ബംഗാളില് പുകഞ്ഞ് സിപിഐ (എം); കേരള ഘടകം കോണ്ഗ്രസുമായുള്ള സഖ്യത്തെ എതിര്ക്കും
സിപിഐ(എം) ബംഗാളില് കോണ്ഗ്രസുമായി അടുക്കുന്നത് കേരളത്തില് ആര്ക്ക് ഗുണം ചെയ്യും. സിപിഎമ്മും കോണ്ഗ്രസും പറയുന്നത് ബിജെപിക്ക് ഗുണകരമാകുമെന്നാണ്. അതിനാല് ഈ സഖ്യത്തെ രണ്ട് കൂട്ടരും എതിര്ക്കുന്നു. ഇതിനെ കോണ്ഗ്രസിലെ ഒരു വിഭാഗം അനുകൂലിക്കുന്നുമുണ്ട്. കോണ്ഗ്രസുമായുള്ള സിപിഎമ്മിന്റെ അടുപ്പം കേരളത്തില് ഭരണതുടര്ച്ചയെന്ന ഉമ്മന് ചാണ്ടിയുടെ മോഹത്തെ തുണയക്കുകയേ ഉള്ളൂവെന്നാണ് വിലയിരുത്തല്. കോണ്ഗ്രസിന്റെ വോട്ട് ഇതുമൂലം ചോരില്ല. എന്നാല് സിപിഐ(എം) വോട്ടുകള് ബിജെപി പക്ഷത്തേക്ക് തിരിയും. സിപിഎമ്മിന് മാത്രമാകും അതുകൊണ്ട് ദോഷം. സിപിഐ(എം) വോട്ടുകള് ബിജെപി പാളയത്തിലെത്തുമ്പോള് യുഡിഎഫിന് മികച്ച ഭൂരിപക്ഷവുമായി അധികാരത്തില് തിരിച്ചെത്താമെന്നാണ് വിലയിരുത്തല്. കേരളത്തിലെ ബിജെപിയുടെ പ്രചരണം സിപിഐ(എം)കോണ്ഗ്രസ് ഒത്തുതീര്പ്പ് രാഷ്ട്രീയം തുറന്നു കാണിച്ച് തന്നെയാകും. ബിജെപിക്ക് ബംഗാളില് ഇരുവരും കൈകോര്ക്കുമെന്ന ഉറപ്പുമുണ്ട്. എന്നാല് സഖ്യം പുറത്തുവന്ന ശേഷമേ ഔദ്യോഗികമായി പ്രതികരിക്കൂ. അതിന് ശേഷം പ്രചരണത്തില് ഈ വിഷയം നിറയ്ക്കും. മലയാളിയുടെ മനസ്സ് പിടിക്കാന് ഏറ്റവും നല്ല ആയുധമാക്കി ബംഗാള് രാഷ്ട്രീയത്തിലെ സഖ്യത്തെ മാറ്റാനാണ് നീക്കം.
സിപിഐ(എം) ബംഗാള് ഘടകമാണ് കോണ്ഗ്രസുമായി സഖ്യത്തിന് ഒരുങ്ങുന്നത്. മമതാ ബാനര്ജി സര്ക്കാരിനെതിരെ ജനാധിപത്യ വിശ്വാസികള് ഒന്നിച്ച് നില്ക്കേണ്ട സമയമാണെന്നും കോണ്ഗ്രസുമായുള്ള സഖ്യം അനിവാര്യമാണെന്നുമാണ് റിപ്പോര്ട്ട് അവതരിപ്പിച്ചുകൊണ്ട് സിപിഐ(എം) സംസ്ഥാന സെക്രട്ടറിയും പ്രതിപക്ഷ നേതാവുമായ സൂര്യകാന്ത് മിശ്ര പറഞ്ഞത്. ചര്ച്ചയില് പങ്കെടുത്ത 54 പേരില് 50 പേരും സഖ്യം വേണമെന്നു വാദിച്ചു. സഖ്യമില്ലെങ്കിലും സീറ്റ് ധാരണയെങ്കിലും വേണമെന്നായിരുന്നു ചുരുക്കം പേരുടെയും അഭിപ്രായം. ഇന്നു യോഗത്തില് സംസ്ഥാന സമിതിയെ മറ്റ് അംഗങ്ങളും അവരുടെ നിലപാട് അറിയിക്കും. പാര്ട്ടി ജനറല് സെക്രട്ടറി സീതാംറാം യച്ചൂരിയും ഇന്ന് സംസാരിക്കുമെന്നാണു സൂചന. സംഘടനാ ചുമതലയുള്ള പിബി അംഗം പ്രകാശ് കാരാട്ട്, തൃപുര മുഖ്യമന്ത്രി മണിക് സര്ക്കാര് എന്നിവരും യോഗത്തില് പങ്കെടുക്കുന്നുണ്ട്.
