കെണിയില്‍വീണ ആളെക്കൊല്ലി കടുവയെ പുത്തൂരിലേക്ക് മാറ്റും. സുവോളജിക്കല്‍ പാര്‍ക്കിലേക്കായിരിക്കും മാറ്റുക. പതിനഞ്ച് വയസോളം പ്രായമുള്ള കടുവയ്ക്ക് കാഴ്ചക്കുറവുണ്ട്. കൂടാതെ ദേഹമാസകലം മുറിവുമുണ്ടെന്നാണ് വിവരം.

പ്രായാധിക്യവും പരിക്കുകളുമുള്ളതിനാല്‍ പെണ്‍കടുവയെ കാട്ടില്‍ തുറന്നുവിടാനാകില്ല. ഇര തേടാനുള്ള ശേഷിയില്ലാത്തതിനാല്‍ പുനരധിവാസമാണ് മുന്നിലുള്ള പോംവഴി. കടുവ മേയ് പതിനഞ്ചിന് റബ്ബര്‍ ടാപ്പിംഗ് തൊഴിലാളിയായ ഗഫൂര്‍ അലിയെയാണ് (44) കൊലപ്പെടുത്തി ഭക്ഷിച്ചത്. സുഹൃത്തായ അബ്ദുള്‍ സമദിന്റെ കണ്‍മുന്നില്‍വച്ചാണ് കടുവ ഗഫൂറിനുമേല്‍ ചാടിവീണ് കഴുത്തിന് പിന്നില്‍ കടിച്ചുവീഴ്ത്തി വലിച്ചിഴച്ച് കൊണ്ടുപോയി കൊന്നുതിന്നത്.

തുടര്‍ന്ന് പ്രദേശത്ത് 20 അംഗങ്ങള്‍ വീതമുള്ള മൂന്ന് ആര്‍ആര്‍ടി സംഘങ്ങളായി കടുവയ്ക്ക് വേണ്ടിയുള്ള തെരച്ചില്‍ തുടരുകയും കൂട് സ്ഥാപിക്കുകയുമായിരുന്നു. ലൈവ് സ്ട്രീമിംഗ് ക്യാമറകള്‍, ഡ്രോണുകള്‍, മൂന്ന് കൂടുകള്‍ എന്നിവ പ്രദേശത്ത് സ്ഥാപിച്ചു.

കടുവയെ പിടികൂടാനായി മേയ് അവസാനത്തോടെ കേരള എസ്‌റ്റേറ്റ് സി വണ്‍ ഡിവിഷനില്‍ സ്ഥാപിച്ച കൂട്ടില്‍ ഒരു പുലി കുടുങ്ങിയിരുന്നു. തുടര്‍ന്ന് പലയിടത്തും കെണി വച്ചു. 53ാം ദിവസമായ ഇന്ന് രാവിലെയാണ് കടുവ കെണിയില്‍ അകപ്പെട്ടത്. അടുത്ത കാലത്തുണ്ടായതില്‍ വച്ച് ഏറ്റവും വലിയ കടുവ ദൗത്യം എന്നാണ് അധികൃതര്‍ ഇതിനെ വിശേഷിപ്പിക്കുന്നത്. രണ്ട് കുങ്കി ആനകള്‍, മൂന്ന് വെറ്ററിനറി ഡോക്ടര്‍മാര്‍ എന്നിവരും ദൗത്യത്തിന്റെ ഭാഗമായിരുന്നു.