പഞ്ചാബ് കിംഗ്‌സ് താരം യൂസ്‌വേന്ദ്ര ചഹല്‍ മോഡലും നടിയുമായ താനിയ ചാറ്റര്‍ജി ഉന്നയിച്ച വെളിപ്പെടുത്തലുകളില്‍ വെട്ടിലായിരിക്കുകയാണ്. ചഹല്‍ തന്റെ ഇന്‍സ്റ്റഗ്രാം സ്‌റ്റോറിക്ക് മറുപടിയായി 'ആപ് ക്യൂട്ട് ഹോ' (നിങ്ങള്‍ ക്യൂട്ടാണ്) എന്ന് മെസേജ് അയച്ചതായാണ് താനിയയുടെ വാദം. ഓണ്‍ലൈന്‍ മാദ്ധ്യമങ്ങള്‍ക്ക് മുന്നില്‍ തന്റെ ഇന്‍സ്റ്റഗ്രാം ഇന്‍ബോക്‌സ് കാണിച്ച് താരം ഇത് തെളിയിക്കാന്‍ ശ്രമിക്കുന്ന വീഡിയോ സോഷ്യല്‍ മീഡിയയില്‍ വൈറലാണ്. ഗന്ദി ബാത്ത്', 'തിത്‌ലിയ' തുടങ്ങിയ ഒടിടി വെബ് സീരിസുകളിലൂടെ ശ്രദ്ധേയയായ നടിയാണ് താനിയ ചാറ്റര്‍ജി. നടിയുടെ ആരോപണത്തില്‍ ചഹല്‍ ഇതുവരെ പ്രതികരിച്ചിട്ടില്ല.

ഈ ആഴ്ച ചഹലിനെ തേടിയെത്തുന്ന രണ്ടാമത്തെ വിവാദമാണിത്. കഴിഞ്ഞ ദിവസം കാര്‍ ഓടിക്കുന്നതിനിടെ പുകവലിച്ച് സിഗരറ്റ് കുറ്റി അലക്ഷ്യമായി റോഡിലേക്ക് വലിച്ചെറിഞ്ഞ വീഡിയോ പുറത്തുവന്നിരുന്നു. 2025ല്‍ കൊറിയോഗ്രാഫര്‍ ധനശ്രീ വര്‍മ്മയുമായുള്ള വിവാഹബന്ധം വേര്‍പെടുത്തിയ ശേഷം ചഹലിന്റെ വ്യക്തിജീവിതം നിരന്തരം ഗോസിപ്പ് കോളങ്ങളില്‍ ഇടംപിടിക്കാറുണ്ട്. ആര്‍ജെ മഹ്വാഷുമായി താരം പ്രണയത്തിലാണെന്ന് റിപ്പോര്‍ട്ടുകളുണ്ടായിരുന്നെങ്കിലും, ഇരുവരും സോഷ്യല്‍ മീഡിയയില്‍ പരസ്പരം അണ്‍ഫോളോ ചെയ്തതോടെ ആ ബന്ധവും അവസാനിച്ചതായാണ് സൂചന.രവമവമഹനിലവില്‍ ചഹല്‍ ഇന്ത്യയുടെ ദേശീയ ടീമിന്റെ ഭാഗമല്ലെങ്കിലും ടീമീലേക്ക് തിരിച്ചെത്താനുള്ള ശ്രമങ്ങള്‍ തുടരുന്നുണ്ട്. 2023ലായിരുന്നു അദ്ദേഹം അവസാനമായി ഇന്ത്യയ്ക്കായി കളിച്ചത്. 2024ലെ ട്വന്റി20 ലോകകപ്പ് നേടിയ ഇന്ത്യന്‍ ടീമിന്റെ ഭാഗമായിരുന്നെങ്കിലും ഒരു മത്സരത്തില്‍ പോലും കളിക്കാന്‍ സാധിച്ചിരുന്നില്ല.

കഴിഞ്ഞ ഐപിഎല്‍ സീസണില്‍ പഞ്ചാബ് കിംഗ്‌സിനെ ഫൈനലില്‍ എത്തിക്കുന്നതില്‍ താരം പ്രധാന പങ്ക് വഹിച്ചിരുന്നു. അടുത്തിടെ എബി ഡിവില്ലിയേഴ്‌സിന്റെ പോഡ്കാസ്റ്റില്‍ ചഹല്‍ പറഞ്ഞ വാക്കുകളും ശ്രദ്ധേയമായിരുന്നു. 'ഞാന്‍ മദ്യപാനം നിര്‍ത്തിയിട്ട് ആറുമാസമായി. വയസ് 35 ആയി, ഇനിയെങ്കിലും ടീമിന് വേണ്ടി 150 ശതമാനം നല്‍കണം. ഒരു സീനിയര്‍ താരം എന്ന നിലയില്‍ മറ്റുള്ളവര്‍ക്ക് മാതൃകയാകാനാണ് ഞാന്‍ ആഗ്രഹിക്കുന്നത്.' ചഹല്‍ പറഞ്ഞു.