പി.എം ശ്രീ വിഷയത്തില്‍ സി.പി.ഐയെ പരോക്ഷമായി വിമര്‍ശിച്ച് മുഖ്യമന്ത്രി പിണറായി വിജയന്‍. പദ്ധതികള്‍ നടപ്പാക്കുന്നതിനാണ് സര്‍ക്കാര്‍ എന്നും മുടക്കുന്നവരുടെ കൂടെയല്ല എന്നും മുഖ്യമന്ത്രി പറഞ്ഞു. പുന്നപ്ര വയലാര്‍ വാര്‍ഷിക ദിനാചരണത്തില്‍ സംസാരിക്കുകയായിരുന്നു മുഖ്യമന്ത്രി. സി.പി.ഐ സംസ്ഥാന സെക്രട്ടറി ബിനോയ് വിശ്വവും പരിപാടിയില്‍ പങ്കെടുക്കുന്നുണ്ട്.

പുന്നപ്ര വയലാര്‍ സമര സേനാനിയായിരുന്ന വി.എസ്. വേര്‍പിരിഞ്ഞ അവസരമാണിതെന്നും മുഖ്യമന്ത്രി അനുസ്മരിച്ചു. ഇന്ന് കാണുന്ന അവസ്ഥയിലേക്ക് നാം സ്വയംഭൂവായി എത്തിയത് അല്ല. അതിനു പിന്നില്‍ പുന്നപ്ര വയലാര്‍ സമരം പോലുള്ള ത്യാഗങ്ങള്‍ ഉണ്ട്. ക്രൂരമായ അടിച്ചമര്‍ത്തലുകള്‍ ഉണ്ട്. കേരളം രാജ്യത്തിന് അഭിമാനിക്കാന്‍ വക നല്‍കുന്ന സംസ്ഥാനമാണ്. കേരളത്തില്‍ വന്നപ്പോള്‍ രാഷ്ട്രപതിയും പ്രകീര്‍ത്തിച്ചു. ഭ്രാന്താലയം മനുഷ്യാലയം ആയതിന്റെ ചരിത്രം മറന്നു പോകരുത്. നവോത്ഥാനം വഹിച്ച പങ്ക് പ്രധാനമാണെന്നും മുഖ്യമന്ത്രി പറഞ്ഞു.

നവോത്ഥാനത്തിന് പിന്തുടര്‍ച്ച ഉണ്ടായി. അത് മുന്നോട്ടു കൊണ്ടുപോയത് കമ്യൂണിസ്റ്റുകാരാണ്. ആധുനിക കേരളത്തിന് അടിത്തറ ഇട്ടത് ഇ എം എസ് സര്‍ക്കാരാണ്. സ്‌കൂള്‍ വിദ്യാഭ്യാസം സൗജന്യമാക്കി. ഏതൊരു കുട്ടിക്കും നടന്ന് എത്താവുന്ന ദൂരത്ത് സ്‌കൂളുകള്‍ ഉണ്ട് ഇപ്പോള്‍. അത് നാടിന് വലിയ മാറ്റമാണ് ഉണ്ടാക്കിയത്. 1957ലെ ഇ/എം.എസ് സര്‍ക്കാര്‍ പൊലീസ് നയം അഴിച്ചുപണിതു. പൊലിസ് നവീകരണം ആരംഭിച്ചു. കേരളത്തെ മാറ്റി മറിക്കാന്‍ ഇത്തരത്തില്‍ ഉള്ള നടപടികള്‍ സഹായിച്ചു. അത്തരത്തില്‍ ഒരു ഘട്ടത്തില്‍ ആണ് നാം ഇപ്പോള്‍. 2006 മുതല്‍ 11 വരെ എല്‍ഡിഎഫ് സര്‍ക്കാര്‍ ആയിരുന്നു. അതിനു ശേഷം കേരളത്തിലെ ഒടുവിലത്തെ യു.ഡി.എഫ് സര്‍ക്കാര്‍ വന്നു. എല്‍.ഡി.എഫ് സര്‍ക്കാര്‍ കേരളത്തെ വലിയ തോതില്‍ മുന്നോട്ടു നയിച്ചു. യു.ഡി.എഫ് സര്‍ക്കാരിന്റെ കാലത്ത് എല്ലാം തകരുന്ന കാഴ്ചയായിരുന്നുവെന്നും മുഖ്യമന്ത്രി പറഞ്ഞു.