കൊലക്കേസ് പ്രതിയായ ഓട്ടോ ഡ്രൈവറുടെ കൊലപാതക്കേസില്‍ എല്ലാ പ്രതികളും കുറ്റം ചുമത്തലിന് ഹാജരാകാന്‍ തലസ്ഥാന വിചാരണ കോടതി ഉത്തരവിട്ടു. തിരുവനന്തപുരം രണ്ടാം അഡീ. ജില്ലാ സെഷന്‍സ് കോടതിയുടേതാണുത്തരവ്. ഒന്നു മുതല്‍ ആറുവരെ പ്രതികളും ചാക്ക സ്വദേശികളുമായ റസീം ഖാന്‍ എന്ന ചിക്കു , ജയദേവന്‍ എന്ന മുരുകന്‍ , വിനീഷ് എന കൊച്ചുമോന്‍ , അനുലാല്‍ , പേട്ട സ്വദേശി ശിവപ്രതാപ് എന്ന ഉണ്ണി , കടകംപള്ളി സ്വദേശി റിജു എന്നിവരാണ് ഹാജരാകേണ്ടത്.


പേട്ട സ്വദേശി വിപിന്‍ എന്ന കൊച്ചു കുട്ടനായിരുന്നു 2019 നവംബര്‍ പുലര്‍ച്ചെ ആനയറയില്‍ വെട്ടിക്കൊലപ്പെടുത്തിയ രീതിയില്‍ കാണപ്പെട്ടത്. കൃത്യത്തിന് ശേഷം ആറ് പ്രതികളും തുമ്പ സി.ഐക്ക് മുന്നില്‍ കീഴടങ്ങി. ഇവരെ പിന്നീട് പേട്ട പൊലീസിന് കൈമാറി.


ആനയറ ലോര്‍ഡ്സ് ഹോസ്പിറ്റലിനു സമീപം റോഡരികില്‍ വിപിനെ വെട്ടേറ്റ നിലയില്‍ കണ്ടെത്തുകയായിരുന്നു. വലതു കൈയും ഇടതുകാലും അറ്റുപോയിരുന്നു. ചാക്കയില്‍ നിന്ന് ഓട്ടം വിളിച്ചു കൊണ്ടുപോയ ആറംഗ സംഘം വിപിനെ വെട്ടുകയായിരുന്നു.

2014 ല്‍ കാരാളി അനൂപിനെ കല്ലു കൊണ്ട് തലയ്ക്കടിച്ച് കൊലപ്പെടുത്തിയ കേസിലെ ഒന്നാം പ്രതിയാണ് വിപിന്‍. നിരവധി ക്രിമിനല്‍ കേസുകളിലും പ്രതിയാണ്. 2019 ഓഗസ്റ്റില്‍ ഈഞ്ചയ്ക്കലിലെ സ്വകാര്യബാറില്‍ വെച്ച് കൊലപാതക സംഘവും വിപിനും തമ്മില്‍ ഏറ്റുമുട്ടിയിരുന്നു. ഇതിനെ തുടര്‍ന്ന് വഞ്ചിയൂര്‍ പൊലീസ് വിപിനെ അറസ്റ്റ് ചെയ്തു.

റിമാന്‍ഡിലായിരുന്ന വിപിന്‍ സംഭവത്തിന് രണ്ടാഴ്ച മുമ്പാണ് ജാമ്യത്തില്‍ ഇറങ്ങിയത്. ഈ സംഭവത്തിലെ വൈരാഗ്യവും സംഭവത്തിന് കാരണമായതെന്നാണ് 2020 ല്‍ പേട്ട പൊലീസ് സമര്‍പ്പിച്ച കുറ്റപത്രത്തില്‍ പറയുന്നത്.