ഐഎസ്‌ഐ ബന്ധം ആരോപിച്ച് ഡല്‍ഹി പോലീസ് അറസ്റ്റുചെയ്ത വ്യോമസേന ഉദ്യോഗസ്ഥന്‍ കെ.കെ. രഞ്ജിത്തിനെ ബോധപൂര്‍വം ആരോ കുടുക്കിയതാണെന്ന് ബന്ധുക്കള്‍. രഞ്ജിത്തിനെ ഐഎസ്‌ഐ ബന്ധം ആരോപിച്ച് അറസ്റ്റ് ചെയ്തത് ഗൂഢലക്ഷ്യത്തോടെ ആണോയെന്ന് പരിശോധിക്കണമെന്ന് ബന്ധുക്കള്‍ ആവശ്യപ്പെട്ടു. കഴിഞ്ഞ ഒരു മാസമായി രഞ്ജിത്ത് വീട്ടിലേക്ക് വിളിച്ചിട്ടില്ലെന്നും കുടുംബം പറയുന്നു. മലപ്പുറം പുളിയ്ക്കല്‍ ചെറുകാവ് സ്വദേശിയായ രഞ്ജിത്ത് ഇന്നലെയാണ് അറസ്റ്റിലായത്.

രഞ്ജിത്തിന് ഭീകരവാദസ്വഭാവമുള്ള സംഘടനകളുമായി ബന്ധമില്ലെന്നാണ് നാട്ടുകാരുടെയും കുടുംബത്തിന്റെയും സാക്ഷ്യം. അതേസമയം പ്രായക്കുറവും പക്വതയില്ലായ്മയും അബദ്ധത്തില്‍ ചെന്ന് ചാടാന്‍ കാരണമായോ എന്ന സംശയവും ഇവര്‍ മറച്ചുവച്ചില്ല. നാട്ടിലെത്തിയാല്‍ സുഹൃത്തുക്കളുമായും ബന്ധുക്കളുമായും നല്ല ബന്ധം കാത്തുസൂക്ഷിക്കുന്ന രഞ്ജിത്ത് ഭീകരസംഘടനകളുടെ ചട്ടുകമാകാന്‍ സാധ്യതയില്ലെന്നാണ് അയല്‍ക്കാരുടെയും വിശ്വാസം.

വ്യോമസേന പോര്‍വിമാനങ്ങളെയും, എയര്‍ബേയ്‌സുകളെയും, കുറിച്ചുള്ള നിര്‍ണ്ണായക വിവരങ്ങള്‍ രഞ്ജിത്ത് ഐഎസ്‌ഐയ്ക്ക് കൈമാറിയിട്ടുണ്ടെന്നാണ് അന്വേഷണസംഘത്തിന് ലഭിച്ച വിവരം. സമൂഹമാധ്യങ്ങള്‍ വഴി പരിചയപ്പെട്ട ദാമിനി മക്‌നോട്ട് എന്ന വനിതാ സുഹൃത്തിനാണ് രഞ്ജിത്ത് വിവരങ്ങള്‍ കൈമാറിയിരുന്നതെന്നും വ്യക്തമായി. തുടര്‍ന്ന് പഞ്ചാബിലെ ഭട്ടിന്‍ഡയില്‍ നിന്ന് ഇയാളെ അറസ്റ്റ് ചെയ്യുകയായിരുന്നു. ലീഡ് എയര്‍ക്രാഫ്റ്റ്‌സ്മാനായി ജോലിചെയ്യുന്ന രഞ്ജിത്ത് 2010 ലാണ് വ്യോമസേനയില്‍ ചേര്‍ന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha