സ്വന്തം അധ്വാനശേഷിയും സർഗാത്മകതയും സമൂഹത്തിനു സമർപ്പിച്ചവരാവും ഓരോ വയോജനങ്ങളും. ഈ സംഭാവനകൾക്കും വയോജനമേഖലയിലെ മികവാർന്ന പ്രവർത്തനങ്ങൾക്കും അന്താരാഷ്ട്ര വയോജന ദിനാചരണ ചടങ്ങിൽ വയോസേവന പുരസ്കാരങ്ങൾ സമ്മാനിച്ച് ആദരമർപ്പിച്ച് മന്ത്രി ആർ ബിന്ദു. മന്ത്രിയുടെ വാക്കുകൾ ഇങ്ങനെ;

സ്വന്തം അധ്വാനശേഷിയും സർഗാത്മകതയും സമൂഹത്തിനു സമർപ്പിച്ചവരാവും ഓരോ വയോജനങ്ങളും. ഈ സംഭാവനകൾക്കും വയോജനമേഖലയിലെ മികവാർന്ന പ്രവർത്തനങ്ങൾക്കും അന്താരാഷ്ട്ര വയോജന ദിനാചരണ ചടങ്ങിൽ വയോസേവന പുരസ്കാരങ്ങൾ സമ്മാനിച്ച് ആദരമർപ്പിച്ചു.

'ഉപയോഗിക്കൂ വലിച്ചെറിയൂ' സംസ്കാരം വർധിച്ചു വരികയാണ് സമൂഹത്തിൽ. അധ്വാനശേഷി തീരുമ്പോൾ നിരുപാധികം ഉപേക്ഷിക്കുന്ന പ്രവണതയും കൂടെ വളരുന്നു. 2030 ആവുമ്പോഴേക്കും കേരളത്തിന്റെ ജനസംഖ്യയിൽ 25% വയോജനങ്ങളായിരിക്കും. ഇവർക്കുള്ള സംരക്ഷണ സംവിധാനങ്ങൾ ഒരുക്കൽ ഏറ്റവും പ്രധാന കർത്തവ്യമായി സർക്കാരും സാമൂഹ്യനീതി വകുപ്പും കാണുന്നത് ഈ പശ്ചാത്തലം വെച്ചാണ്.

നൂറ്റമ്പതിൽപരം വയോജന സദനങ്ങൾക്ക് നിലവിൽ സർക്കാർ ഗ്രാന്റ് നൽകിവരുന്നുണ്ട്. 49.84 ലക്ഷം വയോജനങ്ങൾക്ക് പെൻഷൻ അനുവദിക്കാനും സംസ്ഥാന സർക്കാരിനായി. നാം നടപ്പാക്കുന്ന ഈ സാമൂഹിക സുരക്ഷ പെൻഷൻ പദ്ധതിയെ റിസർവ് ബാങ്ക് നിറഞ്ഞഭിനന്ദിച്ചിട്ടുണ്ട്. 2021 വയോസുരക്ഷ പദ്ധതിക്ക് ദേശീയ അവാർഡും നാം നേടി.

വയോജനങ്ങളുടെ ക്ഷേമവും സുരക്ഷയും സംരക്ഷണവും മുൻനിർത്തി നടപ്പാക്കുന്ന വയോമിത്രം, കാരുണ്യ വയോരക്ഷ, വയോ അമൃതം, വയോ മധുരം, സെക്കൻഡ് ഇന്നിങ്സ്, മെമ്മറി ക്ലിനിക്ക്, ഓർമ്മത്തോണി തുടങ്ങി നിരവധി പദ്ധതികൾ വയോജന സൗഹൃദ സംസ്ഥാനമായി കേരളത്തെ മാറ്റിത്തീർക്കുകയാണ്.

വിവിധ വിഭാഗങ്ങളിൽ ഈ വർഷത്തെ വയോസേവന പുരസ്കാരങ്ങൾ നേടിയ തദ്ദേശ സ്വയംഭരണ സ്ഥാപനങ്ങൾ, എൻ ജി ഒകൾ, വ്യക്തികൾ എന്നിവർക്ക് ചടങ്ങിൽ പുരസ്കാരമേകി. നവതി ആഘോഷിക്കുന്ന മലയാളത്തിന്റെ മഹാനടൻ മധുവിനും കാർഷിക മേഖലയിലും വിത്ത് സംരക്ഷണത്തിലും മാതൃകയായ ചെറുവയൽ രാമനുമാണ് ഇക്കുറി ആജീവനാന്ത സംഭാവനകൾക്കുള്ള പുരസ്കാരം.

വയോജന സേവനത്തിനുള്ള അവാർഡ്‌ കോഴിക്കോട് കോർപ്പറേഷൻ, നിലസൂർ നഗരസഭ, കോഴിക്കോട് ജില്ലാ പഞ്ചായത്ത്, ഒല്ലൂർക്കര ബ്ലോക്ക് പഞ്ചായത്ത്, എലിക്കുളം ഗ്രാമപ്പഞ്ചായത്ത്, അന്നമനട ഗ്രാമപ്പഞ്ചായത്ത്, എൻ ജി ഒ വിഭാഗത്തിൽ വൊസാർഡ്, കായികമേഖലയിൽ ജി രവീന്ദ്രൻ, പി സി ഏലിയാമ്മ, ട്രിബ്യൂണൽ വിഭാഗത്തിൽ ഫോർട്ട് കൊച്ചി റവന്യൂ ഡിവിഷണൽ ഓഫീസർ വിഷ്ണു രാജ് എന്നിവരും കലാ മേഖലയിൽ ശിൽപ്പി വൽസൻ കൊല്ലേരി, ഗായിക മച്ചാട് വാസന്തിക്ക് വേണ്ടി മകൾ എന്നിവരും അവാർഡുകൾ ഏറ്റുവാങ്ങി. ഷോർട്ട് ഫിലിം മൽസരത്തിലെ വിജയികൾക്കും ചടങ്ങിൽ പുരസ്കാരങ്ങൾ സമ്മാനിച്ചു.