കൊച്ചിയിലെ ഹോട്ടല്മുറിയില് അവശ നിലയില് ഒന്നര വയസുകാരന്
ഹോട്ടല് മുറിയില് മാതാപിതാക്കളോടൊപ്പം അവശനിലയില് കണ്ടെത്തിയ ഒന്നര വയസ്സുകാരനെ ശിശുക്ഷേമ സമിതി ഏറ്റെടുത്തു. എറണാകുളം നോര്ത്ത് റെയില്വേ സ്റ്റേഷന് സമീപമുള്ള ഹോട്ടല് മുറിയിലാണ് സംഭവം. നാട്ടുകാര് വിവരം അറിയിച്ചതിനെ തുടര്ന്ന് തിങ്കളാഴ്ച വൈകുന്നേരമാണ് പൊലീസ് സ്ഥലത്തെത്തി കുട്ടിയെയും ദമ്പതികളെയും കണ്ടെത്തിയത്. ദമ്പതികള് പതിവായി ലഹരി ഉപയോഗിക്കുന്നവരാണെന്നാണ് പൊലീസിന്റെ പ്രാഥമിക നിഗമനം. ഇതിന്റെ അടിസ്ഥാനത്തില് കുട്ടിയെ ഉടന് കാക്കനാടുള്ള പരിചരണ കേന്ദ്രത്തിലേക്ക് മാറ്റി.
എന്നാല് പിറ്റേന്ന് രാവിലെ 24കാരനായ അച്ഛനും 21കാരിയായ അമ്മയും ശിശുക്ഷേമസമിതി ഓഫീസിലെത്തി കുഞ്ഞിനെ വിട്ടുനല്കണമെന്നാവശ്യപ്പെട്ടു. മാതാപിതാക്കളോടൊപ്പം കുട്ടി സുരക്ഷിതമല്ലെന്ന പൊലീസ് റിപ്പോര്ട്ടിന്റെ അടിസ്ഥാനത്തില് ഈ ആവശ്യം അംഗീകരിച്ചില്ല. തുടര്ന്ന് അമ്മയുടെ സ്വദേശമായ പാലക്കാട് സിഡബ്ല്യുസിയെ വിവരം അറിയിക്കുകയും ബുധനാഴ്ച ഉച്ചയോടെ എറണാകുളം ജില്ലാ അധികൃതര് കുട്ടിയെ അവര്ക്കു കൈമാറുകയും ചെയ്തു.
കുട്ടിയുടെ ബന്ധുക്കളെക്കുറിച്ചുള്ള അന്വേഷണം തുടരുകയാണെന്നും സുരക്ഷിതമാണെന്ന് ഉറപ്പായാല് മാത്രമേ കൈമാറ്റ നടപടികള് സ്വീകരിക്കൂ എന്നും അധികൃതര് അറിയിച്ചു. മലപ്പുറം സ്വദേശിയാണ് കുട്ടിയുടെ അച്ഛന്. ദമ്പതികള്ക്ക് വിവാഹ സര്ട്ടിഫിക്കറ്റില്ലെന്നും അധികൃതര് വ്യക്തമാക്കി.
https://www.facebook.com/Malayalivartha
