വധശിക്ഷ നടപ്പാക്കാനുള്ള ശ്രമം പരാജയപ്പെട്ടതിനെത്തുടര്‍ന്ന് കടുത്ത ശാരീരികവും മാനസികവുമായ വേദന അനുഭവിക്കുകയാണെന്ന് കൊലക്കേസ് പ്രതി ക്രിസ്റ്റ പൈക്ക്. വധശിക്ഷയ്ക്ക് വിധേയയാക്കാനുള്ള ശ്രമം നടന്ന സെപ്റ്റംബര്‍ 30നുശേഷം ആദ്യമായാണ് പൈക്ക് പ്രതികരിക്കുന്നത്. കൈകള്‍ക്കും തൊണ്ടയ്ക്കും ഇപ്പോഴും വേദനയുണ്ടെന്നും സംസാരിക്കാന്‍ പോലും ബുദ്ധിമുട്ടുണ്ടെന്നും അവര്‍ പറഞ്ഞു.

അമേരിക്കയിലെ ടെന്നസി സംസ്ഥാനത്താണ് സംഭവം. പെന്റോബാര്‍ബിറ്റല്‍ എന്ന മരുന്ന് കുത്തിവെച്ച് വധശിക്ഷ നടപ്പാക്കാനായിരുന്നു അധികൃതരുടെ ശ്രമം. രണ്ട് ഡോസ് മരുന്ന് നല്‍കിയിട്ടും പൈക്ക് മരിച്ചില്ല. പകരം അവര്‍ പിന്നീട് ബോധം വീണ്ടെടുത്തു. ഇതോടെ വധശിക്ഷാ നടപടി പരാജയപ്പെട്ടു.'അന്നുമുതല്‍ ഒരു നിമിഷം പോലും വേദനയില്ലാതെ കഴിഞ്ഞിട്ടില്ല. ശരീരത്തിന് മുഴുവന്‍ വേദനയുണ്ട്. കൈകള്‍ക്കും കൈപ്പത്തികള്‍ക്കും തൊണ്ടയ്ക്കും വേദനിക്കുന്നു. ഇപ്പോഴും സംസാരിക്കാന്‍ പ്രയാസമാണ്. ശാരീരിക വേദനയ്‌ക്കൊപ്പം മനസ്സിലും വലിയ വിഷമമുണ്ട്,' പൈക്ക് പറഞ്ഞു.

ആ രാത്രിക്കപ്പുറം ഒരു ജീവിതമുണ്ടാകുമെന്ന് താന്‍ കരുതിയിരുന്നില്ലെന്നും സംഭവത്തിലെ വീഴ്ചകള്‍ തന്നെ ഏറെ വേദനിപ്പിക്കുന്നുണ്ടെന്നും അവര്‍ പറഞ്ഞു. കൊലപ്പെടുത്തിയ പെണ്‍കുട്ടിയുടെ കുടുംബം അനുഭവിച്ച വേദനയെക്കുറിച്ചും നഷ്ടത്തെക്കുറിച്ചും ഇപ്പോഴും ചിന്തിക്കുന്നുണ്ടെന്നും പൈക്ക് കൂട്ടിച്ചേര്‍ത്തു.വധശിക്ഷ നടപ്പാക്കാനുള്ള ശ്രമത്തിനിടെ കൈകള്‍ പൊട്ടിത്തെറിക്കുന്നതുപോലെ വേദനിക്കുന്നുവെന്ന് പൈക്ക് നിലവിളിച്ചതായാണ് റിപ്പോര്‍ട്ട്.

പിന്നീട് ആശുപത്രിയിലെത്തിച്ചപ്പോള്‍ ഇരുകൈകളും വീര്‍ത്തിരുന്നു. കൈകളില്‍ പൊള്ളലും കുമിളകളും രൂപപ്പെടുകയും ചെയ്തു.വധശിക്ഷയ്ക്കായി മരുന്ന് നല്‍കിയ ട്യൂബുകളിലെ തകരാറാണ് പരുക്കിന് കാരണമെന്നാണ് പൈക്കിന്റെ അഭിഭാഷകരുടെ ആരോപണം. മരുന്ന് രക്തത്തിലേക്ക് എത്തുന്നതിന് പകരം കൈകളിലെ കോശങ്ങളിലേക്ക് ഒഴുകിയതാകാമെന്നാണ് അവരുടെ സംശയം. ബ്ലീച്ചോ ഡ്രാനോ പോലുള്ള ശക്തമായ രാസവസ്തുക്കള്‍ ശരീരത്തില്‍ പതിച്ചാലുണ്ടാകുന്ന പരുക്കിന് സമാനമാണ് കൈകളിലുണ്ടായതെന്നും അഭിഭാഷകര്‍ പറഞ്ഞു.

ഈ മാസം ആശുപത്രിയില്‍നിന്ന് തിരിച്ചെത്തിയ പൈക്കിനെ വീണ്ടും വനിതാ ജയിലിലേക്ക് മാറ്റി. ജയിലിലെ മെഡിക്കല്‍ വാര്‍ഡില്‍ മറ്റുള്ളവരില്‍ നിന്ന് ഒറ്റപ്പെട്ടാണ് ഇപ്പോള്‍ കഴിയുന്നത്. ഈ ഏകാന്തതയും തനിക്ക് വലിയ വേദനയുണ്ടാക്കുന്നുണ്ടെന്ന് അവര്‍ പറഞ്ഞു.