മുഖ്യമന്ത്രി ആഭ്യന്തരവകുപ്പ് ഒഴിയണമെന്നാവശ്യപ്പെട്ട് കെ.എസ്.യു നടത്തിയ നിയമസഭാ മാര്‍ച്ച് സംഘര്‍ഷത്തില്‍ കലാശിച്ചു. പൊലീസ് അതിക്രമങ്ങള്‍ക്കെതിരെ പ്രതിഷേധിച്ചുകൊണ്ടായിരുന്നു മാര്‍ച്ച്. കെ.എസ്.യു സംസ്ഥാന പ്രസിഡന്റ് അലോഷ്യസ് സേവ്യറിന്റെ നേതൃത്വത്തിലായിരുന്നു പ്രതിഷേധ മാര്‍ച്ച് നടന്നത്.ഉദ്യോഗസ്ഥര്‍ക്കു നേരെ പ്രവര്‍ത്തകര്‍ കല്ലുകളും കമ്പുകളും വലിച്ചെറിഞ്ഞു. ഇതിനിടെ, ട്രാഫിക് നിയന്ത്രണ സംവിധാനങ്ങള്‍ ഉള്‍പ്പെടെയുള്ള പൊതുമുതല്‍ പ്രതിഷേധക്കാര്‍ നശിപ്പിച്ചു. സംഘര്‍ഷം ശക്തമായതോടെ പൊലീസ് ജലപീരങ്കി ഉപയോഗിച്ച് പ്രവര്‍ത്തകരെ നേരിടുകയായിരുന്നു.

നിയമസഭാ മാര്‍ച്ചിന് ശേഷമാണ് കെ.എസ്.യു പ്രവര്‍ത്തകര്‍ അപ്രതീക്ഷിതമായി സെക്രട്ടേറിയേറ്റിലേക്കും മാര്‍ച്ച് നടത്തിയത്. ഈ വിവരം പൊലീസിന് മുന്‍കൂട്ടി ലഭിച്ചിരുന്നില്ല. രണ്ട് വാഹനങ്ങളിലായെത്തിയ പ്രവര്‍ത്തകര്‍ സെക്രട്ടേറിയേറ്റിന്റെ ബാരിക്കേഡുകള്‍ ചാടിക്കടക്കാന്‍ ശ്രമിച്ചതോടെ പൊലീസ് പ്രവര്‍ത്തകരെ അറസ്റ്റ് ചെയ്ത് നീക്കുകയായിരുന്നു. നിയമസഭയ്ക്ക് മുന്നില്‍ നടന്ന പ്രതിഷേധത്തിന് ശേഷമാണ് പ്രവര്‍ത്തകര്‍ എം.ജി. റോഡിലൂടെ സെക്രട്ടേറിയേറ്റിലേക്ക് എത്തിയത്.

മുഖ്യമന്ത്രി ആഭ്യന്തരവകുപ്പ് ഒഴിയണമെന്നായിരുന്നു പ്രതിഷേധക്കാരുടെ പ്രധാന ആവശ്യം. മുഖ്യമന്ത്രിക്ക് എതിരേയും പൊലീസിന് എതിരേയും മുദ്രാവാക്യം വിളിച്ച പ്രവര്‍ത്തകര്‍, അറസ്റ്റ് ചെയ്യുന്നതിനിടെ പൊലീസിന് നേരെ അസഭ്യവര്‍ഷവും നടത്തി. വനിതാ പ്രവര്‍ത്തകര്‍ ഉള്‍പ്പെടെ പ്രതിഷേധത്തില്‍ പങ്കെടുത്തു.