കൊട്ടാരക്കര മണ്ഡലത്തിലെ എല്ലാ പഞ്ചായത്തുകളിലെയും വിവിധതരം വിവരങ്ങൾ പ്രത്യേകം തിരഞ്ഞെടുക്കാനും അതുവഴി മണ്ഡലത്തിലെ സമഗ്രവികസനപദ്ധതി തയ്യാറാക്കുന്നതിന് ഭൂവിവരാധിഷ്ഠിത വിവരവിജ്ഞാന വെബ് പോർട്ടൽ സഹായകരമാകും എന്നും ധനകാര്യ മന്ത്രി കെ എൻ ബാലഗോപാൽ. കൊട്ടാരക്കര ഹൈലാൻഡ് ഓഡിറ്റോറിയത്തിൽ ഭൂവിവരാധിഷ്ഠിത വിവര വിജ്ഞാന വെബ് പോർട്ടൽ പ്രകാശനം ചെയ്യുകയായിരുന്നു അദ്ദേഹം.

ഓരോ പ്രദേശത്തെയും ജലസ്രോതസ്സ്, വയലുകൾ, കൃഷിക്ക് അനുയോജ്യമായ ഭൂമി, പൈപ്പ് ലൈനുകൾ പോകുന്ന വഴികൾ, വ്യക്തികളുടെ വിവരങ്ങളും താമസിക്കുന്ന സ്ഥലവും തുടങ്ങി എല്ലാത്തരം വിവരങ്ങളും അറിയാൻ സാധിക്കും. തദ്ദേശസ്വയംഭരണ സ്ഥാപനങ്ങളുടെ പ്രവർത്തനങ്ങളുടെ ആകെ നിലവാരം മെച്ചപ്പെടുത്താൻ ഇതുവഴി സാധിക്കും എന്ന് അദ്ദേഹം പറഞ്ഞു.

കൊട്ടാരക്കര നിയോജകമണ്ഡലത്തെ സംബന്ധിച്ച എല്ലാ വിവരങ്ങളും ലഭ്യമാക്കുന്ന വിവരാധിഷ്ഠിത വിവരവിജ്ഞാന വെബ് പോർട്ടലാണ് 'സീേേമൃമസസമൃമ.രീാ'. മണ്ഡലത്തിലെ തദ്ദേശ സ്വയംഭരണസ്ഥാപനങ്ങൾക്ക് അവരുടെ ഭരണ പരിധിയിൽ ഉൾപ്പെടുന്ന ഭൂവിഭവങ്ങളെക്കുറിച്ചുള്ള അവബോധം സൃഷ്ടിക്കുന്നതിനും ശാസ്ത്രീയമായരീതിയിൽ ഭൂവിഭവങ്ങളെ പരിപാലിക്കുന്നതിനും, നീർത്തടാധിഷ്ഠിതവും പ്രാദേശികവുമായ വികസനപദ്ധതികൾ ആസൂത്രണം ചെയ്യുന്നതിനും കഴിയും.

സ്‌പെഷ്യൽ ഡാറ്റ ടെക്‌നോളജികളുടെ ഉപയോഗം പ്രോത്സാഹിപ്പിക്കുന്നതിനും വെബ് അധിഷ്ഠിത വിവര സംവിധാനത്തിലൂടെ സാധ്യമാക്കും. മണ്ഡലത്തിലെ എല്ലാ തദ്ദേശ സ്വയംഭരണ സ്ഥാപനങ്ങളിലെയും ഭൂവിനിയോഗം, ഭൂരൂപങ്ങൾ, ഭൂവിജ്ഞാനീയം, മണ്ണ്‌ വിഭവങ്ങൾ, ജലസ്രോതസ്സുകൾ, നീർത്തടങ്ങൾ, പഞ്ചായത്ത്അതിരുകൾ, റോഡ്-റെയിൽ-നീർച്ചാലുകൾ തുടങ്ങിയ ഭൂവിഭവങ്ങളുടെ വിശദമായ വിവരങ്ങൾ വെബ്‌സൈറ്റിൽ ലഭ്യമാക്കിയിട്ടുണ്ട്. വികസന വകുപ്പുകൾക്ക് പുറമെ പ്രകൃതിസംരക്ഷണം, വിഭവപരിപാലനം എന്നിവയെ അടിസ്ഥാനമാക്കി പ്രവർത്തിക്കുന്ന വിവിധ ഏജൻസികൾക്കും ഗവേഷണവിദ്യാർഥികൾക്കും വെബ്‌സൈറ്റ് ഉപകാരപ്രദമാകും.

ചടങ്ങിൽ കൊട്ടാരക്കര മുനിസിപ്പാലിറ്റി ചെയർമാൻ എസ് ആർ രമേശ് അധ്യക്ഷനായി, ജില്ലാ കലക്ടർ എൻ ദേവിദാസ്, ഭൂവിനിയോഗ ബോർഡ് കമ്മീഷണർ ടീന ഭാസ്‌കരൻ, അസിസ്റ്റന്റ് ഡയറക്ടർ അജി, ജെമി ജോസഫ്, ത്രിതലപഞ്ചായത്ത് അംഗങ്ങൾ, ഉദ്യോഗസ്ഥർ തുടങ്ങിയവർ പങ്കെടുത്തു.