അര്ജുന്റെ ആത്മഹത്യയില് രക്ഷിതാക്കള്ക്കെതിരെ സ്കൂള് അധികൃതര്; കുറച്ച് ദിവസങ്ങളായി ക്ലാസില് അര്ജുന് വിഷമിച്ചിരിക്കുകയായിരുന്നുവെന്ന് സഹപാഠി; സ്കൂളിലെ മറ്റെല്ലാ കുട്ടികളും അദ്ധ്യാപികയ്ക്കെതിരെ പ്രതിഷേധിക്കുകയാണ്
പല്ലന്ചാത്തൂരില് 14 കാരനായ അര്ജുന് ആത്മഹത്യചെയ്ത സംഭവത്തില് രക്ഷിതാക്കള്ക്കെതിരെ സ്കൂള് അധികൃതര്. കുട്ടി ആത്മഹത്യ ചെയ്തതിന്റെ യഥാര്ത്ഥ കാരണം അറിയണം. പൊലീസുകാര് ഇക്കാര്യം വ്യക്തമായി അന്വേഷിക്കണമെന്നും ഹെഡ്മിസ്ട്രസ് പറഞ്ഞു.
ആത്മഹത്യ ചെയ്യുന്നതിന് മുമ്പുള്ള ദിവസം കുട്ടി വളരെ വിഷമിച്ചാണ് ക്ലാസിലിരുന്നതെന്ന് കണ്ണാടി ഹയര്സെക്കന്ഡറി സ്കൂള് ഹെഡ്മിസ്ട്രസ് പറഞ്ഞു. കുട്ടിയുടെ അമ്മാവന് തല്ലിയിരുന്നുവെന്നും ഇന്സ്റ്റഗ്രാം ഉപയോഗിച്ചത് ആദ്യം കണ്ടുപിടിച്ചതും ശകാരിച്ചതും കുട്ടിയുടെ വീട്ടുകാരാണെന്നും അവര് പറഞ്ഞു. അര്ജുന് വീട്ടില് പ്രശ്നങ്ങളുണ്ടായിരുന്നു. അദ്ധ്യാപിക കുട്ടിയെ നന്നാക്കാന് വേണ്ടി മാത്രമാണ് പറഞ്ഞത്.
എല്ലാ വിദ്യാര്ത്ഥികളും അദ്ധ്യാപികയോട് വൈരാഗ്യത്തോടെയാണ് പെരുമാറുന്നതെന്നും അര്ജുന്റെ ഒരു സഹപാഠി പ്രതികരിച്ചു. അര്ജുന് വീട്ടില് പ്രശ്നങ്ങളുണ്ട്. കുറച്ച് ദിവസങ്ങളായി ക്ലാസില് അര്ജുന് വിഷമിച്ചിരിക്കുകയാണെന്നും കാര്യങ്ങള് അറിയാതെയാണ് മറ്റ് വിദ്യാര്ത്ഥികള് പ്രതിഷേധിക്കുന്നതെന്നും ഈ കുട്ടി പറഞ്ഞു. എന്നാല്, സ്കൂളിലെ മറ്റെല്ലാ കുട്ടികളും അദ്ധ്യാപികയ്ക്കെതിരെ പ്രതിഷേധിക്കുകയാണ്. തങ്ങള്ക്ക് രാഷ്ട്രീയമില്ലെന്നും അര്ജുന്റെ ആത്മഹത്യയ്ക്ക് കാരണമായ അദ്ധ്യാപികയെ പിരിച്ചുവിടണമെന്നുമാണ് അവര് പറയുന്നത്. കെഎസ്യുവിന്റെ നേതൃത്വത്തിലും സ്കൂളിന് മുന്നില് പ്രതിഷേധം നടക്കുന്നുണ്ട്.
കഴിഞ്ഞ ദിവസം രാത്രിയാണ് അര്ജുന് ആത്മഹത്യ ചെയ്തത്. സ്കൂള് യൂണിഫോം പോലും മാറ്റാതെ വീടിനുള്ളില് തൂങ്ങിമരിക്കുകയായിരുന്നു. അദ്ധ്യാപിക അര്ജുനെ നിരന്തരം മാനസികമായി പീഡിപ്പിക്കാറുണ്ടായിരുന്നുവെന്നാണ് അര്ജുന്റെ കുടുംബത്തിന്റെ ആരോപണം. കുട്ടികള് തമ്മില് ഇന്സ്റ്റഗ്രാമില് മെസേജ് അയച്ചതിന് ജയിലിലടയ്ക്കുമെന്ന് പറഞ്ഞ് അദ്ധ്യാപിക അര്ജുനെ ഭീഷണിപ്പെടുത്തിയെന്നാണ് കുടുംബത്തിന്റെ പരാതി. കണ്ണാടി ഹയര് സെക്കന്ഡറി സ്കൂളിലെ ഒമ്പതാം ക്ലാസ് വിദ്യാര്ത്ഥിയായിരുന്നു അര്ജുന്.
https://www.facebook.com/Malayalivartha
