പാലക്കാട് ചിറ്റൂരില്‍ ബസ് സ്‌റ്റോപ്പിനുസമീപം കിടന്നുറങ്ങുകയായിരുന്ന നാടോടി യുവതി നിയന്ത്രണം വിട്ട് മറിഞ്ഞ ലോറിക്കടിയില്‍പ്പെട്ട് മരിച്ചു.നാട്ടികയില്‍ റോഡില്‍ ഉറങ്ങിക്കിടന്ന അഞ്ച് നാടോടികള്‍ ലോറി പാഞ്ഞുകയറി ചതഞ്ഞരഞ്ഞതിന്റെ നടുക്കം മാറുംമുമ്പേയാണ് ഈ അപകടം.

മൈസൂരൂ സ്വദേശി പാര്‍വതിക്കാണ് (30) ദാരുണാന്ത്യം. കൂടെയുണ്ടായിരുന്ന മൂന്നുപേരെ പരിക്കുകളോടെ പാലക്കാട് ജില്ലാ ആശുപത്രിയില്‍ പ്രവേശിപ്പിച്ചു. ലോറി െ്രെഡവര്‍ കുമരനല്ലൂര്‍ സ്വദേശി അജിത്തിനെ ( 32) മനപ്പൂര്‍വമല്ലാത്ത നരഹത്യക്ക് അറസ്റ്റുചെയ്തു. അഞ്ചുദിവസം മുമ്പാണ് നാലംഗസംഘം മൈസുരുവില്‍ നിന്ന് ഇവിടെ എത്തിയത്.



പഴനിയില്‍ നിന്ന് എടപ്പാളിലേക്ക് കോഴിയുമായി പോകുകയായിരുന്ന ലോറി സമീപത്തെ മരങ്ങളിലും കടമുറിയിലും ഇടിച്ച് മറിയുകയായിരുന്നു. പാര്‍വ്വതിയുടെ അരയ്ക്ക് മുകളിലോട്ട് ലോറിക്കടിയിലായി.

ചിറ്റൂരില്‍ നിന്നെത്തിച്ച ക്രെയിന്‍ ഉപയോഗിച്ച് ലോറി ഉയര്‍ത്തിയാണ് പാര്‍വ്വതിയുടെ മൃതദേഹം മാറ്റിയത്. ലോറിയുടെ ബോഡിയും ഷാസിയും വേര്‍പെട്ട നിലയിലായിരുന്നു.പാര്‍വതിക്ക് സമീപം ഉറങ്ങുകയായിരുന്ന സാവിത്രി (55), കൃഷ്ണന്‍ (65), മനോജ് (42) എന്നിവര്‍ക്കാണ് പരിക്കേറ്റത്. ഡ്രൈവര്‍ ഉറങ്ങിയതാവാം അപകട കാരണമായതെന്നാണ് നിഗമനത്തിലുള്ളത്.