വിജിലന്‍സ് കോടതി വിധിക്കെതിരെ നാളെ അപ്പീല്‍ ഫയല്‍ ചെയ്യും. മുഖ്യമന്ത്രിയും മന്ത്രി ആര്യാടന്‍ മുഹമ്മദും വ്യക്തിപരമായി അപ്പീല്‍ ഫയല്‍ ചെയ്യും. ഇന്നു വൈകുന്നേരം കൊച്ചിയില്‍ ചേര്‍ന്ന മുതിര്‍ന്ന നേതാക്കളുടെ യോഗത്തിലാണ് തീരുമാനം. സര്‍ക്കാരിനു നിലവില്‍ പ്രതിസന്ധിയില്ലെന്ന് മന്ത്രി കെ.സി.ജോസഫ് വ്യക്തമാക്കി. ഏത് അന്വേഷണവും നേരിടാന്‍ ഭയമില്ലെന്ന് മന്ത്രി ആര്യാടന്‍ മുഹമ്മദും അറിയിച്ചു. കൂടാതെ, വിവാദങ്ങള്‍ ചര്‍ച്ച ചെയ്യാന്‍ അടിയന്തര യുഡിഎഫ് യോഗം ചേരാന്‍ സാധ്യതയുണ്ടെന്നും റിപ്പോര്‍ട്ടുകളുണ്ട്.
അതേസമയം, സോളര്‍ കേസില്‍ മുഖ്യമന്ത്രി ഉമ്മന്‍ ചാണ്ടിക്ക് ഹൈക്കമാന്‍ഡിന്റെ പൂര്‍ണ്ണപിന്തുണ ലഭിച്ചു. നിലവിലെ സാഹചര്യത്തില്‍ അദ്ദേഹം രാജിവയ്‌ക്കേണ്ട സാഹചര്യമില്ലെന്ന് എഐസിസി വ്യക്തമാക്കി. സോളര്‍ കേസില്‍ ഒരു രൂപ പോലും സര്‍ക്കാരിന് നഷ്ടം ഉണ്ടായിട്ടില്ല. കേരളത്തില്‍ തിരഞ്ഞെടുപ്പ് അടുത്തുവരികയാണ്. ഇനിയും കൂടുതല്‍ ആരോപണങ്ങള്‍ ഉണ്ടാകാനാണ് സാധ്യത. കോണ്‍ഗ്രസ് പാര്‍ട്ടിയിലെ ആരും സോളര്‍ കേസില്‍ ഒരു രൂപ പോലും കൈക്കൂലിയായി വാങ്ങിയിട്ടില്ല.
സോളര്‍ കമ്മിഷനെ നിയോഗിച്ചതുപോലും മുഖ്യമന്ത്രിയാണ്. ഇത്തരത്തില്‍ അന്വേഷണത്തിന് ആവശ്യമായ സാഹചര്യം ഒരുക്കിയതും അദ്ദേഹം തന്നെയാണ്. അതിനാല്‍ ഉത്തരവ് അനുസരിച്ചുള്ള നിയമ നടപടിയുമായി മുന്നോട്ടു പോകുമെന്നും എഐസിസി മാധ്യമ വിഭാഗം തലവന്‍ രണ്‍ദീപ് സിങ് സുര്‍ജേവാല പറഞ്ഞു.
രാജിവയ്ക്കില്ലെന്നും ഏത് അന്വഷണവും നേരിടാന്‍ തയാറാണെന്നും ഉമ്മന്‍ ചാണ്ടിയും പ്രതികരിച്ചിരുന്നു. ധാര്‍മികതയ്ക്കും അപ്പുറമാണു മനസാക്ഷിയെന്ന് അദ്ദേഹം മാധ്യമങ്ങളോടു പ്രതികരിച്ചു. തെറ്റു ചെയ്തിട്ടില്ലെന്ന മനസാക്ഷിയുടെ ശക്തിയാണു തന്റെയും ആര്യാടന്‍ മുഹമ്മദിന്റെയും ശക്തിയെന്നു മുഖ്യമന്ത്രി പറഞ്ഞു. തനിക്കും ആര്യാടനുമെതിരെ എഫ്‌ഐആര്‍ രജിസ്റ്റര്‍ ചെയ്ത് അന്വേഷണം നടത്തണമെന്ന തൃശൂര്‍ വിജിലന്‍സ് കോടിതിയുടെ ഉത്തരവിന്റെ പശ്ചാത്തലത്തില്‍ മാധ്യമങ്ങളോടും പ്രതികരിക്കുകയായിരുന്നു അദ്ദേഹം.
സോളര്‍ കമ്മിഷനു മുന്നില്‍ 14 മണിക്കൂര്‍ ചോദ്യങ്ങള്‍ക്കു മറുപടി പറഞ്ഞപ്പോള്‍ ഒരു ചോദ്യം പോലും ചോദിക്കാതിരുന്ന വക്കീലിന്റെ കക്ഷിയാണ് ഇപ്പോള്‍ ആരോപണം ഉന്നയിച്ചിരിക്കുന്നത്. വിജിലന്‍സ് കോടതിയുടെ നിര്‍ദേശത്തിന്റെ അടിസ്ഥാനത്തില്‍ രാജിവയ്ക്കുമോ എന്നു ചോദിച്ചപ്പോള്‍ എന്തിന്? എന്നായിരുന്നു മുഖ്യമന്ത്രിയുടെ മറുചോദ്യം. മന്ത്രി കെ. ബാബുവിന് എതിരായ വിജിലന്‍സ് കോടതി നടപടി ഹൈക്കോടതി സ്‌റ്റേചെയ്ത കാര്യം മുഖ്യമന്ത്രി സൂചിപ്പിക്കുകയും ചെയ്തു. എല്ലാ കാര്യങ്ങളും ഹൈക്കമാന്‍ഡും ഘടകകക്ഷികളുമായി കൂടിയാലോചിച്ചു ചെയ്യുമെന്നു മുഖ്യമന്ത്രി വ്യക്തമാക്കി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha