വന്യജീവി ആക്രമണങ്ങള്ക്ക് പരിഹാരം കാണാന് രണ്ടു വര്ഷമെടുക്കും: വനം മന്ത്രിയുടെ നിലപാട് നിരുത്തരവാദപരമെന്ന് പ്രതിപക്ഷ നേതാവ്
വന്യജീവി ആക്രമണങ്ങള്ക്ക് പരിഹാരം കാണാന് രണ്ടു വര്ഷമെടുക്കുമെന്ന വനംമന്ത്രിയുടെ നിലപാട് നിരുത്തരവാദപരമെന്ന് പ്രതിപക്ഷ നേതാവ് പിണറായി വിജയന്. കഴിഞ്ഞ ദിവസങ്ങളില് നിരവധി മരണങ്ങളും നാശനഷ്ടങ്ങളുമാണ് വന്യജീവി ആക്രമണങ്ങളുടെ ഫലമായി കേരളത്തില് സംഭവിച്ചത്. ജനങ്ങളുടെ ജീവനും സുരക്ഷയും ഉറപ്പു വരുത്താന് ഇച്ഛാശക്തി കാണിക്കേണ്ട സര്ക്കാര് കൈമലര്ത്തുന്നത് ജനങ്ങളില് ആശങ്ക ഉളവാക്കിയിട്ടുണ്ടെന്നും പ്രതിപക്ഷ നേതാവിന്റെ വിമര്ശനം.വന്യജീവി ആക്രമണങ്ങള്ക്ക് അറുതി വരുത്തുമെന്ന് വാഗ്ദാനം നല്കിയവര് ഇപ്പോള് മലക്കം മറിയുമ്പോള് പ്രശ്നബാധിതര് തീര്ത്തും അരക്ഷിതരാണെന്ന് പ്രതിപക്ഷ നേതാവ് പിണറായി വിജയന് പറഞ്ഞു.
മനുഷ്യ – വന്യജീവി സംഘര്ഷ ലഘൂകരണത്തിനായി സമഗ്ര കര്മ്മ പദ്ധതികളാണ് എല് ഡി എഫ് സര്ക്കാര് ആവിഷ്കരിച്ചിരുന്നത്. ആ പദ്ധതികള് പകര്ത്തി പുതിയ മട്ടില് അവതരിപ്പിച്ചതല്ലാതെ നൂതനമായ യാതൊരു പരിഹാരമാര്ഗവും സര്ക്കാര് നിര്ദ്ദേശിക്കുന്നില്ലെന്ന് അദേഹം കുറ്റപ്പെടുത്തി. പ്രതിബദ്ധതയോടെയും ശാസ്ത്രീയ മാര്ഗങ്ങളിലൂടെയും നിതാന്ത ജാഗ്രതയിലൂടെയും ഈ വിഷയത്തില് ഇടപെട്ട് സംഘര്ഷം വലിയ തോതില് ലഘൂകരിക്കാന് കഴിഞ്ഞ സര്ക്കാരിന് സാധിച്ചിരുന്നു. അന്ന് കുറ്റം മുഴുവന് സംസ്ഥാന സര്ക്കാരില് ചാര്ത്താന് ശ്രമിച്ചവരാണ് ഇപ്പോള് പുതിയ പ്രതിവിധികള് ഒന്നുമില്ലെന്ന് പറഞ്ഞ് തടിതപ്പുന്നതെന്ന് പിണറായി വിജയന് പറഞ്ഞു.
ഫെഡറല് വ്യവസ്ഥയുടെ പരിമിതികള്ക്കുള്ളില് നിന്നുകൊണ്ട് വനമേഖലയിലെ ജനങ്ങള്ക്ക് പരമാവധി ആശ്വാസം നല്കാനാണ് കഴിഞ്ഞ എല്ഡിഎഫ് സര്ക്കാരുകള് ശ്രമിച്ചത്. ഇതിന്റെ ഭാഗമായാണ് വന്യജീവി സംരക്ഷണ ഭേദഗതി ബില്ലും, വനം ഭേദഗതി ബില്ലും കഴിഞ്ഞ സര്ക്കാര് പാസാക്കിയത്. എന്നാല് ഗവര്ണര് ഈ ബില്ലുകള് ഒപ്പിടാതെ പിടിച്ചുവയ്ക്കുകയും ഒടുവില് രാഷ്ട്രപതിക്ക് അയക്കുകയും ചെയ്തു. കേന്ദ്ര നിയമങ്ങള് പ്രതിബന്ധമാണെന്ന വനം മന്ത്രിയുടെ മുന്കൂര് ജാമ്യം യു ഡി എഫിന്റെ ഇരട്ടത്താപ്പാണ് വ്യക്തമാക്കുന്നതെന്ന് പിണറായി വിജയന് പറഞ്ഞു.
https://www.facebook.com/Malayalivartha
