ഇറാന്‍ കപ്പല്‍ ഐറിസ് ലവാന്റെ ചിത്രം പകര്‍ത്താന്‍ ശ്രമിച്ച മാദ്ധ്യമപ്രവര്‍ത്തകര്‍ അറസ്റ്റില്‍. കൊച്ചിയിലെ ദക്ഷിണ നാവികത്താവളത്തില്‍ അഭയംതേടിയതാണ് ഐറിസ് ലവാന്‍. അമേരിക്കയുടെ ആക്രമണ സാദ്ധ്യതയെത്തുടര്‍ന്നാണ് കപ്പല്‍ കൊച്ചിയിലെത്തിയത്. റിപ്പബ്‌ളിക് ടിവിയുടെ റിപ്പോര്‍ട്ടറും ക്യാമറാമാനും ഇവര്‍ സഞ്ചരിച്ച ബോട്ടിന്റെ െ്രെഡവറുമാണ് അറസ്റ്റിലായത്.

മാദ്ധ്യമസംഘം നിരോധിത മേഖലയില്‍ പ്രവേശിച്ച് ദൃശ്യം പകര്‍ത്തുന്നത് സിഐഎസ്എഫ് ഉദ്യോഗസ്ഥരുടെ ശ്രദ്ധയില്‍പ്പെടുകയായിരുന്നു. തുടര്‍ന്ന് ഉദ്യോഗസ്ഥര്‍ ഇവരെ കസ്റ്റഡിയിലെടുക്കുകയും പൊലീസിന് കൈമാറുകയും ചെയ്തു. മാദ്ധ്യമപ്രവര്‍ത്തകരുടെ ക്യാമറയും കസ്റ്റഡിയിലെടുത്തിട്ടുണ്ട്. മറൈന്‍ െ്രെഡവില്‍ നിന്ന് ബോട്ട് വാടകയ്ക്ക് എടുത്താണ് ഇവര്‍ കപ്പലിന്റെ ദൃശ്യം പകര്‍ത്താനെത്തിയത്. മൂന്നുപേരെയും കോടതിയില്‍ ഹാജരാക്കുമെന്ന് പൊലീസ് അറിയിച്ചു.

ഇറാന്റെ അഭ്യര്‍ത്ഥന സ്വീകരിച്ചാണ് ബുധനാഴ്ച കപ്പലിന് അഭയം നല്‍കിയത്. 183 നാവികര്‍ക്ക് ഇന്ത്യന്‍ നാവികസേനയുടെ സംരക്ഷണത്തില്‍ താമസസൗകര്യം ഒരുക്കിയിട്ടുണ്ട്. വിശാഖപട്ടണത്തെത്തി മടങ്ങിയ ഐറിസ് ഡെനയെ ശ്രീലങ്കയ്ക്ക് സമീപംവച്ച് അമേരിക്കല്‍ സേന ടോര്‍പ്പിടോ ഉപയോഗിച്ച് കഴിഞ്ഞദിവസം തകര്‍ത്തിരുന്നു. ഇന്ത്യന്‍ മഹാസമുദ്ര മേഖലയിലായിരുന്ന ഐറിസ് ലവാനെയും ആക്രമിക്കുമെന്ന ആശങ്കയിലാണ് ഇറാന്‍ ഇന്ത്യയോട് ഫെബ്രുവരി 28ന് അഭയം അഭ്യര്‍ത്ഥിച്ചതെന്ന് നാവികസേന വക്താവ് പറഞ്ഞു. കപ്പലിന് പ്രത്യേകസുരക്ഷ ഒരുക്കിയിട്ടുണ്ട്.