രണ്ടും കല്പ്പിച്ച് മോദി... വ്യവസായികളായ അദാനിയില് നിന്നും അംബാനിയില് നിന്നും കോണ്ഗ്രസിന് ലോറി നിറയെ കള്ളപ്പണം ലഭിച്ചോയെന്ന ചോദ്യമുയര്ത്തി പ്രധാനമന്ത്രി; മോദിയുടെ പരാമര്ശം ആയുധമാക്കി കോണ്ഗ്രസ്; അന്വേഷണം നടത്താന് വെല്ലുവിളി
രാജ്യത്ത് തെരഞ്ഞെടുപ്പ് പ്രചാരണം ശക്തിപ്പെടുന്തോറും കോണ്ഗ്രസിനെതിരെ ആഞ്ഞടിച്ച് പ്രധാനമന്ത്രി നരേന്ദ്ര മോദി. വ്യവസായികളായ അദാനിയില് നിന്നും അംബാനിയില് നിന്നും കോണ്ഗ്രസിന് ലോറി നിറയെ കള്ളപ്പണം ലഭിച്ചോയെന്ന ചോദ്യമുയര്ത്തി പ്രധാനമന്ത്രി രംഗത്തെത്തിയത്.
അതേസമയം പ്രധാനമന്ത്രി നടത്തിയ പരാമര്ശത്തെ ആയുധമാക്കി കോണ്ഗ്രസ്. ഇക്കാര്യത്തില് സ്വന്തം ഏജന്സികളായ ഇ.ഡിയെയും സിബിഐയെയും ഉപയോഗിച്ച് അന്വേഷണം നടത്താന് മോദിയെ കോണ്ഗ്രസ് വെല്ലുവിളിച്ചു. രാജ്യത്തിന്റെ പ്രധാനമന്ത്രി ഇത്രയും ദുര്ബലനോ നിസ്സഹായനോ ആയ അവസ്ഥ മുന്പുണ്ടായിട്ടില്ലെന്നും കോണ്ഗ്രസ് വക്താവ് സുപ്രിയ ശ്രീനട്ടെ പറഞ്ഞു.
മോദിയും സുഹൃത്തുക്കളും നടത്തുന്ന അഴിമതിയെക്കുറിച്ചാണ് കഴിഞ്ഞ 10 വര്ഷമായി രാഹുല് ഗാന്ധി പറയുന്നതെന്നും അവര് പറഞ്ഞു. അംബാനിയും അദാനിയും ലോറികളില് പണം ഒരു രാഷ്ട്രീയ പാര്ട്ടിക്ക് നല്കിയെന്ന പ്രധാനമന്ത്രിയുടെ പരാമര്ശത്തില് ഇരുവര്ക്കുമെതിരെ കേന്ദ്ര ഏജന്സിയുടെ അന്വേഷണം വേണമെന്ന് സിപിഐ സംസ്ഥാന സെക്രട്ടറി ബിനോയ് വിശ്വം ആവശ്യപ്പെട്ടു. ആവശ്യമുന്നയിച്ചു ബിനോയ് വിശ്വം മോദിക്ക് കത്തെഴുതി.
തെലങ്കാനയിലെ കരിംനഗറിലെ തിരഞ്ഞെടുപ്പു പ്രചാരണ യോഗത്തില് പ്രസംഗിക്കവേയാണ് മോദി തനിക്കെതിരെ ഉയര്ന്ന അംബാനി, അദാനി ബന്ധം കോണ്ഗ്രസിനെതിരെ തിരിച്ചുവിടാന് ശ്രമിച്ചത്.
കോണ്ഗ്രസ് അധികാരത്തില് വന്നാല് കായിക താരങ്ങളെ തിരഞ്ഞെടുക്കുമ്പോള് ന്യൂനപക്ഷങ്ങള്ക്ക് മുന്ഗണന ലഭിക്കുമെന്നും ക്രിക്കറ്റ് ടീം തിരഞ്ഞെടുപ്പ് മതത്തിന്റെ അടിസ്ഥാനത്തിലായിരിക്കുമെന്നും മോദി ആരോപണമുയര്ത്തി.
താന് ജീവിച്ചിരിക്കുന്നിടത്തോളം കാലം കപട മതനിരപേക്ഷത വിജയിക്കാന് അനുവദിക്കില്ല. കശ്മീരിന്റെ പ്രത്യേക പദവി തിരിച്ചുനല്കുന്നത് തടയാനും രാമക്ഷേത്രത്തിന് 'ബാബറി പൂട്ട്' വീഴാതിരിക്കാനും ആണ് 400 സീറ്റ് ആവശ്യപ്പെടുന്നത്. താന് മുസ്ലിംകള്ക്കോ ഇസ്ലാമിനോ എതിരല്ല. ഭരണഘടന എഴുതിയുണ്ടാക്കിയതില് അംബേദ്കറിന് കാര്യമായ പങ്കില്ലെന്ന് കോണ്ഗ്രസ് പറഞ്ഞതായും മോദി ആരോപിച്ചു.
പ്രധാനമന്ത്രി നരേന്ദ്ര മോദിയടക്കമുള്ള ബിജെപി നേതാക്കളുടെ വര്ഗീയ, വിദ്വേഷ പ്രചാരണത്തിനെതിരെ ഇന്ത്യാസഖ്യത്തിന്റെ നേതാക്കള് കേന്ദ്ര തിരഞ്ഞെടുപ്പ് കമ്മിഷനെ കാണും. അതേസമയം പെരുമാറ്റച്ചട്ടം ലംഘിച്ചുവെന്ന പരാതിയില് തിരഞ്ഞെടുപ്പു കമ്മിഷന് നല്കിയ നോട്ടിസിന് കോണ്ഗ്രസ് മറുപടി നല്കി.
തിരഞ്ഞെടുപ്പിന് പ്രഖ്യാപിച്ചതിനു ശേഷം രാഹുല് ഗാന്ധി അദാനിയെയും-അംബാനിയെയും അക്രമിക്കുന്നത് നിര്ത്തിയെന്ന പ്രധാനമന്ത്രി നരേന്ദ്ര മോദിയുടെ ആക്ഷേപത്തിനു പിന്നാലെ മോദി-അദാനി ബന്ധം വീണ്ടും ഉന്നയിച്ച് കോണ്ഗ്രസ് നേതാവ് രാഹുല് ഗാന്ധി.
മോദി അധികാരത്തില്വന്ന് പത്തു വര്ഷത്തിനിടെ തുറമുഖങ്ങള്, വിമാനത്താവളങ്ങള്, പ്രതിരോധ കരാറുകള് തുടങ്ങി നിരവധി അടിസ്ഥാന സൗകര്യപദ്ധതികള് അദാനിക്ക് നല്കിയെന്നായിരുന്നു രാഹുലിന്റെ ആരോപണം. ഇന്ത്യ സംഖ്യം തിരഞ്ഞെടുക്കപ്പെട്ടാല് അടുത്ത ഓഗസ്റ്റ് 15-നുള്ളില് 30 ലക്ഷം ഒഴിവുകള് നികത്തുമെന്നും രാഹുല് പറഞ്ഞു. തെലങ്കാനയിലെ മെഡക് ലോക്സഭാ മണ്ഡലത്തില്നടന്ന തിരഞ്ഞെടുപ്പ് റാലിക്കിടെയാണ് മോദി- അദാനി ബന്ധത്തെ രാഹുല് വിമര്ശിച്ചത്.
രാജ്യത്ത് 20-22 പേര്ക്കുവേണ്ടി മാത്രമാണ് പ്രധാനമന്ത്രി പ്രവര്ത്തിച്ചതെന്നും അവരെ ശതകോടീശ്വരന്മാരാക്കിയെന്നും രാഹുല് ആരോപിച്ചു. രാഷ്ട്രീയം മുഴുവനും 22-25 ആളുകള്ക്ക് വേണ്ടിയാകണമെന്നാണ് മോദി ആഗ്രഹിക്കുന്നതെന്നും രാഹുല് ആരോപിച്ചു. നരേന്ദ്ര മോദി ജി അദാനിയെപ്പോലുള്ള ആളുകള്ക്കുവേണ്ടി പ്രവര്ത്തിച്ചു. 10 വര്ഷക്കാലം നരേന്ദ്ര മോദി രാജ്യത്തെ വിമാനത്താവളങ്ങള്, തുറമുഖങ്ങള്, അടിസ്ഥാന സൗകര്യങ്ങള്, പ്രതിരോധ വ്യവസായം തുടങ്ങി എല്ലാം അദാനിക്ക് നല്കി. കോടിക്കണക്കിന് യുവാക്കളെ തൊഴില്രഹിതരാക്കി, അദാനിക്കുവേണ്ടി നോട്ട് നിരോധനവും ജിഎസ്ടിയും നടപ്പാക്കി, രാഹുല് ആരോപിച്ചു.
ജൂണ് നാലിന് ലോക്സഭാ തിരഞ്ഞെടുപ്പ് ഫലം പുറത്തുവരുമ്പോള് ഇന്ത്യ സഖ്യം സര്ക്കാര് രൂപവത്കരിക്കുമെന്ന് ആത്മവിശ്വാസം പ്രകടിപ്പിച്ച രാഹുല്, ഓഗസ്റ്റ് 15 നകം കേന്ദ്ര സര്ക്കാരിന്റെ കീഴിലുള്ള 30 ലക്ഷം തൊഴില് ഒഴിവുകള് നികത്താനുള്ള നടപടികള് പുതിയ സര്ക്കാര് ആരംഭിക്കുമെന്ന് വാഗ്ദാനവും നല്കി.
"
https://www.facebook.com/Malayalivartha