സർക്കാർ നടത്തുന്ന വികസന പ്രവർത്തനങ്ങളും നാടിൻറെ പുരോഗതിയും എല്ലാം വിഭാഗം ജനങ്ങൾക്കിടയിലും ചർച്ച ചെയ്യപ്പെടണമെന്ന് ജലവിഭവ വകുപ്പ് മന്ത്രി റോഷി അഗസ്റ്റിൻ. മുഖ്യമന്ത്രിയും മന്ത്രിമാരും പങ്കെടുക്കുന്ന നവകേരള സദസിന് മുന്നോടിയായി തൊടുപുഴ മണ്ഡലതല സംഘാടകസമിതി രൂപീകരണയോഗം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

ഉദ്യോഗസ്ഥ സംവിധാനവും ജനങ്ങളും തമ്മിലുള്ള അടുത്ത ബന്ധം നാടിന്റെ പുരോഗതിക്ക് അത്യാവശ്യമാണ്. അത്തരത്തിൽ ഏവരെയും ഒരുമിച്ചു നിർത്തിയുള്ള മികച്ച പ്രവർത്തനമാണ് സംസ്ഥാന സർക്കാരിന്റെ നേതൃത്വത്തിൽ നടന്ന് വരുന്നത്. നമ്മുടെ സംസ്ഥാനം രാജ്യത്തിന് തന്നെ മാതൃകയാവുകയാണ്.

അതിദരിദ്ര വിഭാഗത്തെ കൃത്യമായി കണ്ടെത്തി പുരോഗതി വിലയിരുത്താനും ആവശ്യമായ പ്രവർത്തനങ്ങൾ ആ മേഖലയിൽ ചെയ്യാനും മികച്ച ഇടപെടൽ നടക്കുന്നു . 2025 നവംബർ 1 ആകുമ്പോൾ അതിദരിദ്ര രഹിത സംസ്ഥാനമാകാൻ നമുക്ക് സാധിക്കും. സാമൂഹ്യ നീതിയിൽ അധിഷ്ടിതമായ പ്രവർത്തനമാണ് സർക്കാർ കാഴ്ച വെയ്ക്കുന്നത്. ഭരണ സംവിധാനത്തിലൂടെ മികച്ച സേവനം ജനങ്ങൾക്ക് നൽകാൻ സാധിച്ചെന്നും മന്ത്രി പറഞ്ഞു.

നവകേരള സദസിന്റെ തൊടുപുഴ നിയോജകമണ്ഡല സംഘാടക സമിതി ചെയർമാനായി പി. ജെ ജോസഫ് എം. എൽ. എ, വൈസ് ചെയർമാന്മാരായി ജില്ലാ പഞ്ചായത്ത് പ്രസിഡന്റ് കെ ടി ബിനു, നഗരസഭ ചെയർമാൻ സനീഷ് ജോർജ്, കൺവീനറായി മൂന്നാർ എൽ. എ ഡെപ്യൂട്ടി കളക്ടർ ദീപ കെ. പി എന്നിവരെ തെരഞ്ഞെടുത്തു. പഞ്ചായത്ത്തല സംഘാടക സമിതി യോഗങ്ങൾ ഈ മാസം 30 ന് മുൻപായി ചേർന്ന് തീരുമാനങ്ങൾ എടുക്കാനും യോഗത്തിൽ മന്ത്രി നിർദ്ദേശിച്ചു.

തൊടുപുഴ ടൗൺഹാളിൽ ചേർന്ന യോഗത്തിൽ നഗരസഭ ചെയർമാൻ സനീഷ് ജോർജ് അധ്യക്ഷത വഹിച്ചു. സി.പി.ഐ ജില്ലാ സെക്രട്ടറി കെ സലിംകുമാർ മുഖ്യപ്രഭാഷണം നടത്തി. എ. ഡി എം ഷൈജു പി ജേക്കബ് യോഗത്തിൽ സ്വാഗതവും ഡെപ്യൂട്ടി കളക്ടർ ദീപ കെ. പി സംഘാടക സമിതി കരട് രേഖ അവതരണവും നടത്തി. വണ്ണപ്പുറം ഗ്രാമപഞ്ചായത്ത് പ്രസിഡന്റ് ബിജു എം. എ, ഉടുമ്പന്നൂർ ഗ്രാമപഞ്ചായത്ത് പ്രസിഡന്റ് എം ലതീഷ്, ആലക്കോട് ഗ്രാമപഞ്ചായത്ത് പ്രസിഡന്റ് ജാൻസി മാത്യു, തൊടുപുഴ ബി. ഡി. ഒ അജയ് എ. ജെ, രാഷ്ട്രീയ കക്ഷി നേതാക്കളായ കെ. എ ആന്റണി, വി. വി മത്തായി, മുഹമ്മദ് ഫൈസൽ, പ്രമോദ് വി. ആർ, ജിമ്മി മറ്റത്തിൽപ്പാറ, വിവിധ വകുപ്പ് തല മേധാവികൾ, ത്രിതല പഞ്ചായത്ത് പ്രതിനിധികൾ, തുടങ്ങിയവർ പങ്കെടുത്തു.