ഭാര്യ യാത്ര ചെയ്ത കാറിന് പെട്രോള്‍ ഒഴിച്ച് തീയിട്ട് ഭാര്യയെ കൊലപ്പെടുത്തി. കൊട്ടിയം തഴുത്തല സ്വദേശി അനില(44)യാണ് മരിച്ചത്. അനിലയ്‌ക്കൊപ്പം കാറിലുണ്ടായിരുന്ന സോണി എന്ന യുവാവ് പൊള്ളലേറ്റ് ജില്ലാ ആശുപത്രിയില്‍ ചികിത്സയിലാണ്. കൊല്ലം റെയില്‍വേ സ്റ്റേഷന് സമീപത്തുള്ള ചെമ്മാന്‍മുക്കില്‍ വച്ച് ഇന്ന് രാത്രി 9 മണിയോടെയാണ് സംഭവം. അനിലയുടെ ഭര്‍ത്താവ് പത്മരാജന്‍ കൊല്ലം ഈസ്റ്റ് പൊലീസില്‍ കീഴടങ്ങി. സംഭവത്തില്‍ ഈസ്റ്റ് പൊലീസ് അന്വേഷണം ആരംഭിച്ചു. തീപിടുത്തത്തില്‍ രണ്ട് വാഹനങ്ങളും കത്തി നശിച്ചു.

അനിലയും സോണിയും സഞ്ചരിച്ചിരുന്ന കാറിനെ മറ്റൊരു വാഹനത്തില്‍ എത്തിയ പത്മരാജന്‍ തടഞ്ഞു. തുടര്‍ന്ന് പുറത്തിറങ്ങിയ പത്മരാജന്‍ കാറിന് നേര്‍ക്ക് പെട്രോള്‍ ഒഴിച്ച് തീകൊളുത്തുകയായിരുന്നുവെന്ന് ദൃക്‌സാക്ഷികള്‍ പറയുന്നു. ''ഒരാള്‍ ഓമ്‌നിയില്‍ വന്ന് കാര്‍ തടഞ്ഞ് നിര്‍ത്തുന്നതാണ് കണ്ടത്. തുടര്‍ന്ന് കാറിലേക്ക് എന്തോ എറിയുന്നതും കണ്ടു. പൊടുന്നനെ എന്തോ പൊട്ടിത്തെറിച്ചു.

ഉടനെ കാറില്‍ നിന്ന് ഒരു പുരുഷന്‍ പുറത്തേക്ക് ഇറങ്ങി ഓടി. ഇയാളുടെ ഒരു വശം മുഴുവന്‍ പൊള്ളിയിരുന്നു. കാറിലുണ്ടായിരുന്ന സ്ത്രീ സംഭവസ്ഥലത്ത് വച്ച് തന്നെ പൊള്ളലേറ്റ് മരിച്ചു. അപകടമെന്നാണ് ആദ്യം വിചാരിച്ചത്. അടുത്തുള്ള വീടുകളിലേക്ക് ഞങ്ങള്‍ വെള്ളത്തിനായി ഓടി.''

അനില കൊല്ലം ആശ്രാമത്ത് ബേക്കറി കടയുടെ ഉടമസ്ഥയാണ്. പൊള്ളലേറ്റ് ചികിത്സയില്‍ കഴിയുന്ന സോണി ഈ ബേക്കറിയിലെ ജീവനക്കാരനാണ്. യുവതിയുടെ സുഹൃത്തായ മറ്റൊരാളെ ലക്ഷ്യമിട്ടാണ് പത്മരാജന്‍ ആക്രമണം നടത്തിയതെന്നാണ് സൂചന. സംഭവത്തിന് പിന്നാലെ ഓട്ടോയില്‍ പത്മരാജന്‍ ഈസ്റ്റ് പൊലീസില്‍ എത്തി കീഴടങ്ങുകയായിരുന്നു.