ആലപ്പുഴ മെഡിക്കല് കോളജില് ക്ളാസിലിരുന്നു സംസാരിച്ചാല് പിഴ
ക്ലാസ്സില് മിണ്ടുന്നവരുടെ പേരെഴുതി വച്ചിട്ട് ക്ലാസ്സ് ടീച്ചര് വരുമ്പോള് അടി വാങ്ങിപ്പിച്ചുകൊടുക്കുന്ന ക്ലാസ്സ് ലീഡര്മാരെ ആവശ്യമുണ്ട്. ആലപ്പുഴ മെഡിക്കല് കോളജിലാണ് ഇപ്പോള് ഇത്തരക്കാരുടെ അത്യാവശ്യം. ക്ലാസില് അച്ചടക്കം ലംഘിക്കുന്നവര്ക്കെതിരെ പിഴശിക്ഷ ഏര്പ്പെടുത്തിയിരിക്കുകയാണ്. 250 രൂപ മുതല് മേലോട്ടാണു പിഴ.
ക്ലാസില് വര്ത്തമാനം പറയുക, കാര്ഡ് ധരിക്കാതെ വരിക തുടങ്ങിയ കുറ്റങ്ങള്ക്കാണു പിഴ ഈടാക്കുക. അയ്യായിരം രൂപവരെ പിഴ ഈടാക്കിയതായി വിദ്യാര്ഥികള് പറഞ്ഞു. അധ്യാപക രക്ഷാകര്തൃസമിതിയുടെ പേരിലാണു പിഴപ്പണം ഈടാക്കുന്നത്. രസീതും നല്കും.
ക്ലാസില് സംസാരിച്ചെന്ന കുറ്റം ആരോപിച്ച് ഒന്നാം വര്ഷ എംബിബിഎസ് വിദ്യാര്ഥികളില്നിന്നു വന് തുക പിഴ ഈടാക്കിയതായി ആക്ഷേപം ഉയര്ന്നതോടെയാണു വിവരം പുറത്തറിഞ്ഞത്. ബയോകെമിസ്ട്രി ക്ലാസില് സംസാരിച്ചവര്ക്കാണു ശിക്ഷ നല്കിയത്. പിഴ ചുമത്തിയിട്ടും അടയ്ക്കാതിരുന്നതിനാല് അധ്യാപിക ഒരാഴ്ച ക്ലാസില് ഹാജരാകാതെ പ്രതിഷേധിച്ചു.
ക്ലാസ് പതിവായി മുടങ്ങുന്ന ഘട്ടമെത്തിയപ്പോള് പിഴ ചുമത്തപ്പെട്ട വിദ്യാര്ഥികളും മറ്റുള്ളവരുമായി വാക്കേറ്റം ഉണ്ടായി. ഒടുവിലാണു പിഴ അടച്ചത്. സാമ്പത്തിക ബുദ്ധിമുട്ട് അനുഭവിക്കുന്ന വിദ്യാര്ഥികളെ സംബന്ധിച്ചിടത്തോളം പിഴ പഠനത്തിനുതന്നെ തടസമായി മാറുന്നുണ്ട്. ചിലര്ക്കു സഹപാഠികള് പിരിവിട്ടാണു പണം നല്കിയത്.
അധ്യാപക രക്ഷാകര്തൃ സമിതി നിര്വാഹകസമിതിയുടെ നിര്ദേശത്തിന്റെ അടിസ്ഥാനത്തിലാണു പിഴയിടല് തുടങ്ങിയതെന്നു പ്രിന്സിപ്പല് ഇന് ചാര്ജ് ഡോ. ശ്രീദേവി പറഞ്ഞു. ക്ലാസില് മൂളിപ്പാട്ടും സംസാരവും തുടര്ച്ചയായതിനാല് വിദ്യാര്ഥികളും രക്ഷിതാക്കളും പരാതിപ്പെട്ടതിനെ തുടര്ന്നാണ് ശിക്ഷാനടപടികള് തുടങ്ങാന് കാരണമെന്നാണു വിശദീകരണം.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha