നിയമസഭാ തിരഞ്ഞെടുപ്പ് അടുത്തതോടെ ജ്യോല്‍സ്യന്മാര്‍ക്കെല്ലാം ശുക്രദശ. സീറ്റുകിട്ടാനും വിജയം നേടാനുമായി ജോല്‍സ്യന്മാരെ കാണാന്‍ സ്ഥാനാര്‍ത്ഥികള്‍ നെട്ടോട്ടമോടുകയാണ്. എല്ലാപേര്‍ക്കും അറിയേണ്ടത് സീറ്റു കിട്ടുമോയെന്നാണ്. ഇല്ലെങ്കില്‍ അതുറപ്പാക്കാനുള്ള വഴികളും.
ഉന്നതനേതാക്കളുടെ മനസലിയാന്‍ പ്രത്യേക പൂജ നടത്തുന്നവരും ശത്രുസംഹാരത്തിന് വഴിതേടിയെത്തുന്നവരുമെല്ലാം സീറ്റുമോഹികളുടെ കൂട്ടത്തിലുണ്ട്. പ്രശ്‌ന പരിഹാരക്രിയകള്‍ തന്നെ പലവിധമാണ്. പൂജകള്‍ക്ക് ഫീസായി 1000 രൂപ മുതല്‍ ഒരു ലക്ഷംരൂപവരെ വാങ്ങുന്ന ജ്യോതിഷികളുണ്ട്. രാഷ്ട്രീയ ജ്യോല്‍സ്യനെന്ന് പേരെടുത്തവരാണെങ്കില്‍ തുക ഉയരും. വിപ്ലവപാര്‍ട്ടിക്കാരും പുരോഗമന ചിന്താഗതിക്കാരായ യുവനേതാക്കളുമെല്ലാം തങ്ങളെ തേടിയെത്താറുണ്ടെന്ന് മേഖലയില്‍ പ്രവര്‍ത്തിക്കുന്നവര്‍ പറയുന്നു. നേരിട്ടുവരാന്‍ മടിയുള്ളവര്‍ അനുയായികളെയും ബന്ധുക്കളെയും രാഷ്ട്രീയത്തിലെ തലവര പരിശോധിപ്പിക്കാന്‍ നിയോഗിക്കും.
'സീറ്റ് കിട്ടുമോയെന്നും വിജയ സാധ്യതയുണ്ടോയെന്നും അറിയാനായി എല്ലാ പാര്‍ട്ടികളിലുമുള്ള രാഷ്ട്രീയ പ്രവര്‍ത്തകര്‍ സമീപിക്കാറുണ്ടെന്ന് ജ്യോതിഷ മേഖലയില്‍ പ്രവര്‍ത്തിക്കുന്നവര്‍ വ്യക്തമാക്കുന്നു. എന്നാല്‍, ജ്യോതിഷ രംഗത്ത് പ്രവര്‍ത്തിക്കുന്നവരില്‍ ഇതിനെ എതിര്‍ക്കുന്നവരു ധാരാളമുണ്ട്. രാഷ്ട്രീയപ്രവചനത്തിന് ജ്യോതിഷത്തെ ഉപയോഗിക്കുന്നതിനോട് യോജിക്കാനാകില്ല. അതു ശരിയായ നടപടിയല്ലെന്നും അവര്‍ വ്യക്തമാക്കുന്നു. 
രാഷ്ട്രീയക്കാരിലും ഇക്കാര്യത്തില്‍ രണ്ടഭിപ്രായമുണ്ട്. 'ജനങ്ങളുടേയും പാര്‍ട്ടിയുടേയും അനുവാദം മതി നിയമസഭയിലെത്താന്‍, അതിന് ഗ്രഹങ്ങളുടെ അനുവാദം വേണ്ടെന്നാണ് ചിലരുടെ വ്യക്തിപരമായ അഭിപ്രായം. എന്തൊക്കെയായാലും ജ്യോല്‍സ്യന്മാര്‍ ശരിക്കും ഈ അവസരം പാഴാക്കാതെ പ്രയോജനപ്പെടുത്തുന്നുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha