തലസ്ഥാനത്ത് മദ്യപാനത്തിനിടെ സുഹൃത്തിനെ കുത്തിക്കൊല്ലാന് ശ്രമിച്ച കേസ്... ഒന്നാം പ്രതി മലയന് ദിലീപിന് ജാമ്യമില്ല
തലസ്ഥാനത്ത് മദ്യപാനത്തിനിടെ സുഹൃത്തിനെ കുത്തിക്കൊല്ലാന് ശ്രമിച്ച കേസില് ഒന്നാം പ്രതി മലയന് ദിലീപിന് ജാമ്യമില്ല. ഫെബ്രുവരി 9 മുതല് കസ്റ്റഡിയില് കഴിയുന്ന പ്രതിക്കാണ് തിരുവനന്തപുരം പ്രിന്സിപ്പല് ജില്ലാ സെഷന്സ് കോടതി ജാമ്യം നിഷേധിച്ചത്. ആരോപണം ഗൗരവമേറിയതാണെന്നും കുറ്റകൃത്യം കാഠിന്യമേറിയതാണെന്നും നിരീക്ഷിച്ചാണ് പ്രിന്സിപ്പല് ജില്ലാ സെഷന്സ് ജഡ്ജി പി. വി. ബാലകൃഷ്ണന് പ്രതിക്ക് ജാമ്യം നിരസിച്ചത്. അന്വേഷണം പുരോഗമിക്കുന്ന കേസില് പ്രതിക്ക് ജാമ്യം നല്കി സ്വതന്ത്രനാക്കിയാല് തെളിവു നശിപ്പിക്കുവാനും സാക്ഷികളെ സ്വാധീനിച്ചോ ഭീഷണിപ്പെടുത്തിയോ മൊഴി തിരുത്താനും സാധ്യതയുണ്ട്. ശിക്ഷ ഭയന്ന് പ്രതി ഒളിവില് പോകാനും സാധ്യതയുണ്ട്. അപ്രകാരം സംഭവിച്ചാല് വിചാരണ ചെയ്യാന് പ്രതിയെ ലഭിക്കാത്ത സാഹചര്യം സംജാതമാകുമെന്നും വിലയിരുത്തിയാണ് ജാമ്യഹര്ജി തള്ളിയത്.
രണ്ടാം പ്രതിയുടെ ജാമ്യ ഹര്ജി നേരത്തേ തിരുവനന്തപുരം അഡീ. ചീഫ് ജുഡീഷ്യല് മജിസ്ട്രേറ്റ് എല്സാ കാതറിന് തള്ളിയിരുന്നു.
ഉള്ളൂരില് മലയന് ദിലീപിന്റെയും സന്തോഷിന്റെയും കുത്തേറ്റ മദ്ധ്യവയസ്കനെ ഗുരുതരാവസ്ഥയില് മെഡിക്കല് കോളേജ് ആശുപത്രിയില് പ്രവേശിപ്പിച്ച സംഭവത്തിലാണ് കോടതി ഉത്തരവ്. രണ്ടാം പ്രതി സന്തോഷ് കൃത്യത്തില് ഉള്പ്പെട്ടിട്ടില്ലെന്നും ആകയാല് സന്തോഷിനെതിരെ പരാതിയില്ലെന്നും കാട്ടി, സ്റ്റേഷനില് പരാതിപ്പെട്ട യുവതി, കോടതിയില് സമര്പ്പിച്ച സത്യവാങ്മൂലം തള്ളിക്കൊണ്ടാണ് കോടതി ജാമ്യം നിരസിച്ചത്.ഫെബ്രുവരി 9 മുതല് പ്രതികള് കസ്റ്റഡിയിലാണ്.
മെഡിക്കല് കോളേജ് ഇളങ്കാവില് ലെയിന് വിളയില് വീട്ടില് സന്തോഷ് കുമാറിനെ (47) കുത്തിപ്പരിക്കേല്പിച്ച കേസില് മുദാക്കല് ഇളംപാലം മംഗലത്ത് വീട്ടില് മലയന് ദിലീപ് (50) , മുട്ടട ശിവശക്തി ഭവനില് സന്തോഷ് (54) എന്നിവരാണ് പിടിയിലായത്. 2024 ഫെബ്രുവരി 9 പുലര്ച്ചെ ഒന്നോടെയായിരുന്നു സംഭവം. സംഭവത്തെക്കുറിച്ച് പൊലീസ് റിപ്പോര്ട്ടില് പറയുന്നത് : ഇളങ്കാവ് ലെയ്നിലെ ആളൊഴിഞ്ഞ വീട്ടിലിരുന്ന് ഇവര് മദ്യപിക്കുന്നതിനിടെയുണ്ടായ തര്ക്കമാണ് ആക്രമണത്തില് കലാശിച്ചത്.
കുത്തേറ്റ് സന്തോഷ് കുമാറിന്റെ കുടല് പുറത്തുവന്ന നിലയിലായിരുന്നു. ആക്രമണശേഷം സുഹൃത്തുക്കള് തന്നെയാണ് ഇയാളെ മെഡിക്കല് കോളേജ് ആശുപത്രിയിലെ അത്യാഹിത വിഭാഗത്തില് പ്രവേശിപ്പിച്ചത്. അടിയന്തര ശസ്ത്രക്രിയയ്ക്കു ശേഷം തീവ്ര പരിചരണ വിഭാഗത്തില് കഴിയുകയാണ്.
"
https://www.facebook.com/Malayalivartha