ശബരിമല സ്വര്‍ണ്ണപ്പാളി ക്കേസിലെ അറസ്റ്റ് രാഷ്ട്രീയ പ്രതികാരമാണെന്ന ഗുരുതര ആരോപണവുമായി ശബരിമല തന്ത്രി കണ്ഠര് രാജീവര്. ശബരിമലയില്‍ യുവതീപ്രവേശം തടഞ്ഞതിനും ക്ഷേത്രം എല്ലാ ദിവസവും തുറക്കാനുള്ള സര്‍ക്കാര്‍ നീക്കം വിഫലമാക്കിയതിനുമുള്ള ശിക്ഷയായാണ് തന്നെ കേസില്‍ കുടുക്കിയതെന്ന് അദ്ദേഹം ആരോപിച്ചു. കൊല്ലം വിജിലന്‍സ് കോടതിയില്‍ സമര്‍പ്പിച്ച ജാമ്യാപേക്ഷയിലാണ് തന്ത്രി സര്‍ക്കാരിനും പോലീസിനുമെതിരെ കടുത്ത നിലപാട് സ്വീകരിച്ചത്.

2018ലെ യുവതീപ്രവേശന വിവാദ കാലത്ത് ആചാര സംരക്ഷണത്തിനായി താന്‍ എടുത്ത ഉറച്ച നിലപാടാണ് സര്‍ക്കാരിനെ ചൊടിപ്പിച്ചതെന്ന് തന്ത്രി വാദിക്കുന്നു. ഭരിക്കുന്ന പാര്‍ട്ടിയെ പ്രീതിപ്പെടുത്താന്‍ ചില പോലീസ് ഉദ്യോഗസ്ഥര്‍ യുവതികളെ സന്നിധാനത്ത് എത്തിക്കാന്‍ ശ്രമിച്ചപ്പോള്‍ പൂജകള്‍ നിര്‍ത്തിവെച്ച് പുറത്തുവരുമെന്ന് താന്‍ മുന്നറിയിപ്പ് നല്‍കിയിരുന്നു. കൂടാതെ, ശബരിമലയെ എല്ലാ ദിവസവും തുറക്കുന്ന സാധാരണ ക്ഷേത്രമാക്കി മാറ്റാനുള്ള സര്‍ക്കാരിന്റെ ഗൂഢനീക്കം താന്‍ ഇടപെട്ട് പരാജയപ്പെടുത്തിയതും പകപോക്കലിന് കാരണമായെന്ന് ജാമ്യാപേക്ഷയില്‍ പറയുന്നു.

പ്രത്യേക അന്വേഷണ സംഘം വസ്തുതകള്‍ മറച്ചുവെച്ചാണ് തന്നെ പ്രതിയാക്കിയതെന്നും തന്ത്രി ആരോപിച്ചു. ഒന്നാം പ്രതി ഉണ്ണികൃഷ്ണന്‍ പോറ്റിയെ ശബരിമലയില്‍ എത്തിച്ചത് താനാണെന്ന് വരുത്തിത്തീര്‍ക്കാന്‍ അന്വേഷണ സംഘം ശ്രമിച്ചു.

ക്ഷേത്രത്തിലെ ഭരണപരമായ കാര്യങ്ങളില്‍ തനിക്ക് പങ്കില്ലെന്നും ആചാരപരമായ കാര്യങ്ങളില്‍ മാത്രമാണ് തന്റെ ചുമതലയെന്നും അദ്ദേഹം ആവര്‍ത്തിച്ചു. സ്വര്‍ണ്ണപ്പാളികള്‍ സൂക്ഷിക്കുന്നതിലും കൈകാര്യം ചെയ്യുന്നതിലും ദേവസ്വം ബോര്‍ഡിനാണ് പൂര്‍ണ്ണ ഉത്തരവാദിത്തമെന്നും തന്ത്രി ചൂണ്ടിക്കാട്ടി.