കിണറ്റില്‍ വീണ് മരിച്ചെന്ന് കരുതിയ വയോധികയ്ക്ക് അത്ഭുത രക്ഷപ്പെടല്‍
കിണറ്റില്‍ വീണ് മരിച്ചെന്ന് കരുതിയ വയോധിക ഒന്നര മണിക്കൂറിന് ശേഷം രക്ഷപ്പെട്ടു. കൂറ്റനാടിന് സമീപം നാഗലശ്ശേരി പഞ്ചായത്തിലെ കോതച്ചിറ കരുമത്തില്‍ വീട്ടില്‍ ദാക്ഷായണി (68) ആണ് വീട്ടിലെ കിണറ്റില്‍ വീണത്.
കാലത്ത് ഏഴ് മണിയോടെ വയോധികയെ കിണറ്റില്‍ വീണ് കിടക്കുന്ന നിലയില്‍ വീട്ടുകാര്‍ കാണുകയായിരുന്നു. വിവരം അറിഞ്ഞ് ഓടിയെത്തിയ നാട്ടുകാര്‍ ഉടന്‍ തന്നെ രക്ഷാപ്രവര്‍ത്തനം ആരംഭിച്ചു. അതിനിടെ ദാക്ഷായണിയെ കിണറിനു പുറത്തെത്തിക്കാനായി നാട്ടുകാര്‍ അഗ്നിരക്ഷാസേനയെയും വിവരമറിയിച്ചിരുന്നു.
ഈ സമയം ശരീരം വെള്ളത്തിനടിയിലേക്ക് മുങ്ങിപ്പോകാതിരിക്കാനായി പ്രദേശവാസി ഭാസ്‌കരന്‍ കിണറിലിറങ്ങി വയോധികയുടെ ശരീരം താങ്ങി നിര്‍ത്തുകയായിരുന്നു. ഈ സമയമത്രയും വയോധികയ്ക്ക് ജീവനുണ്ടോ എന്ന കാര്യത്തില്‍ നാട്ടുകാര്‍ക്ക് യാതൊരു ഉറപ്പുമുണ്ടായിരുന്നില്ല. അഗ്നിരക്ഷാസേന എത്തി ശരീരം മുകളിലേക്കു കയറ്റുന്നതിനിടെയാണ് വയോധികയുടെ കണ്‍പോളയിലെ ഇളക്കം ശ്രദ്ധയില്‍പ്പെടുന്നതും ജീവന്‍ നിലനില്‍ക്കുന്നുണ്ടെന്ന് മനസിലായതും. ഉടന്‍ തന്നെ വയോധികയെ പെരുമ്പിലാവിലെ സ്വകാര്യ ആശുപത്രിയിലേക്ക് മാറ്റി.
ചികിത്സയില്‍ തുടരുന്ന ദാക്ഷായണി ഞായറാഴ്ച ഉച്ചയോടെ തന്നെ അപകട നില തരണം ചെയ്തതായി ആശുപത്രി അധികൃതര്‍ . മണിക്കൂറുകളോളം നിറയെ വെള്ളമുള്ള കിണറില്‍ വീണ് കിടന്നിട്ടും വയോധിക അദ്ഭുതകരമായി രക്ഷപ്പെട്ടതിന്റെ ആശ്വാസത്തിലാണ് ഏവരും.
" f
https://www.facebook.com/Malayalivartha