കേരളാ ഘടകം ഇതിന് എതിര്ക്കുന്നു. സീതാറാം യെച്ചൂരിയാണ് കോണ്ഗ്രസുമായുള്ള മുന്നണിക്ക് ശ്രമിക്കുന്നത്. യെച്ചൂരിയെ എതിര്ക്കുന്ന പ്രകാശ് കാരാട്ട് ഇതിനെ പിന്തുണയ്ക്കുന്നുമില്ല. കേരളവും കാരാട്ടിന് പൂര്ണ്ണ പിന്തുണയുമായുണ്ട്. സിപിഎമ്മിന് ത്രിപുരയില് മാത്രമാണ് നിലവില് ഭരണമുള്ളത്. കേരളത്തില് അധികാരത്തില് എത്താന് സാധ്യത ഏറെയുമാണ്. എന്നാല് ബംഗാളില് ഏറെ പരിതാപകരമാണ് സ്ഥിതി. അങ്ങനെ കൈവിട്ട കളം പിടിക്കാനാണ് കോണ്ഗ്രസുമായി അടുക്കാനുള്ള ശ്രമം. എന്നാല് ഇത് കേരളത്തില് സിപിഎമ്മിന് തിരിച്ചടിയാകും. കോണ്ഗ്രസുമായി ചേര്ന്നാലും ബംഗാള് പിടിക്കാന് കഴിയില്ല. എന്നാല് ഇതിലൂടെ കേരളം കൈവിടുകയും ചെയ്യും. കോണ്ഗ്രസും കമ്മ്യൂണിസ്റ്റും ഒരു മുന്നണിയുടെ ഭാഗമാണെന്ന ബിജെപി വാദത്തിന് അംഗീകാരം കിട്ടുന്നത് സിപിഎമ്മിന് വലിയ തിരിച്ചടിയാണ്.
സിപിഎമ്മിന് ലഭിക്കുന്ന കോണ്ഗ്രസ് വിരുദ്ധ വോട്ടുകള് ബിജെപി സ്വന്തമാക്കുമെന്നാണ് കേരളാ ഘടകത്തിന്റെ നിലപാട്. ഇതിനെ പിണറായി വിജയനും കോടിയേരി ബാലകൃഷ്ണനും വി എസ് അച്യൂതാനന്ദനും അനുകൂലിക്കുന്നു. കേരളത്തിന്റെ സാധ്യതകളെ പ്രതികൂലമായി ബാധിക്കുന്നതൊന്നും ചെയ്യരുതെന്നാണ് ആവശ്യം. കേരളത്തിലും ഭരണം നഷ്ടമായാല് ദേശീയ തലത്തിലെ പ്രസക്തി നഷ്ടമാകുമെന്നാണ് കേരള ഘടകത്തിന്റെ വാദം. എന്നാല് ബംഗാളില് സിപിഐ(എം) നേരിടുന്നത് കടുത്ത പ്രതിസന്ധിയാണ്. തെരഞ്ഞെടുപ്പില് ബിജെപി പ്രധാന രണ്ടാം കക്ഷിയാകുമോ എന്ന ഭയം അവര്ക്കുണ്ട്. ലോക്സഭാ തെരഞ്ഞെടുപ്പിലെ വോട്ടിങ് പാറ്റേര്ണ് അതാണ് സൂചിപ്പിക്കുന്നത്. ഈ സാഹചര്യത്തിലാണ് പുതിയ ചര്ച്ചകള് അവര് നടക്കുന്നത്. കേരളത്തിന് വേണ്ടി ബംഗാളിലെ സിപിഎമ്മിനെ നശിപ്പിക്കാന് പറ്റില്ലെന്നാണ് സൂചന. കോണ്ഗ്രസ് മുന്കൈ എടുത്താല് സഖ്യചര്ച്ചയാകാമെന്നു കഴിഞ്ഞ ദിവസം ചേര്ന്ന ബംഗാളിലെ ഇടതുമുന്നണിയോഗം തീരുമാനിച്ചിരുന്നു. കോണ്ഗ്രസുമായി സഖ്യംവേണമെന്ന് ബംഗാള് ഘടക തീരുമാനിച്ചാലും ചൊവ്വാഴ്ച തുടങ്ങുന്ന പൊളിറ്റ് ബ്യൂറോ, കേന്ദ്രകമ്മിറ്റി യോഗങ്ങളിലാകും അന്തിമ തീരുമാനം ഉണ്ടാകുക. സീതാംറാം യച്ചൂരി ബംഗാള് ഘടകത്തെ അനുകൂലിക്കുമ്പോള് വിശാഖപട്ടണം പാര്ട്ടി കോണ്ഗ്രസിലെ തീരുമാനം അനുസരിച്ച് കോണ്ഗ്രസുമായി ഒരു സഖ്യവും പാടില്ലെന്ന നിലപാടിലാണ് പ്രകാശ് കാരാട്ടും, എസ് രാമചന്ദ്രപിള്ളയും അടക്കമുള്ള ഒരു വിഭാഗം കേന്ദ്രനേതാക്കള്. കോണ്ഗ്രസ് സഖ്യത്തിനെതിരെ സംസ്ഥാന സമിതി യോഗം നടക്കുന്ന അലിമുദ്ദീന് സ്ട്രീറ്റിലെ ഓഫിസിനു പുറത്ത് കോണ്ഗ്രസുമായുള്ള സഖ്യത്തിനെതിരെ പോസ്റ്ററുകള് പ്രത്യക്ഷപ്പെട്ടിരുന്നു.
കേരള നേതാക്കള് ഇവിടെ യെച്ചൂരിയെ ഒറ്റപ്പെടുത്താന് രംഗത്തുണ്ടാകും. സിപിഐ(എം) നേരിടുന്ന ഏറ്റവും വലിയ പ്രതിസന്ധിയാണ് ഇത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
