തിരുവനന്തപുരം നഗരത്തിലെയും നേമം മണ്ഡലത്തിലെയും ജനങ്ങളെ വഞ്ചിച്ചുകൊണ്ട് കോൺഗ്രസും ബിജെപിയും തമ്മിൽ ഉണ്ടാക്കിയിരിക്കുന്ന വോട്ട് കച്ചവടം ജനാധിപത്യത്തിന് നേരെയുള്ള വെല്ലുവിളിയാണെന്ന് നേമം എൽ ഡി എഫ് സ്ഥാനാർത്ഥി വി ശിവൻകുട്ടി. യൂത്ത് കോൺഗ്രസിന്റെ മുൻ സംസ്ഥാന ഭാരവാഹി തന്നെ ഈ രഹസ്യ ധാരണ പരസ്യപ്പെടുത്തിയതോടെ യുഡിഎഫ്-ബിജെപി അവിശുദ്ധ ബന്ധം പകൽപോലെ വ്യക്തമായിരിക്കുകയാണ്.

നേമത്ത് ബിജെപി സ്ഥാനാർത്ഥി രാജീവ് ചന്ദ്രശേഖറിനെ വിജയിപ്പിക്കാൻ കോൺഗ്രസ് വോട്ട് മറിക്കുമെന്ന ധാരണ ഞെട്ടിക്കുന്നതാണ്. ഇതിന് പകരമായി വട്ടിയൂർക്കാവിലും അരുവിക്കരയിലും സഹായം തേടുന്നത് രാഷ്ട്രീയ പാപ്പരത്തമാണ്.

വർഗീയ ശക്തികളെ തടയുമെന്ന് അവകാശപ്പെടുന്ന കോൺഗ്രസ്, അധികാരം പങ്കിടാനും സീറ്റുകൾ ഉറപ്പിക്കാനും ആർഎസ്എസ് അജണ്ടയുമായി കൈകോർക്കുന്നത് കേരളത്തിലെ മതനിരപേക്ഷ മനസ്സിനോടുള്ള വഞ്ചനയാണ്.നേമത്തെ വികസന മുരടിപ്പിന് അറുതി വരുത്താനും വർഗീയതയെ പടിക്ക് പുറത്താക്കാനും എൽഡിഎഫ് നടത്തിയ പോരാട്ടങ്ങളെ ജനങ്ങൾക്കറിയാം. ഇത്തരം പിൻവാതിൽ ഇടപാടുകൾ കൊണ്ട് ഇടതുപക്ഷത്തിന്റെ മുന്നേറ്റത്തെ തടയാനാകില്ല.

കോൺഗ്രസും ബിജെപിയും തമ്മിലുള്ള ഈ വോട്ട് കച്ചവടം നേമത്തെ പ്രബുദ്ധരായ ജനങ്ങൾ തിരിച്ചറിയും. വർഗീയതയ്ക്കും അവസരവാദ രാഷ്ട്രീയത്തിനും നേമം മണ്ഡലത്തിൽ സ്ഥാനമുണ്ടാകില്ല. ഈ അവിശുദ്ധ സഖ്യത്തെ തിരഞ്ഞെടുപ്പിലൂടെ ജനങ്ങൾ തൂത്തെറിയും.