നിയമസഭാ തിരഞ്ഞെടുപ്പില്‍ ജയം നേടാനുറച്ച് രംഗത്തിറങ്ങുന്ന ബി.ജെ.പി എല്ലാ നിയോജകമണ്ഡലങ്ങളിലും പ്രതിഫലത്തോടെയുള്ള പ്രവര്‍ത്തകരുടെ സേനയുണ്ടാക്കാന്‍ തീരുമാനിച്ചു. നിയമസഭാ തിരഞ്ഞെടുപ്പുവരെയാണ് ഇവരെ നിയമിക്കുന്നത്. ഇവര്‍ക്ക് പരിശീലനം നല്‍കുന്നതിനുളള കര്‍മ്മപദ്ധതിക്ക് ഇന്നലെ ചേര്‍ന്ന സംസ്ഥാന ജനറല്‍ കൗണ്‍സില്‍ രൂപം നല്‍കി.
പാര്‍ട്ടിയുടെ സംഘടനാ സംവിധാനം സുഗമമായി പ്രവര്‍ത്തിക്കുന്നതിന്, ബി.ജെ.പി അദ്ധ്യക്ഷനായി ചുമതലയേറ്റ കുമ്മനം രാജശേഖരനാണ് \'പെയ്ഡ്\'പ്രവര്‍ത്തകരുടെ സേന രൂപീകരിക്കാന്‍ നിര്‍ദ്ദേശിച്ചത്. ബൂത്ത് തലത്തിലുള്ള പ്രവര്‍ത്തനങ്ങള്‍ ക്രോഡീകരിക്കുന്നതിനും സംസ്ഥാന തലത്തില്‍ നിന്നുള്ള നിര്‍ദ്ദേശങ്ങള്‍ അതേപടി നടപ്പാക്കുന്നതിനും ഇവര്‍ രംഗത്തിറങ്ങും.
ബി.ജെ.പിയുടെ നിലവിലെ സംഘടനാ സംവിധാനത്തിന് പുറമേയാണ് പുതിയ സംവിധാനം. രാഷ്ട്രീയ മുന്നണി രൂപീകരിക്കുമ്പോള്‍ അടിത്തട്ടില്‍ ആശയക്കുഴപ്പമോ, ഗ്രൂപ്പ്, വ്യക്തി താത്പര്യങ്ങളോ ബാധിക്കാതെ സംവിധാനം മുന്നോട്ടുകൊണ്ടുപോകാന്‍ ഇതു വഴി കഴിയുമെന്നാണ് പ്രതീക്ഷ.

ഇതുള്‍പ്പെടെ തിരഞ്ഞെടുപ്പില്‍ വന്‍ വിജയം നേടുന്നതിനുള്ള കര്‍മ്മപദ്ധതിക്കും ഇന്നലെ ചേര്‍ന്ന ബി.ജെ.പി നേതൃയോഗവും ജനറല്‍ കൗണ്‍സിലും അംഗീകാരം നല്‍കി.
കഴിഞ്ഞ തിരഞ്ഞെടുപ്പില്‍ പാര്‍ട്ടിക്ക് കിട്ടിയത് 28 ലക്ഷം വോട്ടാണ്. ഇത് 75 ലക്ഷമാക്കി ഉയര്‍ത്തുകയാണ് ലക്ഷ്യം. ജനുവരി 5 മുതല്‍ 13 വരെ തിരഞ്ഞെടുപ്പ് കമ്മിറ്റി അദ്ധ്യക്ഷന്‍ വി. മുരളീധരന്റെ നേതൃത്വത്തില്‍ ജില്ലാ തലത്തില്‍ പ്രവര്‍ത്തകര്‍ക്ക് മാത്രമായി രാഷ്ട്രീയ വിശദീകരണയോഗങ്ങള്‍ നടത്തും.
ഇരുമുന്നണികളുടെ രാഷ്ട്രീയ വൈകല്യങ്ങളും ഭൂരിപക്ഷ സമുദായങ്ങളോടുള്ള വിവേചനസമീപനങ്ങളും വികസന വിരുദ്ധ ഒത്തുതീര്‍പ്പ് രാഷ്ട്രീയവും വിശദമാക്കി ഇടതുവലതു മുന്നണികള്‍ക്കെതിരായി കുറ്റപത്രം തയ്യാറാക്കാനും അത് പ്രചരിപ്പിക്കുന്നതിന് സംസ്ഥാന വ്യാപകമായി രാഷ്ട്രീയ സെമിനാറുകള്‍ സംഘടിപ്പിക്കാനും തീരുമാനിച്ചു.
വിഷന്‍ ഡോക്യുമെന്റിന്റെ ചുമതല സംസ്ഥാന സെക്രട്ടറി നാരായണന്‍ നമ്പൂതിരിക്കാണ്. രാഷ്ട്രീയ മുന്നണിയുണ്ടാകുമെന്നല്ലാതെ അത് എങ്ങനെയായിരിക്കുമെന്ന് ജനറല്‍ കൗണ്‍സിലില്‍ അറിയിച്ചില്ല.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha