കേരളത്തിലെ കോണ്‍ഗ്രസിനുള്ളിലെ ആഭ്യന്തര പ്രശ്‌നങ്ങള്‍ കോണ്‍ഗ്രസിന് തലവേദനയാകുന്നുവെന്നും ഇനിയും ഇത് തുടര്‍ന്നാല്‍ മുതിര്‍ന്ന നേതാവ് എകെ ആന്റണിയെ കേരളത്തിലേക്കയക്കുമെന്നും സോണിയാഗാന്ധി നേതാക്കളോട് പറഞ്ഞു. ഇന്നലെ സോണിയാ ഗാന്ധിയെ മുന്നില്‍ കിട്ടിയപ്പോള്‍ കോണ്‍ഗ്രസിലെ അനൈക്യത്തിനെതിരേ യു.ഡി.എഫ്. ഘടകകക്ഷി നേതാക്കള്‍ പരാതിക്കെട്ടഴിച്ചു. മുന്നണിയുടെ കെട്ടുറപ്പും കോണ്‍ഗ്രസിലെ ഐക്യവും ശക്തിപ്പെടുത്താന്‍ ഹൈക്കമാന്‍ഡ് ഇടപെടണമെന്ന് അവര്‍ സോണിയയോട് അഭ്യര്‍ഥിച്ചു.
നാട്ടകം ഗസ്റ്റ്ഹൗസില്‍ നടന്ന ചര്‍ച്ചയിലാണു കോണ്‍ഗ്രസ് അധ്യക്ഷയ്ക്കു മുന്നില്‍ ആവലാതികളുടെ അണപൊട്ടിയത്.
ഘടകകക്ഷി നേതാക്കളുമായി വെവ്വേറെ നടത്തിയ ചര്‍ച്ചയില്‍ കാര്യങ്ങള്‍ മനസിലാക്കിയ സോണിയ പിന്നീടു മുഖ്യമന്ത്രി ഉമ്മന്‍ചാണ്ടി, ആഭ്യന്തരമന്ത്രി രമേശ് ചെന്നിത്തല, കെ.പി.സി.സി. അധ്യക്ഷന്‍ വി.എം. സുധീരന്‍ എന്നിവരെ ഇതുസംബന്ധിച്ച അതൃപ്തിയറിയിച്ചു. ജനതാദള്‍ (യു), കേരളാ കോണ്‍ഗ്രസ് (ജേക്കബ്) എന്നിവയൊഴികെ മുഴുവന്‍ ഘടകകക്ഷികളും കോണ്‍ഗ്രസ് സംസ്ഥാനനേതൃത്വത്തിനെതിരേ രൂക്ഷവിമര്‍ശനം അഴിച്ചുവിട്ടു. ഇന്നലെ ഉച്ചയ്ക്കു 12.50നാണ് സോണിയ നാട്ടകം ഗസ്റ്റ് ഹൗസിലെത്തിയത്. നിമിഷങ്ങള്‍ക്കകം ഘടകകക്ഷി നേതാക്കളുമായി ചര്‍ച്ചയാരംഭിച്ചു. ആദ്യചര്‍ച്ചയില്‍ പങ്കെടുത്ത മുസ്ലിം ലീഗ് നേതാക്കള്‍ യു.ഡി.എഫിലെ പ്രശ്‌നങ്ങള്‍ സോണിയയെ ധരിപ്പിച്ചു.
മുന്നണിയില്‍ എന്തൊക്കെ പ്രശ്‌നങ്ങളുണ്ടോ അതിലെല്ലാം ഹൈക്കമാന്‍ഡിന്റെ ഇടപെടലുണ്ടാകണമെന്നായിരുന്നു ലീഗ് നേതാക്കളുടെ ആവശ്യം. യു.ഡി.എഫില്‍ ഐക്യമുണ്ടാകേണ്ടതിന്റെ ആവശ്യകത സോണിയയെ ധരിപ്പിച്ചതായി മന്ത്രി പി.കെ. കുഞ്ഞാലിക്കുട്ടി പറഞ്ഞു.
മുന്നണിയിലും പ്രത്യേകിച്ചു കോണ്‍ഗ്രസിലും ഐക്യമുണ്ടാകണമെന്നു സോണിയയോട് ആവശ്യപ്പെട്ടതായി കേരളാ കോണ്‍ഗ്രസ് (എം) ചെയര്‍മാന്‍ കെ.എം. മാണി എം.എല്‍.എ. വ്യക്തമാക്കി. കേരളത്തിലെ രാഷ്ട്രീയസാഹചര്യങ്ങളും ചര്‍ച്ച ചെയ്തു. തദ്ദേശതെരഞ്ഞെടുപ്പില്‍ പൊതുവേ യു.ഡി.എഫിനു ക്ഷീണമുണ്ടായെങ്കിലും മധ്യതിരുവിതാംകൂറിലും മലപ്പുറത്തും പ്രശ്‌നമുണ്ടായില്ല. ന്യൂനപക്ഷവികാരങ്ങളെ വ്രണപ്പെടുത്തുന്ന രീതിയില്‍ ചില കോണ്‍ഗ്രസ് നേതാക്കളുടെ ഭാഗത്തുനിന്നുണ്ടായ പ്രസ്താവനകള്‍ ദോഷം ചെയ്യും. റബര്‍ ഇറക്കുമതി പൂര്‍ണമായി നിര്‍ത്താന്‍ കോണ്‍ഗ്രസ് പാര്‍ലമെന്റില്‍ സമ്മര്‍ദം ചെലുത്തണം. നിയമസഭാ തെരഞ്ഞെടുപ്പില്‍ അര്‍ഹമായ സീറ്റ് ലഭിക്കണമെന്ന് ആവശ്യപ്പെട്ടു. ബാര്‍ കോഴക്കേസ് ചര്‍ച്ചയില്‍ വന്നില്ലെന്നും മാണി പറഞ്ഞു.
