കോഴിക്കോട് റെയില്വേ സ്റ്റേഷനില് പ്രവേശന തടസ്സമുണ്ടാക്കി ഓട്ടോ തൊഴിലാളികള്
കോഴിക്കോട് റെയില്വേ സ്റ്റേഷനില് എത്തുന്ന പ്രായമുള്ളവരും രോഗികളും ഭിന്നശേഷിക്കാരുമായ യാത്രക്കാര്ക്ക് എസ്കലേറ്റര്, ലിഫ്റ്റ് സൗകര്യമുള്ള ഒന്നാം പ്ലാറ്റ്ഫോം പ്രവേശന കവാടത്തിനു സമീപം സ്വകാര്യവാഹനങ്ങളിലും കാറുകളിലും എത്തുന്നതില് ചില ഓട്ടോറിക്ഷ തൊഴിലാളികള് തടസ്സം സൃഷ്ടിക്കുന്നതായി ആക്ഷേപം ഉയരുന്നു.
നടക്കാന് ബുദ്ധിമുട്ടുള്ളവരെയും മറ്റും റെയില്വേ ഒന്നാം പ്ലാറ്റ്ഫോമില് എസ്കലേറ്റര്, ലിഫ്റ്റ് സൗകര്യമുളള ഭാഗത്ത് വാഹനങ്ങളില് എത്തിക്കുന്നതിനാണ് ചില ഓട്ടോറിക്ഷാ തൊഴിലാളികള് തടസ്സം നില്ക്കുന്നത്.
രോഗിയായ മാതാവുമൊത്ത് കഴിഞ്ഞ ദിവസം രാവിലെ ഒന്പതു മണിയോടെ റെയില്വേ സ്റ്റേഷനില് എത്തിയ യുവാവ് എസ്കലേറ്ററിനു സമീപമുള്ള പ്രവേശന കവാടത്തിനരികില് കാര് എത്തിക്കാന് ശ്രമിച്ചപ്പോള് ഇവിടെയുളള ഓട്ടോ തൊഴിലാളികള് ഇത് ഓട്ടോറിക്ഷകള്ക്ക് മാത്രമുള്ള ഭാഗമാണെന്നു പറഞ്ഞു തടഞ്ഞ സംഭവവും ഇതിനിടെ ഉണ്ടായി. മൂന്നാം പ്ലാറ്റ്ഫോമിലാണ് ട്രെയിന് എത്തുന്നതെന്നും എസ്കലേറ്ററിനു സമീപം വാഹനത്തില് നിന്നിറക്കി ഉടന് മടങ്ങാമെന്നു യുവാവ് പറഞ്ഞെങ്കിലും ഇവിടെ ഉണ്ടായിരുന്ന ഓട്ടോറിക്ഷ തൊഴിലാളികള് അതനുവദിച്ചില്ല. ഇത്തരം അവസരങ്ങളില് യാത്രക്കാര്ക്ക് സഹായം നല്കേണ്ട പൊലീസോ ആര്പിഎഫ് ഉദ്യോഗസ്ഥരോ ഇവിടെ ഇല്ലാതിരുന്നതിനാല് മാതാവിനെ നിരത്തുവക്കില് ഇറക്കേണ്ട സാഹചര്യമാണ് യുവാവിന് ഉണ്ടായത്. ബസുകളുടെ സ്റ്റോപ്പ് കൂടിയുള്ള ഈ ഭാഗത്ത് കാര് നിര്ത്താനുള്ള സൗകര്യം ഇല്ലാത്തതും കൂടുതല് പ്രതിസന്ധിയായി.
ഈ സംഭവം സൂചിപ്പിച്ച് റെയില്മദദ് ആപ്പിലും കോഴിക്കോട് റെയില്വേ സ്റ്റേഷന് മാസ്റ്റര്ക്കും യുവാവ് പരാതി നല്കിയെങ്കിലും ഈ പ്രവേശനകവാടത്തില് ആര്ക്കും വാഹനം കൊണ്ടുവരാം എന്ന മറുപടിയാണ് യുവാവിനു ലഭിച്ചത്. എന്നാല് ഇത് നടപ്പാക്കാനാകും വിധം 24 മണിക്കൂറും ഈ കവാടത്തില് പൊലീസോ മറ്റ് ആര്പിഎഫ് ഉദ്യോഗസ്ഥരോ ഉണ്ടാകാത്തതാണ് പ്രശ്നമാകുന്നതെന്നാണ് വിവരം. രോഗികളും പ്രായമുള്ളവരും ഭിന്നശേഷിക്കാരുമായ യാത്രക്കാരുമായി എസ്കലേറ്റര് സൗകര്യമുള്ള ഈ പ്രവേശനകവാടത്തില് എത്തുന്നവര്ക്ക് വാഹനങ്ങള് സ്റ്റേഷനു സമീപത്തേക്ക് എത്തിക്കാനുള്ള സൗകര്യവും ഒപ്പം ഇവിടെ വീല്ചെയര് സൗകര്യവും ഉറപ്പാക്കണമെന്ന ആവശ്യമാണ് ഉയരുന്നത്.
https://www.facebook.com/Malayalivartha
