സംസ്ഥാനത്ത് പാചകവാതക വിതരണത്തില്‍ നേരിടുന്ന തടസ്സങ്ങള്‍ നീക്കുന്നതിനായി എല്‍പിജി ടാങ്കറുകള്‍ക്കും വിതരണക്കാര്‍ക്കും കനത്ത പൊലീസ് സുരക്ഷ ഏര്‍പ്പെടുത്താന്‍ സര്‍ക്കാര്‍ തീരുമാനിച്ചു. പാചകവാതക നീക്കം തടയുന്നതും വിതരണക്കാരെ കയ്യേറ്റം ചെയ്യുന്നതും വര്‍ധിച്ചുവരുന്ന സാഹചര്യത്തിലാണ് ഈ അടിയന്തര നടപടിയെന്ന് സിവില്‍ സപ്ലൈസ് മന്ത്രി ഛഗന്‍ ഭുജ്ബല്‍ അറിയിച്ചു.പാചകവാതക വാഹനങ്ങളുടെ സുരക്ഷിതമായ യാത്ര ഉറപ്പാക്കുകയാണ് സര്‍ക്കാരിന്റെ ലക്ഷ്യം. വിതരണക്കാരെ തടയുന്നവര്‍ക്കെതിരെ വിട്ടുവീഴ്ചയില്ലാത്ത നടപടിയുണ്ടാകും. ഗ്രാമീണ മേഖലകളിലെ ഇന്ധന പ്രതിസന്ധി പരിഹരിക്കാന്‍ മണ്ണെണ്ണ വിതരണം ഊര്‍ജിതമാക്കാനും ഉദ്യോഗസ്ഥര്‍ക്ക് നിര്‍ദേശം നല്‍കിയിട്ടുണ്ട്.

പാചകവാതക ക്ഷാമം മുതലെടുത്ത് സിലിണ്ടറുകള്‍ പൂഴ്ത്തിവെക്കുന്നവര്‍ക്കെതിരെ സംസ്ഥാന വ്യാപകമായി പരിശോധന ശക്തമാക്കിയിട്ടുണ്ട്. ഇതുവരെ 23 പേര്‍ക്കെതിരെ കേസ് രജിസ്റ്റര്‍ ചെയ്യുകയും 18 പേരെ അറസ്റ്റ് ചെയ്യുകയും ചെയ്തു. വിതരണത്തിലെ ക്രമക്കേടുകള്‍ നിരീക്ഷിക്കാന്‍ ജില്ലാതലത്തില്‍ പ്രത്യേക വിജിലന്‍സ് സ്‌ക്വാഡുകള്‍ രൂപീകരിച്ച് പരിശോധനകള്‍ വ്യാപിപ്പിച്ചു.

സംസ്ഥാനത്ത് പാചകവാതകത്തിന് നിലവില്‍ ക്ഷാമമില്ലെന്ന് മന്ത്രി വ്യക്തമാക്കി. ആഭ്യന്തര ഉല്‍പാദനം പ്രതിദിനം 9000 ടണ്ണില്‍ നിന്ന് 11,000 ടണ്ണായി ഉയര്‍ത്തിയിട്ടുണ്ട്. എന്നാല്‍, ഗാര്‍ഹിക സിലിണ്ടറുകള്‍ക്ക് 60 രൂപ വര്‍ധിച്ച് 912 രൂപയായതില്‍ സംസ്ഥാനത്തിന് പങ്കില്ലെന്നും പെട്രോളിയം ഉല്‍പ്പന്നങ്ങളുടെ വില നിശ്ചയിക്കുന്നത് കേന്ദ്രസര്‍ക്കാരാണെന്നും അദ്ദേഹം കൂട്ടിച്ചേര്‍ത്തു.