തിരഞ്ഞെടുപ്പ് ചൂടിലമര്ന്ന പാലക്കാട്ട് യുഡിഎഫ് ക്യാമ്പിനെ ആവേശത്തിലാഴ്ത്തി മെഗാസ്റ്റാര് മമ്മൂട്ടിയുടെ അപ്രതീക്ഷിത എന്ട്രി
തിരഞ്ഞെടുപ്പ് ചൂടിലമര്ന്ന പാലക്കാട്ട് യുഡിഎഫ് ക്യാമ്പിനെ ആവേശത്തിലാഴ്ത്തി മെഗാസ്റ്റാര് മമ്മൂട്ടിയുടെ അപ്രതീക്ഷിത എന്ട്രി. പാലക്കാട് മണ്ഡലത്തിലെ യുഡിഎഫ് സ്ഥാനാര്ത്ഥിയും നടനുമായ രമേശ് പിഷാരടി നാമനിര്ദ്ദേശ പത്രിക സമര്പ്പിക്കാന് തയ്യാറെടുക്കുന്നതിനിടെയാണ് ആശംസകളുമായി മമ്മൂട്ടി വീഡിയോ കോളിലെത്തിയത്.
നാമനിര്ദ്ദേശ പത്രിക സമര്പ്പിക്കുന്നതിന് മുന്നോടിയായി സ്ഥാനാര്ത്ഥി രമേശ് പിഷാരടിയെ ഷാഫി പറമ്പില് എംപി ഷാള് അണിയിച്ച് സ്വീകരിച്ചിരുന്നു. ഇതിന് പിന്നാലെ പ്രവര്ത്തകര്ക്കിടയില് ആവേശം പങ്കുവെച്ചു നില്ക്കുമ്പോഴാണ് മമ്മൂട്ടിയുടെ വീഡിയോ കോള് എത്തുന്നത്. ഫോണ് സ്ക്രീനില് തന്റെ പ്രിയതാരത്തെ കണ്ടതോടെ പ്രവര്ത്തകര് ആര്പ്പുവിളികളോടെയും കൈവീശിയും മമ്മൂട്ടിയെ എതിരേറ്റു.
തനിക്ക് ചുറ്റും തടിച്ചുകൂടിയ വന് ജനസാഗരത്തെ പിഷാരടി ഫോണ് ഉയര്ത്തിപ്പിടിച്ച് മമ്മൂട്ടിക്ക് കാണിച്ചുകൊടുത്തു. സ്ക്രീനിലൂടെ പ്രവര്ത്തകരെ കണ്ട മമ്മൂട്ടി തിരിച്ച് കൈവീശി കാണിക്കുകയും പിഷാരടിക്ക് വിജയശംസകള് നേരുകയും ചെയ്തു.
സിനിമാ ലോകത്തെ ഉറ്റ സുഹൃത്തുക്കള് കൂടിയായ മമ്മൂട്ടിയും രമേശ് പിഷാരടിയും തമ്മിലുള്ള ഈ ആത്മബന്ധം വോട്ടര്മാര്ക്കിടയിലും വലിയ ചര്ച്ചയാവുകയാണ്. പത്രിക സമര്പ്പണത്തിന് തൊട്ടുമുന്പ് ലഭിച്ച ഈ 'മെഗാ' പിന്തുണ പിഷാരടിക്കും യുഡിഎഫ് പ്രവര്ത്തകര്ക്കും വലിയ ഊര്ജ്ജമാണ് നല്കിയിരിക്കുന്നത്. വീഡിയോ കോളിലെ ദൃശ്യങ്ങള് ഇപ്പോള് സോഷ്യല് മീഡിയയില് പടരുകയാണ്.
https://www.facebook.com/Malayalivartha
