ഇങ്ങനെയുമുണ്ടോ മോഷണം. അരുവിക്കര വട്ടക്കുളത്തെ എം.കെ പവര്‍ ടൂള്‍സ് എന്ന കടയില്‍ നിന്നാണ് രണ്ടു ദിവസം മുമ്പ് മോഷണം നടന്നത്. ബൈക്കിലെത്തിയ രണ്ടുപേര്‍ ചേര്‍ന്ന് കടയുടെ മുന്നിലിരുന്ന ഏണി എടുത്തു കൊണ്ടുപോകുകയായിരുന്നു. ഏണി കാണാതായതോടെ കടയുടമ ഉടന്‍ തന്നെ പരിസരത്തെ സി.സി.ടി.വി ദൃശ്യങ്ങള്‍ പരിശോധിച്ചു. പരിശോധനയില്‍ മോഷണം വ്യക്തമായതോടെ കടയുടമ അരുവിക്കര പോലീസില്‍ പരാതി നല്‍കുകയായിരുന്നു.പോലീസ് അന്വേഷണം പുരോഗമിക്കുന്നതിനിടയിലാണ് തികച്ചും അപ്രതീക്ഷിതമായ സംഭവങ്ങള്‍ കടയ്ക്ക് മുന്നില്‍ നടന്നത്.

ഇന്നലെ വൈകിട്ടോടെ വീണ്ടുമെത്തിയ മോഷ്ടാക്കള്‍ മോഷ്ടിച്ച ഏണി കടയ്ക്ക് മുന്നില്‍ തിരിച്ചുവെച്ച് വേഗത്തില്‍ സ്ഥലം വിട്ടു. ഏണി തിരിച്ചുവെച്ചത് കണ്ട് കടയുടമ പരിശോധിച്ചപ്പോഴാണ് അതിന് സമീപം ഒരു കുറിപ്പും ശ്രദ്ധയില്‍പ്പെട്ടത്. മോഷണം നടത്തിയവര്‍ എഴുതിവെച്ച കത്തായിരുന്നു അത്.മോഷണത്തിന് കാരണം വ്യക്തമാക്കുന്നതായിരുന്നു കുറിപ്പിലെ സന്ദേശം. 'അണ്ണാ സോറി, ഒരു സാധനം കുഴിയില്‍ വീണു, അത് എടുക്കാന്‍ കൊണ്ടുപോയതാണ്, പറ്റിപ്പോയി, മിനിഞ്ഞാന്ന് കൊണ്ടു വയ്ക്കണം എന്ന് കരുതിയതാണ്' എന്ന് കത്തില്‍ എഴുതിയിരുന്നു.

പെട്ടെന്ന് മറ്റൊരു സ്ഥലത്തോട്ട് പോകേണ്ടി വന്നതിനാലാണ് ഏണി തിരികെ എത്തിക്കാന്‍ വൈകിയതെന്നും കത്തില്‍ വ്യക്തമാക്കുന്നുണ്ട്.ദൃശ്യങ്ങള്‍ പ്രചരിപ്പിക്കരുതെന്ന അപേക്ഷയും കത്തിലുണ്ടായിരുന്നു. 'വൈറല്‍ ആക്കരുത്, സോറി, ജീവിതം ചെകുത്താനും കടലിനുമിടയിലാണ്, സൂയിസൈഡിന്റെ വക്കിലാണ്, സോറി സോറി സോറി' എന്ന് പറഞ്ഞാണ് കുറിപ്പ് അവസാനിക്കുന്നത്. കത്ത് വായിച്ചതോടെ കടയുടമയും നാട്ടുകാരും ഒരുപോലെ അമ്പരന്നു. ജീവിത പ്രതിസന്ധികളാണ് മോഷ്ടാക്കളെ ഇത്തരം ഒരു പ്രവര്‍ത്തിയിലേക്ക് നയിച്ചതെന്നാണ് കത്ത് സൂചിപ്പിക്കുന്നത്.സംഭവത്തില്‍ പോലീസ് നിലവില്‍ കേസെടുത്തിട്ടില്ല.

ഏണി സുരക്ഷിതമായി തിരികെ ലഭിച്ചതിനാല്‍ ഇനി തുടര്‍നടപടികളുമായി മുന്നോട്ട് പോകേണ്ടതില്ലെന്നാണ് കടയുടമയുടെ തീരുമാനം. അപേക്ഷാക്കുറിപ്പ് കൂടി പരിഗണിച്ചാണ് പരാതിയുമായി മുന്നോട്ട് പോകുന്നില്ലെന്ന് കടയുടമ വ്യക്തമാക്കിയത്. എന്തായാലും മോഷ്ടാക്കളുടെ ഈ കുറിപ്പും ഏണി തിരികെ നല്‍കിയ സംഭവവും പ്രദേശത്ത് വലിയ ചര്‍ച്ചയായിട്ടുണ്ട്.