പെരുമ്പാവൂരില് സ്ഥാനാര്ഥിയായി പ്രഖ്യാപിച്ച ലക്ഷ്മിപ്രിയയുടെ പേര് വോട്ടര്പട്ടികയില് ഇല്ല
പെരുമ്പാവൂരില് സ്ഥാനാര്ഥിയായി ട്വന്റി 20 പ്രഖ്യാപിച്ച നടി ലക്ഷ്മിപ്രിയയുടെ പേര് വോട്ടര് പട്ടികയിലില്ല. തുടര്ന്ന് ഇന്ന് പെരുമ്പാവൂരില് നടത്താന് നിശ്ചയിച്ചിരുന്ന റോഡ് ഷോ റദ്ദാക്കി. വോട്ടര് പട്ടികയില് പേരില്ലാത്ത സാഹചര്യത്തില് സ്ഥാനാര്ഥിത്വം തള്ളിപ്പോകാന് ഇടയുള്ളതിനാല് കാര്യങ്ങള് വിശദമായി പരിശോധിച്ചു വരുന്നു എന്നാണ് എന്ഡിഎ നേതൃത്വം വ്യക്തമാക്കിയിട്ടുള്ളത്. താരസംഘടനയായ അമ്മയുടെ വൈസ് പ്രസിഡന്റ് കൂടിയാണ് ലക്ഷ്മിപ്രിയ.
തൃപ്പൂണിത്തുറയിലെ കരിങ്ങാച്ചിറയിലാണ് ലക്ഷ്മിപ്രിയ ഇപ്പോള് താമസം. എന്നാല് ഇവിടെ ഇവര്ക്ക് വോട്ടില്ല എന്നാണ് വിവരം. തൃക്കാക്കരയില് ഒരു ഫ്ലാറ്റ് ഉണ്ടെങ്കിലും ഇവിടെയും വോട്ടര്പട്ടികയില് പേരില്ലെന്നാണ് സൂചനകള്. പെരുമ്പാവൂരില് എന്ഡിഎയുടെ വലിയ തിരഞ്ഞെടുപ്പു കമ്മിറ്റി ഓഫീസും തുറന്നിരുന്നു. തുടര്ന്ന് ഇന്ന് നടക്കേണ്ടിയിരുന്ന റോഡ് ഷോ ഉല്ഘാടനം ചെയ്യാനായി കേന്ദ്ര ഹെവി ഇന്ഡസ്ട്രീസ്, സ്റ്റീല് സഹമന്ത്രി ഭൂപതിരാജു ശ്രീനിവാസ വര്മ സ്റ്റേജിലെത്തിയപ്പോഴാണ് ലക്ഷ്മിപ്രിയയുടെ പേര് വോട്ടേഴ്സ് ലിസ്റ്റില് ഇല്ല എന്ന കാര്യം സംഘാടകര് അറിയുന്നത്. തുടര്ന്ന് റോഡ് ഷോ റദ്ദാക്കി. കേന്ദ്രമന്ത്രിയടക്കം പദയാത്ര നടത്തി പരിപാടി അവസാനിപ്പിക്കുകയും ചെയ്തു. ലക്ഷ്മിപ്രിയയ്ക്ക് പെട്ടെന്നുണ്ടായ ആരോഗ്യ പ്രശ്നങ്ങളെ തുടര്ന്ന് വരാന് സാധിച്ചില്ല എന്നാണ് സ്ഥാനാര്ഥിയുടെ അസാന്നിധ്യത്തെ കുറിച്ച് സംഘാടകര് അറിയിച്ചത്.
കഴിഞ്ഞ ദിവസമാണ് ട്വന്റി 20 കണ്വീനര് സാബു എം.ജേക്കബ് എന്ഡിഎയുടെ സ്ഥാനാര്ഥികളായി ചലച്ചിത്ര നടിമാരെ പ്രഖ്യാപിച്ചത്. പെരുമ്പാവൂരില് ലക്ഷ്മിപ്രിയയ്ക്കു പുറമെ തൃപ്പൂണിത്തുറയില് അഞ്ജലി നായര്, ഏറ്റുമാനൂരില് വീണ നായര് എന്നിവരായിരുന്നു സ്ഥാനാര്ഥികള്. ഇതിനു പുറമെ തൃക്കാക്കരയില് റിയാലിറ്റി ഷോ വിജയി അഖില് മാരാരുടെ സ്ഥാനാര്ഥിത്വവും പ്രഖ്യാപിച്ചിരുന്നു. ലക്ഷ്മിപ്രിയയ്ക്ക് പത്രിക സമര്പ്പിക്കേണ്ട അവസാന തീയതിയായ 23ന് മുമ്പ് വോട്ടര്പട്ടികയില് പേരു ചേര്ക്കാന് കഴിയുമോ? അതല്ലെങ്കില് മറ്റൊരു സ്ഥാനാര്ഥിയെ പ്രഖ്യാപിക്കുക തുടങ്ങിയ കൂടിയാലോചനകളാണ് എന്ഡിഎ ക്യാംപില് നടക്കുന്നത്.
https://www.facebook.com/Malayalivartha
