പ്രതീക്ഷയോടെ കർഷകർ. ചരിത്രത്തിലാദ്യമായി റബ്ബർ വില 300 രൂപയിലെത്തി. ഇന്നലെ ആർ.എസ്. എസ്-4 ഗ്രേഡ് റബ്ബറിന് കിലോ 300 രൂപ എന്ന നിരക്കിലാണ് കോട്ടയത്ത് വ്യാപാരം നടന്നത്.

അതേസമയം, റബ്ബർ ബോർഡ് വില വെള്ളിയാഴ്ച കിലോക്ക് 298 രൂപയാണ്. പശ്ചിമേഷ്യൻ സംഘർഷത്തിൻറെ പശ്ചാത്തലത്തിൽ ചരക്കു ഗതാഗതത്തിൽ പ്രതിസന്ധിയും ഇറക്കുമതി ചെലവ് വർധിച്ചതും ആഭ്യന്തരവിപണിക്ക് അനുകൂലമായിട്ടുണ്ട്.

ഉൽപ്പാദനം കുറഞ്ഞതും ആവശ്യകത വർദ്ധിച്ചതും ആഭ്യന്തര വിപണിയിൽ റബ്ബർ വില ഉയരാനായി കാരണമായിട്ടുണ്ട്. രാജ്യത്ത് 5.22 ലക്ഷം മെട്രിക് ടൺ റബ്ബറിൻറെ കുറവുണ്ടെന്നാണ് റബ്ബർ ബോർഡിൻറെ കണക്ക്. 1.76 ലക്ഷം ഹെക്ടറിൽ ടാപ്പിങ് നടക്കുന്നില്ല. റബ്ബറിനു വില കുറഞ്ഞ് നഷ്ടത്തിലായതോടെ കാര്യമായ പരിചരണം ലഭിക്കാതെ വന്നതും കാലാവസ്ഥാ വ്യതിയാനവുമെല്ലാം ഉൽപ്പാദനത്തെ ഏറെ ബാധിച്ചിരിക്കുകയാണ്.