ശബരിമല സ്വര്‍ണപാളി കേസില്‍ നിര്‍ണായക നീക്കവുമായി എസ്‌ഐടി. ഉണ്ണികൃഷ്ണന്‍ പോറ്റിയുടെ സുഹൃത്ത് സി.കെ വാസുദേവനെ ചോദ്യം ചെയ്യുന്നു. ശബരിമലയില്‍ നിന്ന് കാണാതായ പീഠം സൂക്ഷിച്ചിരുന്നത് സി കെ വാസുദേവന്റെ വീട്ടിലായിരുന്നു. ഈഞ്ചക്കല്‍ ഓഫീസിലാണ് ചോദ്യം ചെയ്യല്‍. വൈകിട്ടാണ് വാസുദേവനെ വിളിച്ചു വരുത്തിയത്.കാണാതായ പീഠം സൂക്ഷിച്ചത് വാസുദേവനാണ്. വാതിലിന്റെയും കട്ടിളയുടെയും സ്‌പോണ്‍സര്‍മാരുടെ പട്ടികയില്‍ വാസുദേവനുമുണ്ട്.

ദ്വാരപാലക പാളികള്‍ വാസുദേവന്റെ വീടിന് അടുത്ത ക്ഷേത്രത്തില്‍ പുജിച്ചിരുന്നു. ദേവസ്വം ഉദ്യോഗസ്ഥരെയും വിളിച്ചു വരുത്തി. തിരുവാഭരണം കമ്മിഷണര്‍ റിജിലാലും എസ്.ഐ.ടിക്ക് മുന്നില്‍ എത്തി. ഈ വര്‍ഷം ദ്വാരപാലക പാളികള്‍ കൊണ്ടുപോകുന്നതിനെ എതിര്‍ത്തത് റിജിലാലായിരുന്നു. മാരാമത്ത് ജീവനക്കാരന്‍ കൃഷ്ണകുമാറിനെയും എസ്.ഐ.ടി. ഓഫീസിലേക്ക് വിളിച്ചുവരുത്തിയിട്ടുണ്ട്. കൃഷ്ണകുമാര്‍ എത്തിയത് ദേവസ്വം രേഖകളുമായി എന്നാണ് ലഭിക്കുന്ന സൂചന. സ്വര്‍ണ്ണക്കടത്ത് കാലത്ത് എക്‌സിക്യുട്ടവ് ഓഫീസര്‍ ആയിരുന്ന സുധീഷ് കുമാറിനെ എസ്‌ഐടി ചോദ്യം ചെയ്തിരുന്നു.

കേസില്‍ മൂന്നാം പ്രതിയാണ് സുധീഷ് കുമാര്‍.അതേസമയം ദേവസ്വം ആസ്ഥാനത്തുനിന്ന് സ്വര്‍ണം പൂശിയതിന്റെ രേഖകള്‍ എസ്‌ഐടി പിടിച്ചെടുത്തിരുന്നു. എസ്‌ഐടി ദേവസ്വം ആസ്ഥാനത്ത് നടത്തിയ പരിശോധനയിലാണ് സ്വര്‍ണം പൂശിയതുമായി ബന്ധപ്പെട്ട നിര്‍ണായക രേഖകള്‍ കണ്ടെത്തിയിരിക്കുന്നത്. ശബരിമലയില്‍ വിജയ് മല്യ ഏതളവിലാണ് സ്വര്‍ണം പൊതിഞ്ഞത് എന്നതിന്റെ നിര്‍ണായക വിവരങ്ങള്‍ ഇപ്പോള്‍ അന്വേഷണസംഘത്തിന് ലഭിച്ചെന്നാണ് സൂചന.