മേയ് മാസത്തിന്റെ തുടക്കത്തിൽ രാജ്യത്തെ സാധാരണക്കാരുടെ പോക്കറ്റിനെ ബാധിക്കുന്ന നിരവധി സാമ്പത്തിക മാറ്റങ്ങളാണ് വരാനിരിക്കുന്നത്. എടിഎം ഇടപാടുകൾ മുതൽ പാചകവാതക വില വരെ ഇതിൽ ഉൾപ്പെടുന്നു. 2026 മേയ് 1 മുതൽ രാജ്യവ്യാപകമായി പ്രാബല്യത്തിൽ വരുന്ന പ്രധാന മാറ്റങ്ങൾ എന്തെല്ലാമാണെന്ന് നോക്കാം.

എൽപിജി സിലിണ്ടറുകളുടെ വിലയിലും ബുക്കിങ് നിയമത്തിലും മെയ് ഒന്ന് മുതൽ വലിയ മാറ്റങ്ങൾ സംഭവിച്ചേക്കും. രാജ്യത്തെ ദശലക്ഷക്കണക്കിന് കുടുംബങ്ങളെ ബാധിക്കുന്ന ഒട്ടേറെ മാറ്റങ്ങളാണ് സംഭവിക്കാൻ പോകുന്നത്. രാജ്യത്തെ മൂന്ന് പ്രമുഖ എണ്ണ വിപണന കമ്പനികളായ ഇന്ത്യൻ ഓയിൽ കോർപ്പറേഷൻ, ഭാരത് പെട്രോളിയം, ഹിന്ദുസ്ഥാൻ പെട്രോളഴിയം എന്നിവ കരിഞ്ചന്ത, പൂഴ്ത്തിവെപ്പ്, സബ്‌സിഡി ഗ്യാസ് നിയമവിരുദ്ധമായി വിറ്റൊഴിക്കൽ എന്നിവ തടയുന്നതിന്റെ ഭാഗമായാണ് പുതിയ നിയമങ്ങൾ പ്രാബല്യത്തിൽ കൊണ്ടുവരുന്നത്.

എൽപിജി ബുക്കിങിൽ മാറ്റം
എൽപിജി ഗ്യാസ് സിലിണ്ടർ ബുക്കിങ് നിയമങ്ങളുമായി ബന്ധപ്പെട്ട് നേരത്തെ തന്നെ പെട്രോളിയം-പ്രകൃതിവാതക മന്ത്രാലയം തങ്ങളുടെ നിലപാട് വ്യക്തമാക്കിയതാണ്. വിതരണവും ആവശ്യകതയും നിയന്ത്രിക്കുന്നതിനായി നിരവധി നടപടികൾ മന്ത്രാലയം ഇതിനോടകം സ്വീകരിച്ചു. നഗരപ്രദേശങ്ങളിൽ ബുക്കിങ് ഇടവേള 21 ദിവസത്തിൽ നിന്ന് 25 ദിവസമായും ഗ്രാമപ്രദേശങ്ങളിൽ 45 ദിവസമായും ഉയർത്തി. ഇക്കാലയളവിന് മുമ്പ് നടത്തുന്ന ഏതൊരു ബുക്കിങും യാന്ത്രികമായി തടയാനാണ് തീരുമാനം.

ഒടിപി നൽകാതെ സിലിണ്ടർ കിട്ടില്ല
പുതിയ മാർഗനിർദേശങ്ങൾ പ്രകാരം മെയ് ഒന്ന് മുതൽ എൽപിജി സിലിണ്ടർ ലഭിക്കണമെങ്കിൽ ഒടിപി നൽകേണ്ടതായി വരും. ഡെലിവറി ഓതന്റിക്കേഷൻ കോഡ്, നോൺ നെഗോഷ്യബിൾ ആയി മാറ്റുകയാണ്. ഫിസിക്കൽ ബ്ലൂക്ക് ബുക്ക് അല്ലെങ്കിൽ രസീത് കാണിച്ച് എൽപിജി സിലിണ്ടർ ലഭിക്കുന്ന പരിപാടി നിർത്തുമെന്ന് സാരം.

റീഫിൽ ബുക്ക് ചെയ്യുമ്പോൾ ഉപഭോക്താവിന്റെ രജിസ്റ്റർ ചെയ്ത മൊബൈൽ നമ്പറിലേക്ക് ഒരു ഒടിപി എത്തും. ഗ്യാസ് സിലിണ്ടർ കരിഞ്ചന്ത വിൽപന തടയുന്നതിനായാണ് ഡെലിവറി ഓതന്റിക്കേഷൻ കോഡ് അടിസ്ഥാനമാക്കി വിതരണം നടക്കുന്നത്. ഇതിനോടകം തന്നെ ഇതേരീതിയിലുള്ള എൽപിജി വിതരണം ഏകദേശം 94.5 ശതമാനമായെന്ന് സർക്കാർ പറയുന്നു.

എൽപിജി വിലയിലും മാറ്റം സംഭവിക്കുമോ?
യുഎസ്-ഇറാൻ-ഇസ്രായേൽ എന്നീ രാജ്യങ്ങൾ തമ്മിലുള്ള സംഘർഷം അവസാനമില്ലാതെ തുടരുകയാണ്. യുദ്ധം ആരംഭിച്ചതിന് പിന്നാലെ ഇന്ത്യൻ എണ്ണക്കമ്പനികൾ 14.2 കിലോഗ്രാം ഗാർഹിക സിലിണ്ടറുകളുടെ എൽപിജി സിലിണ്ടർ വില 60 രൂപ വർധിപ്പിച്ചിരുന്നു. 19 കിലോഗ്രാം വാണിജ്യ സിലിണ്ടറുകളുടെ വിലയിൽ 250 രൂപയോളം വർധനവും ഉണ്ടായി.

ചുരുങ്ങിയ സമയത്തിനുള്ളിൽ മൂന്ന് തവണയാണ് എൽപിജി സിലിണ്ടർ വിലകളിൽ മാറ്റം സംഭവിച്ചത്. അതിനാൽ തന്നെ മെയ് 1 മുതൽ വില ഇനിയും മാറിയേക്കുമെന്നാണ് പ്രതീക്ഷ.