തൊണ്ടിമുതല് കേസില് ആന്റണി രാജുവിന്റെ ശിക്ഷ മരവിപ്പിച്ചു
തൊണ്ടിമുതല് കേസില് മുന്മന്ത്രി ആന്റണി രാജുവിനെതിരായ ശിക്ഷാവിധി തിരുവനന്തപുരം സെഷന്സ് കോടതി മരവിപ്പിച്ചു. ആന്റണി രാജുവിന്റെ അപ്പീല് ഫയലില് സ്വീകരിച്ചതിന് പിന്നാലെ ശിക്ഷ താത്കാലികമായി മരവിപ്പിച്ചത്. അതേസമയം കേസില് ആന്റണി രാജു കുറ്രക്കാരനാണെന്ന കീഴ്ക്കോടതി വിധി നിലനില്ക്കുമെന്ന് സെഷന്സ് കോടതി വ്യക്തമാക്കി. നിയമസഭാംഗത്വത്തിനുള്ള അയോഗ്യതയും തുടരും. കേസില് ഫെബ്രുവരി 6ന് വിശദമായ വാദം കേള്ക്കും.
തൊണ്ടിമുതല് കേസില് നെടുമങ്ങാട് മജിസ്ട്രേറ്റ് കോടതിയാണ് ആന്റണി രാജുവിനെ ശിക്ഷിച്ചത്. മൂന്നുവര്ഷം തടവും പതിനായിരം രൂപ പിഴയുമായിരുന്നു ശിക്ഷ, ഈ വിധിക്കെതിരെയാണ് ആന്റണി രാജു തിരുവനന്തപുരം സെഷന്സ് കോടതിയെ സമീപിച്ചത്.
മയക്കു മരുന്ന് കേസില് വിദേശപൗരനെ രക്ഷിക്കാന് ജൂനിയര് അഭിഭാഷകനായിരുന്ന കാലത്ത് തൊണ്ടിമുതലായ അടിവസ്ത്രത്തല് കൃത്രിമം കാട്ടിയെന്നാണ് ആന്റണി രാജുവിനെതിരായ കേസ്.
ക്രിമിനല് കേസില് ശിക്ഷിക്കപ്പെട്ട് എം.എല്.എ സ്ഥാനം നഷ്ടപ്പെടുന്ന കേരളത്തിലെ ആദ്യത്തെയാളാണ് ആന്റണി രാജു. കേസില് രണ്ടാംപ്രതിയാണ്. ശിക്ഷാ കാലാവധി കഴിഞ്ഞാലും ആറുവര്ഷത്തേക്ക് ആന്റണി രാജുവിന് തിരഞ്ഞെടുപ്പില് മത്സരിക്കാനാവില്ല, കുറ്റക്കാരനാണെന്ന കണ്ടെത്തല് മേല്ക്കോടതികള് സ്റ്റേ ചെയ്താലേ അയോഗ്യത ഒഴിവാകൂ. അപ്പീല് നല്കാന് കോടതി ഒരുമാസത്തെ സമയവും അനുവദിച്ചിരുന്നു.
https://www.facebook.com/Malayalivartha
