പിഎംശ്രീ പദ്ധതിയില്‍ ചേര്‍ന്ന കേരളത്തിന് കേന്ദ്ര വിദ്യാഭ്യാസ മന്ത്രാലയത്തിന്റെ പ്രശംസ
ദേശീയ വിദ്യാഭ്യാസ നയത്തിന്റെ (എന്‍ഇപി) ഭാഗമായുള്ള പിഎംശ്രീ (ജങ ടഒഞക) പദ്ധതിയില്‍ പങ്കാളികളാകാനുള്ള കേരള സര്‍ക്കാരിന്റെ തീരുമാനത്തെ കേന്ദ്ര വിദ്യാഭ്യാസ മന്ത്രാലയം അഭിനന്ദിച്ചു. സംസ്ഥാനത്തുടനീളം പദ്ധതി നടപ്പിലാക്കുന്നതിനുള്ള ധാരണാപത്രത്തില്‍ ഒപ്പുവെച്ചതിന് കേരള സര്‍ക്കാരിന് അഭിനന്ദനങ്ങള്‍ അറിയിച്ചുകൊണ്ട് മന്ത്രാലയം 'എക്‌സി'ലൂടെ സന്ദേശം പങ്കുവെച്ചത്.
പൊതുവിദ്യാഭ്യാസ സെക്രട്ടറി കെ. വാസുകി കഴിഞ്ഞ ദിവസമാണ് ഡല്‍ഹിയില്‍ കേന്ദ്രസര്‍ക്കാരുമായി ധാരണാപത്രം ഒപ്പിട്ടത്. ഈ കരാറോടെ, സംസ്ഥാനത്തെ ഏകദേശം 150 ഓളം സ്‌കൂളുകള്‍ 'പിഎംശ്രീ' ആയി ഉയര്‍ത്തപ്പെടും. എന്നാല്‍, ദേശീയ വിദ്യാഭ്യാസ നയത്തിന് അനുസരിച്ചുള്ള പാഠ്യപദ്ധതി ഈ സ്‌കൂളുകള്‍ പിന്തുടരേണ്ടിവരും എന്നതാണ് പിഎംശ്രീ മാര്‍ഗരേഖയിലെ വ്യവസ്ഥ.
'ദേശീയ വിദ്യാഭ്യാസ നയം (ചഋജ) 2020ന് അനുസൃതമായി, ആധുനിക അടിസ്ഥാന സൗകര്യങ്ങള്‍, സ്മാര്‍ട്ട് ക്ലാസ്സ്‌റൂമുകള്‍, അനുഭവങ്ങളിലൂടെയുള്ള പഠനം, നൈപുണ്യ വികസനത്തിന് ഊന്നല്‍ എന്നിവ നല്‍കി സ്‌കൂളുകളെ മികവിന്റെ കേന്ദ്രങ്ങളാക്കി മാറ്റുന്നതിലൂടെ, കേരളത്തിലെ സ്‌കൂള്‍ വിദ്യാഭ്യാസ രംഗത്ത് ഇതൊരു വലിയ മുന്നേറ്റമാണ്,' കേന്ദ്ര മന്ത്രാലയം പ്രസ്താവനയില്‍ വ്യക്തമാക്കി.
നൂതനാശയങ്ങളെ പരിപോഷിപ്പിക്കാനും വിദ്യാര്‍ത്ഥികളെ ശോഭനമായ ഭാവിക്കായി ഒരുക്കാനും കഴിയുന്ന ഗുണമേന്മയുള്ളതും സമഗ്രവുമായ വിദ്യാഭ്യാസം നല്‍കാന്‍ ഇരുപക്ഷവും പ്രതിജ്ഞാബദ്ധരാണെന്നും കേന്ദ്ര വിദ്യാഭ്യാസ മന്ത്രാലയം കൂട്ടിച്ചേര്‍ത്തു.
സര്‍ക്കാരിന് അകത്തും പുറത്തും സിപിഐ ഉള്‍പ്പെടെയുള്ളവര്‍ കടുത്ത എതിര്‍പ്പ് ഉയര്‍ത്തിയിരുന്നു. മന്ത്രിസഭയിലും എല്‍ഡിഎഫിലും ഉയര്‍ന്ന ഈ എതിര്‍പ്പുകളെ വകവെക്കാതെയാണ് സംസ്ഥാന സര്‍ക്കാര്‍ പിഎം ശ്രീ സ്‌കൂള്‍ പദ്ധതിയില്‍ ഒപ്പുവെച്ചത് എന്നതും ശ്രദ്ധേയമാണ്. എന്‍ഇപി നടപ്പിലാക്കുന്നതിലെ ആശങ്കകളായിരുന്നു എതിര്‍പ്പുകള്‍ക്ക് പ്രധാന കാരണം. എന്നിരുന്നാലും, വിദ്യാഭ്യാസ മേഖലയിലെ വികസനത്തിനായി സംസ്ഥാനം പദ്ധതിയുടെ ഭാഗമാവുകയായിരുന്നു. പിഎംശ്രീ പദ്ധതിയിലൂടെ, തിരഞ്ഞെടുക്കപ്പെടുന്ന സ്‌കൂളുകള്‍ കാലഘട്ടത്തിനനുസരിച്ച് നവീകരിച്ച് മികവിന്റെ കേന്ദ്രങ്ങളാക്കി മാറ്റാനാണ് കേന്ദ്ര സര്‍ക്കാര്‍ ലക്ഷ്യമിടുന്നത്.
https://www.facebook.com/Malayalivartha
