കുട്ടികളുടെ സാഹിത്യോത്സവത്തിലൂടെ കുഞ്ഞുങ്ങളുടെ ഭാവനയ്ക്കും സര്‍ഗാത്മകതയ്ക്കും ചിറകുകള്‍ നല്‍കുന്ന പദ്ധതിക്ക് തുടക്കമിടുന്നതെന്ന് പൊതുവിദ്യാഭ്യാസ മന്ത്രി വി ശിവന്‍കുട്ടി
കുട്ടികളുടെ സാഹിത്യോത്സവത്തിലൂടെ കുഞ്ഞുങ്ങളുടെ ഭാവനയ്ക്കും സര്‍ഗാത്മകതയ്ക്കും ചിറകുകള്‍ നല്‍കുന്ന ഒരു പുതിയ പദ്ധതിക്കാണ് തുടക്കമിടുന്നതെന്ന് പൊതുവിദ്യാഭ്യാസ മന്ത്രി വി ശിവന്‍കുട്ടി. 'അക്ഷരക്കൂട്ട്' - കുട്ടികളുടെ സാഹിത്യോത്സവം ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി.
കേരളത്തിലെ പൊതുവിദ്യാഭ്യാസ വകുപ്പ് പുതിയൊരു ചരിത്ര സംഭവത്തിനാണ് തുടക്കം കുറിക്കുന്നതെന്നും മന്ത്രി . ഒന്നാം ക്ലാസ്സുകാരായ കുരുന്നുകളുടെ ഡയറിക്കുറിപ്പുകള്‍ എഡിറ്റ് ചെയ്ത് 'കുരുന്നെഴുത്തുകള്‍' എന്ന പേരില്‍ വകുപ്പ് ഒരു പുസ്തകമാക്കി പ്രസിദ്ധീകരിച്ചിരുന്നു. നല്ല പ്രതികരണമാണ് അതിന് ലഭ്യമായത്. ആ സമയത്താണ് കുഞ്ഞുങ്ങള്‍ക്കായി ഒരു സംസ്ഥാനതല പുസ്തകോത്സവം സംഘടിപ്പിക്കണമെന്ന ആശയം വന്നതെന്നും വ്യക്തമാക്കി മന്ത്രി . പൊതുവിദ്യാഭ്യാസ വകുപ്പിന് കീഴിലുള്ള സ്റ്റേറ്റ് ഇന്‍സ്റ്റിറ്റ്യൂട്ട് ഓഫ് എഡ്യൂക്കേഷണല്‍ ടെക്‌നോളജിയുടെ നേതൃത്വത്തിലാണ് 'അക്ഷരക്കൂട്ട്' സാഹിത്യോത്സവം സംഘടിപ്പിക്കുന്നത്.
തിരുവനന്തപുരം കനകക്കുന്ന്, ജവഹര്‍ ബാലഭവന്‍, മണ്‍വിള എന്നിവിടങ്ങളിലെ വിവിധ വേദികളിലായി ഈ അക്ഷരമാമാങ്കം അരങ്ങേറുന്നു. കുട്ടികള്‍ രചിച്ച പുസ്തങ്ങളുടെ പ്രദര്‍ശനവും അവര്‍ക്കായി സാഹിത്യ ശില്പശാലകളും പ്രമുഖ എഴുത്തുകാരുമായുള്ള സംവാദങ്ങളുമെല്ലാം ഇതിന്റെ ഭാഗമായി നടക്കും. സാഹിത്യരചനയില്‍ തല്‍പ്പരരായ വിദ്യാര്‍ഥികളെ പ്രോത്സാഹിപ്പിക്കുന്നതും അവര്‍ക്ക് കൃത്യമായ ദിശാബോധം നല്‍കുകയുമാണ് ഈ പദ്ധതി ലക്ഷ്യമിടുന്നത്.
പുസ്തകങ്ങള്‍ രചിച്ച 140-ഓളം വിദ്യാര്‍ഥികളാണ് സാഹിത്യോത്സവത്തില്‍ മുഴുവന്‍ സമയ പങ്കാളികളാകുന്നത്. അവര്‍ക്ക് ആവശ്യമായ എല്ലാ സൗകര്യങ്ങളും സര്‍ക്കാര്‍ ഒരുക്കിയിട്ടുണ്ട്. സാഹിത്യോത്സവത്തില്‍ പ്രദര്‍ശിപ്പിക്കുന്ന ഓരോ പുസ്തകവും എഴുത്തുകാരായ അധ്യാപകര്‍ വായിച്ച് അഭിപ്രായങ്ങള്‍ രേഖപ്പെടുത്തിയിട്ടുണ്ട്.
കുട്ടികള്‍ മെന്റര്‍ ടീച്ചര്‍മാരുടെ സാന്നിധ്യത്തില്‍ ഈ പുസ്തകങ്ങള്‍ ചര്‍ച്ച ചെയ്യുകയും അതിന്റെ വിശകലനം പൊതുവേദിയില്‍ അവതരിപ്പിക്കുകയും ചെയ്യും. ഇത് നമ്മുടെ കുരുന്നു പ്രതിഭകള്‍ക്ക് ലഭിക്കുന്ന ഏറ്റവും വലിയ പ്രോത്സാഹനമായിരിക്കുമെന്നും മന്ത്രി പറഞ്ഞു.
ഈ സംരംഭം ഒരു വര്‍ഷം കൊണ്ട് അവസാനിപ്പിക്കേണ്ട ഒന്നല്ലെന്നും നമ്മുടെ കുട്ടികളുടെ സര്‍ഗ്ഗശേഷിയെ ഓരോ വര്‍ഷവും പരിപോഷിപ്പിക്കേണ്ടതുണ്ടെന്നും മന്ത്രി ഓര്‍മപ്പെടുത്തി. അവര്‍ക്ക് സ്ഥിരമായ ഒരു വേദി ഒരുക്കേണ്ടത് നമ്മുടെ കടമയാണ്. അതിനാല്‍, ഈ അധ്യയന വര്‍ഷം തുടക്കം കുറിക്കുന്ന 'അക്ഷരക്കൂട്ട്'- കുട്ടികളുടെ സാഹിത്യോത്സവം, കേരളത്തിലെ പൊതുവിദ്യാഭ്യാസ വകുപ്പിന്റെ നേതൃത്വത്തില്‍ എല്ലാ വര്‍ഷവും സംഘടിപ്പിക്കുന്ന ഒരു സ്ഥിരം പരിപാടിയായിരിക്കുമെന്ന് മന്ത്രി പ്രഖ്യാപിച്ചിരിക്കുകയാണ്.
https://www.facebook.com/Malayalivartha
