മുംബൈയിലെ മാന്‍ഖുര്‍ദില്‍ അനധികൃതമായി നിര്‍മിച്ച നാല് നില കെട്ടിടം തകര്‍ന്നുവീണാണ് ഒരു സ്ത്രീയും അഞ്ച് കുട്ടികളും ഉള്‍പ്പെടെ ആറ് പേര്‍ മരിച്ചത്. കെട്ടിടം ചെരിയുന്ന ലക്ഷണം കണ്ടുതുടങ്ങിയപ്പോഴേ മൂന്ന് കുടുംബങ്ങള്‍ ഒഴിഞ്ഞെങ്കിലും മൊയ്‌നുദ്ദീന്റെ കുടുംബം മറ്റു വഴിയില്ലാതെ ഇവിടെ തുടരുകയായിരുന്നു. അപകട സമയത്ത് മറ്റൊരു വീട്ടിലെ കുട്ടിയും ഇവിടെയുണ്ടായിരുന്നു. കുട്ടികള്‍ക്കൊപ്പം കളിക്കാനെത്തിയ അയല്‍വാസിയായ കുട്ടിയും അപകടത്തില്‍ മരിച്ചു.

വീടിനു സമീപത്തുള്ള നാല് നിലയുള്ള കെട്ടിടം ചെരിഞ്ഞു തുടങ്ങിയപ്പോഴേ വിവരം ലഭിച്ചെങ്കിലും കുടുംബവുമായി അടുത്ത ദിവസം രാവിലെ മാറാം എന്നാണ് 39കാരനായ മൊയ്‌നുദ്ദീന്‍ വാജിദ് അലി ഷാ തീരുമാനിച്ചത്. എന്നാല്‍ തൊട്ടടുത്ത് താമസിക്കുന്ന കുടുംബങ്ങള്‍ മിക്കവരും കയ്യില്‍കിട്ടിയതും എടുത്ത് അവരുടെ വീടുകള്‍ ഉപേക്ഷിച്ച് സുരക്ഷിത സ്ഥാനങ്ങളിലേക്കു അഭയം തേടിയിരുന്നു. തല്‍ക്കാലത്തേക്ക് മാറാന്‍ മറ്റൊരിടവും ആ രാത്രിയില്‍ മൊയ്‌നുദ്ദീന് കണ്ടെത്താന്‍ സാധിച്ചില്ല. ഭാര്യയും നാല് കുട്ടികളും അടക്കം ആറ് പേര്‍ അടങ്ങുന്നതായിരുന്നു മൊയ്‌നുദ്ദീന്റെ കുടുംബം. എന്നാല്‍ കുടുംബാംഗങ്ങളെ ഒന്നാകെയാണ് തന്റെ ഈ തീരുമാനത്തിലൂടെ മൊയ്‌നുദ്ദീന് നഷ്ടമായത്.

വീട്ടിലേക്ക് ആവശ്യമായ ഭക്ഷണവും മറ്റു സാധനങ്ങളും വാങ്ങാനായി മൊയ്‌നുദ്ദീന്‍ പുറത്തുപോയ സമയത്താണ് കെട്ടിടം തകര്‍ന്നു വീണത്. തിരികെ എത്തിയപ്പോള്‍ കുടുംബം ഒന്നാകെ കോണ്‍ക്രീറ്റ് കൂനയ്ക്കുള്ളില്‍ അകപ്പെട്ട കാഴ്ചയാണ് മൊയ്‌നുദ്ദീനു കാണാനായത്. രക്ഷാപ്രവര്‍ത്തനം ഊര്‍ജിതമായി നടന്നെങ്കിലും അകപ്പെട്ടവരെ ജീവനോടെ പുറത്തെടുക്കാനായില്ല. മൊയ്‌നുദ്ദീന്റെ ഭാര്യ അക്തര്‍ ജഹാന്‍ (38), കൈസര്‍ ജഹ മൊയ്‌നുദ്ദീന്‍ (14), അനാബിയ മൊയ്‌നുദ്ദീന്‍ ഷാ (3), ജലാലുദ്ദീന്‍ മൊയ്‌നുദ്ദീന്‍ (9), സെറാജുദ്ദീന്‍ മൊയ്‌നുദ്ദീന്‍ ഷാ (6) എന്നിവരും കുട്ടികള്‍ക്കൊപ്പം കളിക്കാനെത്തിയ അയല്‍വാസിയായ ആലിയ അല്ലാവുദ്ദീന്‍ ഷെയ്ഖ് (6) എന്നിവരാണ് അപകടത്തില്‍ കൊല്ലപ്പെട്ടത്. യുപിയിലാണ് മൊയ്‌നുദ്ദീന്റെ കുടുംബം. പോസ്റ്റുമോര്‍ട്ടം നടപടികള്‍ക്കു ശേഷം മൃതദേഹങ്ങള്‍ സ്വദേശത്തേക്ക് കൊണ്ടുപോയി.