ജിഷയുടെ കൊലപാതകം കേരളത്തില്‍ അലയടിക്കുമ്പോള്‍ മറ്റൊരുമരണമാണ് ആളുകളുടെ മനസ്സിലേക്കെത്തുന്നത്. ട്രെയിന്‍ യാത്രക്കിടെ തൃശ്ശൂര്‍ വള്ളത്തോള്‍ നഗറില്‍ ക്രൂരമായി കൊലചെയ്യപ്പെട്ട സൗമ്യ എന്ന പെണ്‍കുട്ടി. ക്രൂരമായ പീഡനത്തിനു വിധേയയായി കൊല്ലപ്പെട്ട നിയമവിദ്യാര്‍ത്ഥിനി ജിഷയുടെ കൊലപാതകികളെ ജനങ്ങള്‍ക്കു വിട്ടുകൊടുക്കണമെന്നു ട്രെയിന്‍ യാത്രയ്ക്കിടെ പീഡനത്തിന് ഇരയായി കൊല്ലപ്പെട്ട സൗമ്യയുടെ അമ്മ സുമതി. ജിഷയുടെ കൊലപാതകക്കേസില്‍ പ്രതികള്‍ക്കെതിരെ കര്‍ശന നടപടിയെടുക്കണം എന്നാവശ്യപ്പെട്ട് പ്രതിഷേധം ശക്തമാകുന്നതിനിടെയാണു സുമതിയുടെ പ്രതികരണം പുറത്തുവന്നത്.
ഇനി ജനം നിയമം കയ്യിലെടുക്കണം. ജിഷയുടെ ഘാതകനെ നിയമത്തിനു വിടാതെ ജനങ്ങള്‍ക്ക് വിട്ടു നല്‍കണം. മകളുടെ കൊലപാതകി ഗോവിന്ദച്ചാമി ജയിലില്‍ തിന്നു കൊഴുത്ത് സുഖമായി കഴിയുന്നത് സങ്കടമുണ്ടാക്കുന്നു. ഇതുപോലുള്ള അവസ്ഥ ആവര്‍ത്തിക്കാതിരിക്കാന്‍ ശക്തമായ നിയമം തന്നെ കേരളത്തില്‍ കൊണ്ടുവരണമെന്നും സുമതി പറഞ്ഞു.
എറണാകുളത്തെ ജോലിസ്ഥലത്തുനിന്ന് ഷൊര്‍ണൂരിലെ വീട്ടിലേക്കുള്ള ട്രെയിന്‍ യാത്രയ്ക്കിടെ വള്ളത്തോള്‍ നഗര്‍ സ്‌റ്റേഷനരികിലാണു പീഡനശ്രമത്തിനിടെ ട്രെയിനില്‍നിന്ന് വീണ് സൗമ്യ മരിച്ചത്. തലയ്ക്കും ദേഹത്തും ഗുരുതരപരിക്കുകളോടെ ദിവസങ്ങള്‍ തള്ളിനീക്കിയ സൗമ്യയുടെ ജീവനായി കേരളം ഒന്നടങ്കം കാത്തിരുന്നെങ്കിലും വ്യര്‍ഥമായി.
ഇത്തരം സംഭവങ്ങള്‍ കേരളത്തില്‍ ആവര്‍ത്തിക്കാതിരിക്കാന്‍ നടപടികള്‍ സ്വീകരിക്കണമെന്നുള്ള ആവശ്യങ്ങള്‍ ഫലം കാണുന്നില്ലെന്നു തന്നെയാണു ജിഷയുടെ കൊലപാതകം തെളിയിക്കുന്നത്. ജിഷയെ ക്രൂരമായി കൊലപ്പെടുത്തിയ പ്രതികളെ തൂക്കിക്കൊല്ലണമെന്നുള്‍പ്പെടെയുള്ള അഭിപ്രായമാണു കേരളത്തിലെ ജനങ്ങള്‍ പ്രകടിപ്പിക്കുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha