ചങ്ങനാശ്ശേരി എസ് ബി കോളേജിന് സമീപം ഒരു കുടുംബത്തിലെ മൂന്ന് പേരെ വീടിനുള്ളിൽ മരിച്ച നിലയിൽ കണ്ടെത്തിയിരിക്കുന്നു. കരിങ്കട വീട്ടിൽ സാജു ആന്റണി, ഭാര്യ അനു, മകൻ സബിൻ എന്നിവരെയാണ് രണ്ട് മുറികളിലായി തൂങ്ങിമരിച്ച നിലയിൽ കണ്ടെത്തിയത്. ഇന്ന് രാവിലെ ഫോണിൽ വിളിച്ചിട്ട് കിട്ടാത്തതിനെ തുടർന്ന് ബന്ധുക്കൾ നേരിട്ടെത്തി അന്വേഷിച്ചപ്പോഴാണ് ഇവരെ ജീവനറ്റ നിലയിൽ കണ്ടെത്തുന്നത്. വീട്ടിൽ നിന്ന് പോലീസ് ആത്മഹത്യാക്കുറിപ്പ് കണ്ടെടുത്തിട്ടുണ്ട്. മൂന്ന് ലക്ഷത്തോളം രൂപയുടെ കടബാധ്യത ഉണ്ടെന്നാണ് മാതാപിതാക്കൾ എഴുതിയ കുറിപ്പിലുള്ളത്. അച്ഛനും അമ്മയും ജീവനൊടുക്കിയത് അറിഞ്ഞ് മകനും പിന്നാലെ കടുംകൈ ചെയ്തതാകാമെന്നാണ് പോലീസിന്റെ പ്രാഥമിക നിഗമനം. മരണപ്പെട്ട സബിന്റെ ഭാര്യ വിദേശത്താണ്. സംഭവത്തിൽ ചങ്ങനാശ്ശേരി പോലീസ് അസ്വാഭാവിക മരണത്തിന് കേസ് രജിസ്റ്റർ ചെയ്ത് വിപുലമായ അന്വേഷണം ആരംഭിച്ചിട്ടുണ്ട്.