കസ്തൂരിരംഗന് വിഷയത്തില് കേരളത്തിന്റെ റിപ്പോര്ട്ട് കേന്ദ്രം തള്ളി, മലയോര കര്ഷകര് ആശങ്കയില്
കസ്തൂരിരംഗന് വിഷയത്തില് കേരളത്തിന്റെ റിപ്പോര്ട്ട് കേന്ദ്ര വനംപരിസ്ഥിതിമന്ത്രാലയം തള്ളിയതോടെ മലയോര കര്ഷകര് ആശങ്കയില്. ജനവാസകേന്ദ്രങ്ങളും കൃഷിയിടങ്ങളും തോട്ടങ്ങളും ഒഴിവാക്കി, സംരക്ഷണപ്രദേശങ്ങളും വനപ്രദേശവും മാത്രം പരിസ്ഥിതി ദുര്ബലപ്രദേശമായി (ഇഎസ്എ) പ്രഖ്യാപിക്കണമെന്ന കേരളത്തിന്റെ ആവശ്യമാണ് തള്ളിയത്.
ഇഎസ്എയുടെ അടിസ്ഥാനയൂണിറ്റ് ഗ്രാമമാണെന്നും അത് മാറ്റാന് കഴിയില്ലെന്നും ഇതുമാറ്റുന്നത് പശ്ചിമഘട്ടസംരക്ഷണമെന്ന ഉദ്ദേശ്യത്തെ ചോദ്യംചെയ്യലാകുമെന്നുമാണ് കേന്ദ്രനിലപാട്. ഒരു ഗ്രാമത്തില്ത്തന്നെ പരിസ്ഥിതിദുര്ബലപ്രദേശവും പരിസ്ഥിതി ദുര്ബലമല്ലാത്ത പ്രദേശവും എന്ന സമീപനം പറ്റില്ലെന്നും വനവിസ്തൃതി സംബന്ധിച്ച് കേരളത്തിന്റെ റിപ്പോര്ട്ടില് പാകപ്പിഴകളുണ്ടെന്നും പരിസ്ഥിതി മന്ത്രാലയം ചൂണ്ടിക്കാട്ടിയിട്ടുണ്ട്.
സംസ്ഥാന സര്ക്കാര് വരുത്തിയ പിഴവാണ് കേരളം നല്കിയ കസ്തൂരിരംഗന് റിപ്പോര്ട്ട് തള്ളാന് കാരണം. റിപ്പോര്ട്ടിലെ അശാസ്ത്രീയതകളും അവ്യക്തതകളും നേരത്തെ വിദഗ്ധര് ചൂണ്ടിക്കാണിച്ചെങ്കിലും ചെവിക്കൊള്ളാത്തതാണ് തിരിച്ചടി നേരിടാന് കാരണം. സംസ്ഥാന ജൈവവൈവിധ്യബോര്ഡ് ചെയര്മാന് പ്രൊഫ. ഉമ്മന് വി ഉമ്മന് സമിതി കേന്ദ്രത്തിനുനല്കിയ റിപ്പോര്ട്ടില് തെറ്റുണ്ടെന്ന് അന്നേ വിമര്ശനമുയര്ന്നിരുന്നു. ജനവാസകേന്ദ്രങ്ങളും തോട്ടങ്ങളും കൃഷിയിടങ്ങളും ഇഎസ്എയില് ഉള്പ്പെടുത്താനുള്ള കേന്ദ്രസര്ക്കാര് നീക്കം കേരളത്തിലെ മലയോരമേഖലയിലെ കര്ഷകരെ ദുരിതത്തിലാക്കും. ഇവരുടെ ആശങ്കകള് ശരിവയ്ക്കുന്ന തരത്തിലാണ് കേന്ദ്രതീരുമാനം. വനംഭൂമിയും കൃഷിഭൂമിയും തരംതിരിക്കാതെയാണ് റിപ്പോര്ട്ട് നല്കിയത്.
വനാതിര്ത്തികള് നിര്ണയിച്ച് വില്ലേജടിസ്ഥാനത്തില് കൃത്യമായ ഭൂപടവും റിപ്പോര്ട്ടും നല്കിയാല് ഇഎസ്എയില്നിന്ന് കൃഷിയിടങ്ങളെയും ജനവാസകേന്ദ്രങ്ങളെയും ഒഴിവാക്കാമെന്ന് നേരത്തെ കേന്ദ്രമന്ത്രി പ്രകാശ് ജാവേദ്ക്കര് ലോക്സഭയില് സിപിഐ എം അംഗങ്ങള്ക്ക് ഉറപ്പുനല്കി. ഇതുപ്രയോജനപ്പെടുത്താന് സര്ക്കാര് കാണിച്ച അലംഭാവമാണ് ഇപ്പോഴുള്ള തിരിച്ചടിക്ക് കാരണം. ഗോവയില് 91 വില്ലേജുകളെ സര്ക്കാര് ഇടപെട്ട് ഇഎസ്എയില്നിന്നും ഒഴിവാക്കി. കേരളത്തിലെ 119 വില്ലേജുകളിലെ പതിനായിരക്കണക്കിന് കര്ഷകരെ സര്ക്കാര് അവഗണിച്ചു. കേരളം നല്കിയ റിപ്പോര്ട്ടില് 119 വില്ലേജുകളില് തോടും പുഴയും റോഡും പാറകളും അരുവികളും ഇഎസ്എയായി രേഖപ്പെടുത്തിയാണ് നല്കിയത്. ഇതുകേന്ദ്രം അംഗീകരിക്കില്ല. ഒരു വില്ലേജിനുള്ളില് ഇഎസ്എയും കൃഷിഭൂമിയും ഒരേസമയം ഉണ്ടാകാന് പാടില്ലെന്ന കേന്ദ്രനിര്ദേശം അറിഞ്ഞിട്ടും സംസ്ഥാന സര്ക്കാര് റിപ്പോര്ട്ട് നല്കി. കസ്തൂരിരംഗന് ശുപാര്ശകള് നടപ്പാക്കുന്നതുമായി ബന്ധപ്പെട്ട് മന്ത്രാലയം കഴിഞ്ഞ സെപ്തംബറിലാണ് പുതിയ കരടുവിജ്ഞാപനം ഇറക്കിയത്. ഈ വിജ്ഞാപനത്തിന്മേലുള്ള കേരളത്തിന്റെ നിര്ദേശമാണിപ്പോള് കേന്ദ്രം തള്ളിയത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
