കുട്ടികളില്‍ ഉയര്‍ന്ന നിലവാരത്തിലുള്ള ചലച്ചിത്രാസ്വാദനശീലം വളര്‍ത്തുന്നതിനായി കേരള സംസ്ഥാന ചലച്ചിത്ര അക്കാദമി, 2026 മെയ് മാസത്തില്‍ സംഘടിപ്പിക്കുന്ന ക്യാമ്പുകളില്‍ പങ്കെടുക്കുന്നതിനുള്ള അപേക്ഷകള്‍ ക്ഷണിച്ചു. ചലച്ചിത്രാസ്വാദനം, ചലച്ചിത്രസാങ്കേതികത എന്നിവയെ സംബന്ധിച്ച ക്‌ളാസുകളും അഭിനയപരിശീലനവും ക്‌ളാസിക് ചിത്രങ്ങളുടെ പ്രദര്‍ശനവും ഒരുക്കുന്ന ക്യാമ്പില്‍ 8,9,10 ക്‌ളാസുകളിലെ കുട്ടികള്‍ക്ക് പങ്കെടുക്കാം. ക്യാമ്പിലേക്ക് തെരഞ്ഞെടുക്കപ്പെടുന്ന കുട്ടികള്‍ക്ക് താമസവും ഭക്ഷണവും സൗജന്യമായിരിക്കും. അപേക്ഷകള്‍ സ്വീകരിക്കുന്ന അവസാനതീയതി 2026 മെയ് 11.

അപേക്ഷകള്‍ ഓണ്‍ലൈനായാണ് സ്വീകരിക്കുന്നത്. https://forms.gle/K3jJZrLvPLdwah5T8 എന്ന ലിങ്ക് വഴി രജിസ്ട്രേഷന്‍ ഫോം പൂരിപ്പിച്ച് സബ്മിറ്റ് ചെയ്യേണ്ടതാണ്. പേര്, പഠിക്കുന്ന ക്‌ളാസ്, സ്‌കൂള്‍, ജില്ല, പൂര്‍ണമായ വിലാസം, ബന്ധപ്പെടാനുള്ള ഫോണ്‍ നമ്പര്‍ എന്നിവ അപേക്ഷയില്‍ വ്യക്തമാക്കിയിരിക്കണം.

കേരള സംസ്ഥാന ശിശുക്ഷേമ സമിതിയുടെ സഹകരണത്തോടെ വടക്കന്‍ കേരളത്തിലും തെക്കന്‍ കേരളത്തിലുമായി രണ്ട് ക്യാമ്പുകളാണ് സംഘടിപ്പിക്കുക. രണ്ടു മേഖലകളിലുമായി 120 ഓളം കുട്ടികള്‍ക്ക് ക്യാമ്പില്‍ പങ്കെടുക്കാം. മലയാള സിനിമയിലെ പ്രഗല്‍ഭരായ സംവിധായകരും അഭിനേതാക്കളും സാങ്കേതികപ്രവര്‍ത്തകരും ക്യാമ്പില്‍ കുട്ടികളുമായി സംവദിക്കും.