കൊച്ചിയില്‍ നടിയെ ആക്രമിച്ച കേസിലെ ഒന്നാം പ്രതി പള്‍സര്‍ സുനി കുറ്റകൃത്യം നടത്തുന്നതിന് മുമ്പ്  യുവതിയെ ഫോണില്‍ ബന്ധപ്പെട്ടിരുന്നു. എന്നാല്‍ യുവതിയെക്കുറിച്ചുള്ള കൂടുതല്‍ വിവരങ്ങളൊന്നും പുറത്തുവന്നിട്ടില്ല. ഇപ്പോഴിതാ, പള്‍സര്‍ സുനി ബസ് ഡ്രൈവറായിരുന്ന സമയത്തുള്ള സുഹൃത്താണ് യുവതിയെന്ന വിവരം പുറത്തുവന്നിരിക്കുകയാണ്. യുവതിയുടെ ഭര്‍ത്താവ് ഒരു ചാനലിനോടാണ് ഇക്കാര്യം വെളിപ്പെടുത്തിയത്.

സുനി ബസ് ഡ്രൈവറായിരുന്ന സമയത്തെ സൗഹൃദമാണ് യുവതിയുമായുള്ളത്. കേസുമായി ബന്ധപ്പെട്ട് പൊലീസ് വിളിച്ചിരുന്നു. മൊബൈല്‍ ഫോണ്‍ അടക്കം പരിശോധിച്ചിരുന്നെന്നും യുവതിയുടെ ഭര്‍ത്താവ് പറഞ്ഞു. ഫോണും സിം കാര്‍ഡും അന്ന് തന്നെ പൊലീസില്‍ എല്‍പ്പിച്ചിരുന്നു. കുറ്റകൃത്യത്തില്‍ പങ്കില്ലെന്ന് മനസിലാക്കിയ ശേഷമാണ് ഞങ്ങളെ ഒഴിവാക്കിയത്. കേസുമായി ബന്ധപ്പെട്ട് വിളിപ്പിച്ചപ്പോഴൊക്കെ സഹകരിച്ചിട്ടുണ്ടെന്നും അദ്ദേഹം പറഞ്ഞു.

'ഇതുവരെ ഫോണ്‍ തിരിച്ചു ചോദിച്ചിട്ടില്ല. സുനി ബസ് ഡ്രൈവറായിരുന്നപ്പോള്‍ യുവതിയുമായി സൗഹൃദമുണ്ടായിരുന്നു. കുറ്റകൃത്യം നടന്ന അന്ന് ഇന്നൊരു കാര്യം ചെയ്യുന്നുണ്ടെന്നും പ്രാര്‍ത്ഥിക്കണമെന്നും സുനി പറഞ്ഞിരുന്നു. യുവതിയെ ഫോണില്‍ പള്‍സര്‍ സുനി വിളിച്ചാണ് ഇക്കാര്യം പറഞ്ഞത്. എന്താണ് സംഭവമെന്ന് അറിയാനുള്ള ക്യൂരിയോസിറ്റിയുടെ പുറത്താണ് യുവതി പള്‍സര്‍ സുനിയെ പലതവണ വിളിക്കുകയും മേസേജ് അയക്കുകയും ചെയ്തത്' യുവതിയുടെ ഭര്‍ത്താവ് പറഞ്ഞു.