മിഥുന് വിട നല്‍കി നാട്
തേവലക്കര ബോയ്‌സ് എച്ച്.എസിലെ എട്ടാം ക്ലാസ് വിദ്യാര്‍ത്ഥി മിഥുന് വിട നല്‍കി നാട്. മിഥുന് അന്തിമോപചാരം നല്‍കാന്‍ അദ്ധ്യാപകരും കൂട്ടുകാരും നാട്ടുകാരും അടക്കം ആയിരങ്ങള്‍ വിളന്തറ മനുഭവനില്‍ എത്തിയിരുന്നു. മനുവിന്റെയും സുജയുടെയും മൂത്തമകനാണ് മിഥുന്. അമ്മയും അച്ഛനും അനുജന്‍ സുജിനും അന്ത്യചുംബനം നല്‍കി. വൈകിട്ട് നാലരയോടെയാണ് സംസ്‌കാരച്ചടങ്ങുകള്‍ നടന്നത്. കുഞ്ഞനുജന്‍ സുജിനാണ് ചിതയ്ക്ക് തീകൊളുത്തിയത്.
പ്രിയപ്പെട്ട മകനെ അവസാനമായി ഒരുനോക്ക് കാണാന്‍ മിഥുന്റെ അമ്മ സുജ ഇന്നുരാവിലെയാണ് വീട്ടിലെത്തിയത്. കുവൈത്തില്‍ നിന്നും ഇന്ന് രാവിലെ ഒമ്പത് മണിയോടെയാണ് സുജ നെടുമ്പാശേരി വിമാനത്താവളത്തിലെത്തിയത്. സുജയെ കാത്ത് ഇളയ മകനും ഭര്‍ത്താവ് മനുവും വിമാനത്താവളത്തിലുണ്ടായിരുന്നു. അവിടെ നിന്ന് കൊല്ലത്തെ വീട്ടിലേയ്ക്ക് വരികയായിരുന്നു.
സ്‌കൂളിലെ തകര ഷീറ്റ് പാകിയ സൈക്കിള്‍ ഷെഡിന് മുകളില്‍ വീണ ചെരുപ്പെടുക്കാന്‍ കയറിയ മിഥുന് ത്രീഫേസ് വൈദ്യുതി ലൈനില്‍ നിന്ന് ഷോക്കേറ്റ് മരിക്കുകയായിരുന്നു. ട്യൂഷന്‍ കഴിഞ്ഞ് സ്‌കൂളിലെത്തിയ മിഥുന് ക്ലാസ് മുറിയില്‍ സഹപാഠികള്‍ക്കൊപ്പം കളിക്കുകയായിരുന്നു. സഹപാഠിയുടെ ചെരുപ്പ് തകരഷെഡിന് മുകളില്‍ വീണു. ഇതെടുക്കാനായി ഡെസ്‌ക്കിന് മുകളില്‍ കസേരയിട്ട് മിഥുന് അരഭിത്തിക്ക് മുകളിലുള്ള തടിപ്പാളികള്‍ക്കിടയിലൂടെ ഷെഡിന് മുകളില്‍ ഇറങ്ങി. ചെരുപ്പിന് അടുത്തേക്ക് നടക്കവേ, കാല്‍വഴുതി ത്രീ ഫേസ് ലോ ടെന്‍ഷന്‍ വൈദുതി ലൈനിലേയ്ക്ക് വീഴുകയായിരുന്നു.
https://www.facebook.com/Malayalivartha
