പതിനാറുകാരന്റെ കുത്തേറ്റ് ചികിത്സയിലായിരുന്ന മുത്തച്ഛൻ മരിച്ചു. കാവശ്ശേരി വാഴക്കച്ചിറ സുലൈമാൻ ആണ് മരിച്ചത്. ഇക്കഴിഞ്ഞ 19ന് കാവശ്ശേരിയിലെ വീട്ടിൽ വൈകുന്നേരം ഏഴുമണിയോടെയാണ് സംഭവം. സുലൈമാന്റെ മകളുടെ മകനായ 16കാരൻ 10 വയസുള്ള സഹോദരിയെ കത്തികൊണ്ട് കുത്താൻ ശ്രമിച്ചത് തടഞ്ഞപ്പോഴാണ് സുലൈമാന് കുത്തേറ്റത്.

സുലൈമാന്റെ നെഞ്ചിനും കഴുത്തിനും വയറിനുമാണ് കുത്തേറ്റത്. രണ്ടുപേരെയും ആലത്തൂരിലെ സ്വകാര്യ ആശുപത്രിയിൽ പ്രവേശിപ്പിച്ചുവെങ്കിലും സുലൈമാന്റെ നില ഗുരുതരമായതിനെ തുടർന്ന് തൃശൂർ മെഡിക്കൽ കോളജിലേക്ക് മാറ്റിയിരിക്കുകയാണ്.

ചികിത്സ തുടരുന്നതിനിടയാണ് ഇന്നലെ രാത്രി മരണത്തിന് കീഴടങ്ങിയത്. സഹോദരി അപകടനില തരണം ചെയ്തു. സംഭവശേഷം ഒളിവിൽ പോയ പ്രതിയെ പിന്നീട് പൊലീസ് പിടികൂടി ജുവനൈൽ ഹോമിലാക്കി. പ്രതിയുടെ മറ്റു പശ്ചാത്തലങ്ങളെ കുറിച്ച് പൊലീസ് അന്വേഷിച്ചുവരുന്നു.