രാജ് എന്നിവരാണ് വ്യാജ വായ്പാ തട്ടിപ്പു കേസിലെ ഒന്നു മുതല്‍ 13 വരെയുള്ള പ്രതികള്‍. ഒമ്പതാം പ്രതി ജോസുകുട്ടിയുടെ മരണ സര്‍ട്ടിഫിക്കറ്റ് ഹാജരാക്കാന്‍ അന്വേഷണ ഉദ്യോഗസ്തന് നോട്ടീസയക്കാന്‍ കോടതി ഉത്തരവിട്ടു.