തിരുമല വാര്‍ഡ് കൗണ്‍സിലര്‍ അനിലിന്റെ മരണത്തില്‍ അനുശോചിച്ച് രാജീവ് ചന്ദ്രശേഖര്‍
വലിയശാല ഫാം സൊസൈറ്റിയിലെ സാമ്പത്തിക പ്രശ്‌നത്തെ തുടര്‍ന്ന് ആത്മഹത്യ ചെയ്ത ബിജെപി തിരുവനന്തപുരം സിറ്റി ജില്ലാ ജനറല്‍ സെക്രട്ടറിയും തിരുമല വാര്‍ഡ് കൗണ്‍സിലറുമായ അനില്‍ കുമാറിന്റെ വിയോഗത്തില്‍ ദുഃഖം രേഖപ്പെടുത്തി സംസ്ഥാന അദ്ധ്യക്ഷന്‍ രാജീവ് ചന്ദ്രശേഖര്‍. ലോക്‌സഭാ തിരഞ്ഞെടുപ്പ് സമയത്ത് വളരെ അടുത്ത് പ്രവര്‍ത്തിച്ചിരുന്ന അനിലുമായി വ്യക്തിപരമായി ഏറെ അടുപ്പമുണ്ടായിരുന്നെന്ന് രാജീവ് ചന്ദ്രശേഖര്‍ ഫേസ്ബുക്കില്‍ കുറിച്ചു. രണ്ടു ദിവസം മുന്‍പും അദ്ദേഹത്തെ കാണുകയും സംസാരിക്കുകയും ചെയ്തിരുന്നു. അനിലിന്റെ മരണത്തില്‍ കുടുംബാംഗങ്ങളുടെയും സുഹൃത്തുക്കളുടെയും പാര്‍ട്ടി കാര്യകര്‍ത്താക്കളുടെയും ദുഃഖത്തില്‍ പങ്കു ചേരുന്നെന്നും അദ്ദേഹം കുറിച്ചു.
അനില്‍ കുമാര്‍ ഭാരവാഹിയായ വലിയശാല ഫാം സൊസൈറ്റിയില്‍ പ്രശ്‌നമുണ്ടായപ്പോള്‍ ആരും സഹായിച്ചില്ലെന്ന ആത്മഹത്യ കുറിപ്പ് പങ്കുവച്ചുകൊണ്ടാണ് അനില്‍ കുമാര്‍ ജീവനൊടുക്കിയത്. ഇന്ന് രാവിലെ എട്ടരമണിയോടെ തിരുമലയിലുള്ള അദ്ദേഹത്തിന്റെ ഓഫീസിലെത്തിയാണ് ആത്മഹത്യ ചെയ്തത്. വലിയശാല ഫാം സൊസൈറ്റിയില്‍ ആറ് കോടിയിലധികം രൂപ വായ്പ നല്‍കിയിട്ടുണ്ട്. ചില സാമ്പത്തിക പ്രശ്‌നങ്ങള്‍ ഇവിടെ ഉണ്ടായിരുന്നു. ഇതോടെ നിക്ഷേപകര്‍ പണം തിരികെ ആവശ്യപ്പെട്ടിരുന്നു. പണം തിരികെ കൊടുക്കാന്‍ സാധിക്കാതെ വന്നപ്പോള്‍ തമ്പാനൂര്‍ പൊലീസ് സ്‌റ്റേഷനില്‍ കേസ് രജിസ്റ്റര്‍ ചെയ്യുകയും ചെയ്തിരുന്നു.
ഈ കേസില്‍ അനില്‍ കുമാറിനെയാണ് പൊലീസ് വിളിപ്പിച്ചത്. ഈ സംഭവത്തില്‍ അനില്‍ ഏറെ മാനസിക സമ്മര്‍ദ്ദം അനുഭവപ്പെട്ടിരുന്നെന്ന് സഹപ്രവര്‍ത്തകര്‍ പറയുന്നു. സാമ്പത്തിക പ്രശ്‌നത്തില്‍ സൊസൈറ്റിയിലെ മറ്റാരും സഹായിച്ചില്ല. താനും തന്റെ കുടുംബമോ ഒരു പണം ഇതില്‍ നിന്നും എടുത്തിട്ടില്ല. ഇപ്പോള്‍ എല്ലാ കുറ്റവും തന്റെ പേരിലാണ്. അതുകൊണ്ട് ജീവിതം അവസാനിപ്പിക്കുന്നു എന്നാണ് കുറിപ്പിലുള്ളത്.
https://www.facebook.com/Malayalivartha