നിയമസഭാ തെരഞ്ഞെടുപ്പില്‍ നാലു സീറ്റ് വേണമെന്നു കേരളാ കോണ്‍ഗ്രസ് (ജേക്കബ്) നേതാക്കള്‍ സോണിയയോട് ആവശ്യപ്പെട്ടു. കഴിഞ്ഞതവണ ഏകപക്ഷീയമായാണു സീറ്റ് നിശ്ചയിച്ചത്. മൂവാറ്റുപുഴ, പിറവം, കടുത്തുരുത്തി, പീരുമേട് സീറ്റുകള്‍ ലഭിക്കണം. ഭക്ഷ്യസുരക്ഷാനിയമം സംബന്ധിച്ച കാര്യത്തില്‍ ഹൈക്കമാഡിന്റെ ശ്രദ്ധ പാര്‍ട്ടി നേതാക്കള്‍ ആവശ്യപ്പെട്ടു. കോണ്‍ഗ്രസ് ഒറ്റക്കെട്ടായി തെരഞ്ഞെടുപ്പിനെ നേരിട്ടാല്‍ ഭരണം നിലനിര്‍ത്താമെന്നാണ് ആര്‍.എസ്.പി. നേതാക്കള്‍ സോണിയയെ ധരിപ്പിച്ചത്. മുന്നണിയില്‍ കെട്ടുറപ്പില്ലാതെ മത്സരിച്ചതാണു തദ്ദേശതെരഞ്ഞെടുപ്പില്‍ തിരിച്ചടിക്കു കാരണമായത്. അതു താത്കാലികമാണ്. കോണ്‍ഗ്രസിനോടു സഹകരിക്കാമെന്ന തരത്തിലുള്ള പ്ലീനം ചര്‍ച്ചകള്‍ സി.പി.എം. കേരളഘടകത്തില്‍ ഭിന്നിപ്പുണ്ടാക്കുമെന്നും അതു മുതലെടുക്കണമെന്നും ആര്‍.എസ്.പി. ചൂണ്ടിക്കാട്ടി.
നിലവിലെ രാഷ്ട്രീയസാഹചര്യങ്ങളും മുമ്പു യു.ഡി.എഫില്‍ ഉന്നയിച്ച കാര്യങ്ങളുമാണു സോണിയയുടെ ശ്രദ്ധയില്‍പെടുത്തിയതെന്നു ജനതാദള്‍ (യു) നേതാവ് എം.പി. വീരേന്ദ്രകുമാര്‍ പറഞ്ഞു. ഭരണം നിലനിര്‍ത്താന്‍ കോണ്‍ഗ്രസില്‍ ഐക്യം അനിവാര്യമാണെന്നായിരുന്നു സി.എം.പിയുടെ നിലപാട്. കേരളത്തില്‍ ബി.ജെ.പിയുടെ വളര്‍ച്ച ഗൗരവമായെടുക്കണമെന്നും അവര്‍ ആവശ്യപ്പെട്ടു. കോണ്‍ഗ്രസിലെ തര്‍ക്കവും ഗ്രൂപ്പിസവുംതന്നെയായിരുന്നു ജെ.എസ്.എസ്. നേതാക്കളുടെയും പരാതി. ഘടകകക്ഷി നേതാക്കളുടെ വിമര്‍ശനങ്ങള്‍ ഉള്‍ക്കൊണ്ട സോണിയ പിന്നീടു മുഖ്യമന്ത്രി ഉമ്മന്‍ ചാണ്ടി, ആഭ്യന്തരമന്ത്രി രമേശ് ചെന്നിത്തല, കെ.പി.സി.സി. അധ്യക്ഷന്‍ വി.എം. സുധീരന്‍ എന്നിവരുമായി വെവ്വേറെയും കൂട്ടായും ചര്‍ച്ച നടത്തി. ഇന്ന് ഉച്ചകഴിഞ്ഞു മൂന്നിനു തിരുവനന്തപുരത്തു മൂന്നു നേതാക്കളും പത്രസമ്മേളനം നടത്തും. യു.ഡി.എഫിലെ തുടര്‍ചര്‍ച്ചകളുടെ ഭാഗമായി ജനതാദള്‍ (യു), ജെ.എസ്.എസ്, സി.എം.പി. പ്രതിനിധികളുമായി ഇന്നു ക്ലിഫ് ഹൗസില്‍ ചര്‍ച്ച നടത്തും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha