തിരുവനന്തപുരം പാങ്ങപ്പാറയിൽ പ്ലസ് വൺ വിദ്യാർഥിയായ 17 വയസ്സുകാരൻ അഭിരാമിനെ ക്രൂരമായി കൊലപ്പെടുത്തിയ സംഭവത്തിൽ ഓരോ ദിവസവും പുറത്തുവരുന്നത് ഞെട്ടിക്കുന്ന വിവരങ്ങൾ. അഭിരാമിന്റെ മരണം ഉറപ്പാക്കിയതിന് പിന്നാലെ മൃതദേഹം മറ്റൊരിടത്തേക്ക് മാറ്റി തെളിവുകൾ നശിപ്പിക്കാനായിരുന്നു പ്രതികളുടെ പദ്ധതിയെന്നാണ് ഇപ്പോൾ പുറത്തുവരുന്ന വിവരം. ഇതിനായി ശ്രീകാര്യത്തെ ആക്രിക്കടയിൽനിന്ന് 30 രൂപ നൽകി പ്ലാസ്റ്റിക് ചാക്ക് വാങ്ങിയെന്നും എന്നാൽ കനത്ത മഴ പദ്ധതികളെല്ലാം തകിടംമറിച്ചെന്നുമാണ് കേസിലെ പ്രതിയായ ഐശ്വര്യയുടെ മൊഴിയിൽനിന്ന് ലഭിക്കുന്ന സൂചനകൾ.

അഭിരാമിന്റെ കൊലപാതകവുമായി ബന്ധപ്പെട്ട് രണ്ടാം പ്രതി ഉമറിന്റെ കാമുകിയായ ഐശ്വര്യയിൽനിന്ന് പൊലീസിന് ലഭിച്ച വിവരങ്ങളാണ് അന്വേഷണത്തിൽ നിർണായകമാകുന്നത്. അഭിരാം മരിച്ചുവെന്ന് ഉറപ്പാക്കിയശേഷം ഒന്നാം പ്രതിയായ 17 വയസ്സുകാരൻ ശ്രീകാര്യത്തെ ആക്രിക്കടയിലെത്തി പ്ലാസ്റ്റിക് ചാക്ക് വാങ്ങുകയായിരുന്നു. മൃതദേഹം ചാക്കിലാക്കി വാഹനത്തിൽ മറ്റൊരിടത്തേക്ക് കൊണ്ടുപോയി ഉപേക്ഷിക്കാനായിരുന്നു പദ്ധതിയെന്നാണ് പൊലീസ് കണ്ടെത്തൽ.

എന്നാൽ രാത്രിയിൽ പ്രദേശത്ത് ശക്തമായ മഴ പെയ്തതോടെ ഇവരുടെ നീക്കം തടസ്സപ്പെട്ടു. ഇതോടെ മൃതദേഹം കൊലപാതകം നടന്ന കാടുപിടിച്ച വിജനമായ സ്ഥലത്തുതന്നെ ഉപേക്ഷിച്ച് പ്രതികൾ മടങ്ങുകയായിരുന്നു. മൃതദേഹം ചാക്കിനുള്ളിലാക്കിയ നിലയിലാണ് പിന്നീട് കണ്ടെത്തിയത്. മൃതദേഹം മറ്റൊരിടത്തേക്ക് മാറ്റാനുള്ള ശ്രമം നടന്നുവെന്ന പുതിയ വിവരം കേസിന്റെ ഗൗരവം വർധിപ്പിക്കുകയാണ്.

ഇതിനിടെ കൊലപാതകത്തിന്റെ ആസൂത്രണത്തിൽ രണ്ടാം പ്രതിയായ 22 വയസ്സുകാരൻ ഉമർ മുഫ്താറിനുള്ള പങ്കിനെക്കുറിച്ചും കൂടുതൽ വിവരങ്ങൾ പുറത്തുവരുന്നുണ്ട്. കാപ്പ നിയമപ്രകാരം നടപടി നേരിട്ടിട്ടുള്ള ഉമറാണ് കൊലപാതകത്തിന്റെ മുഴുവൻ ആസൂത്രണത്തിനും പിന്നിലെന്നാണ് പൊലീസിന്റെ പ്രാഥമിക നിഗമനം. നേരത്തെയും പതിനേഴുകാരനൊപ്പം ഉൾപ്പെട്ട മോഷണക്കേസുകളിൽ ഉമറായിരുന്നു സൂത്രധാരനെന്നും പൊലീസ് പറയുന്നു.

പ്രായപൂർത്തിയാകാത്ത കുട്ടികളെ ഉപയോഗിച്ച് മോഷണം നടത്തുന്നതടക്കമുള്ള പ്രവർത്തനങ്ങളിൽ ഉമറിന് പങ്കുണ്ടോയെന്നും അന്വേഷണസംഘം പരിശോധിക്കുന്നുണ്ട്. ആശയവിനിമയത്തിന് ഇൻസ്റ്റഗ്രാം ഉപയോഗിക്കണമെന്ന് പതിനേഴുകാരനെ ഉപദേശിച്ചതും ഉമറാണെന്നാണ് പൊലീസ് പറയുന്നത്.

അഭിരാമിന്റെ കൊലപാതകത്തിലേക്ക് നയിച്ച സംഭവങ്ങളുടെ തുടക്കം ഒരു പ്രണയപ്രശ്നവുമായി ബന്ധപ്പെട്ട തർക്കമാണെന്നാണ് അന്വേഷണത്തിൽ നേരത്തേ പുറത്തുവന്ന വിവരം. പതിനേഴുകാരന്റെ മുൻകാമുകി മറ്റൊരു യുവാവുമായി അടുപ്പത്തിലായതാണ് വൈരാഗ്യത്തിന് കാരണമായതെന്നാണ് പൊലീസ് സംശയിക്കുന്നത്. ഈ യുവാവിനെ ലക്ഷ്യമിട്ടായിരുന്നു കൊലപാതകപദ്ധതിയെന്നും എന്നാൽ ഇയാളെ നേരിട്ട് എത്തിക്കാൻ കഴിയാതെ വന്നപ്പോൾ അഭിരാമിനെ ഉപയോഗിച്ച് വലയിലാക്കുകയായിരുന്നുവെന്നുമാണ് അന്വേഷണത്തിൽ പുറത്തുവന്നിട്ടുള്ള വിവരം.

മൂന്നാം പ്രതിയായ അനന്തയുടെ ഇൻസ്റ്റഗ്രാം അക്കൗണ്ട് ഉപയോഗിച്ചാണ് അഭിരാമിനെ ബന്ധപ്പെടുകയും വിജനമായ സ്ഥലത്തേക്ക് വിളിച്ചുവരുത്തുകയും ചെയ്തതെന്നാണ് പൊലീസിന്റെ കണ്ടെത്തൽ. അനന്തയുടെ ഫോണിൽനിന്ന് സന്ദേശമയച്ചാണ് അഭിരാമിനെ സ്ഥലത്തെത്തിച്ചത്. അവിടെ എത്തിയ അഭിരാമിന് അപകടം മനസ്സിലായതോടെ രക്ഷപ്പെടാൻ ശ്രമിച്ചുവെന്നാണ് അന്വേഷണത്തിൽ ലഭിച്ച വിവരം. തുടർന്ന് പ്രതികൾ ആക്രമിക്കുകയും ബെൽറ്റും കൈകളും ഉപയോഗിച്ച് ശ്വാസംമുട്ടിച്ച് കൊലപ്പെടുത്തുകയുമായിരുന്നുവെന്നാണ് പൊലീസ് സംശയിക്കുന്നത്.

കൊലപാതകത്തിന് പിന്നാലെ അഭിരാമിന്റെ സുഹൃത്തിനെ വിളിച്ചുവരുത്താനും ശ്രമം നടന്നതായും നേരത്തേ പുറത്തുവന്നിരുന്നു. എന്നാൽ സുഹൃത്ത് സ്ഥലത്തെത്തിയില്ല. അഭിരാമിന്റെ മരണം സംഭവിച്ചശേഷം മൃതദേഹം മാറ്റാനുള്ള ശ്രമവും ഇതിന്റെ ഭാഗമായാണ് പൊലീസ് പരിശോധിക്കുന്നത്.

അതേസമയം, അന്വേഷണസംഘത്തെ ഏറ്റവും കൂടുതൽ കുഴയ്ക്കുന്നത് കേസിലെ നിർണായക മൊബൈൽ ഫോണുകൾ കണ്ടെത്താനാകാത്തതാണ്. അഭിരാമിന്റെയും ഒന്നാം പ്രതിയായ പതിനേഴുകാരന്റെയും മൂന്നാം പ്രതിയായ അനന്തയുടെയും ഫോണുകളാണ് ഇതുവരെ കണ്ടെത്താനാകാത്തത്. കൊലപാതകത്തിനുശേഷം ഫോണുകൾ സമീപത്തെ തോട്ടിൽ ഉപേക്ഷിച്ചെന്ന മൊഴിയുടെ അടിസ്ഥാനത്തിൽ തിരച്ചിൽ നടത്തിയെങ്കിലും ഫലം കണ്ടില്ല. ഫോണുകൾ നശിപ്പിച്ചിട്ടുണ്ടാകാമെന്നാണ് പൊലീസിന്റെ സംശയം.

ഇതിനു പുറമേ പ്രതികളുടെ ഇൻസ്റ്റഗ്രാം അക്കൗണ്ടുകളിൽനിന്ന് ചിത്രങ്ങളും വീഡിയോകളും നീക്കം ചെയ്തതായും പൊലീസ് കണ്ടെത്തിയിട്ടുണ്ട്. ഡിലീറ്റ് ചെയ്ത ചാറ്റുകൾ സൈബർ സഹായത്തോടെ വീണ്ടെടുക്കാനുള്ള ശ്രമം തുടരുകയാണ്. കൊലപാതകത്തിനുശേഷം ഉമർ ഒരു സുഹൃത്തിനെ വിളിച്ച് ഇവിടെനിന്ന് മാറിനിൽക്കാനും അതിന് സഹായിക്കാനും ആവശ്യപ്പെട്ടതായും പൊലീസിന് വിവരം ലഭിച്ചിട്ടുണ്ട്. ഈ സുഹൃത്തിന്റെ പങ്കും പരിശോധിക്കുന്നുണ്ട്.

സംഭവസമയത്ത് വീട്ടിലായിരുന്നുവെന്ന് വരുത്തിത്തീർക്കാൻ ഉമർ സ്വന്തം ഫോൺ വീട്ടിൽ ഓണാക്കി വച്ചതായും അന്വേഷണസംഘം സംശയിക്കുന്നു. പ്രതികൾ സംഭവസ്ഥലത്തെത്തിയതിന്റെ സിസിടിവി ദൃശ്യങ്ങളും ഇതുവരെ ലഭിച്ചിട്ടില്ല. ക്യാമറകളില്ലാത്ത ഉൾപ്രദേശങ്ങളിലൂടെയാണ് ഇവർ സ്ഥലത്തെത്തിയതെന്നാണ് വിലയിരുത്തൽ.

ഇതിനിടെ, കേസിലെ ഒന്നാം പ്രതിയായ പതിനേഴുകാരന്റെ നിയമനടപടികളിലും നിർണായക ഘട്ടം വരികയാണ്. ഗുരുതരമായ കുറ്റകൃത്യത്തിൽ ഏർപ്പെട്ട പ്രായപൂർത്തിയാകാത്ത കുട്ടിയെ മുതിർന്നയാളായി വിചാരണ ചെയ്യണോ എന്ന കാര്യത്തിൽ പ്രിലിമിനറി മെന്റൽ അസെസ്മെന്റ് റിപ്പോർട്ട് നിർണായകമാകും. ജുവനൈൽ ജസ്റ്റിസ് ബോർഡിന്റെ നടപടിക്രമങ്ങൾ അനുസരിച്ചായിരിക്കും ഇക്കാര്യത്തിൽ തീരുമാനമുണ്ടാകുക.

നാല് പ്രതികൾ അറസ്റ്റിലായിട്ടുണ്ടെന്നാണ് ഏറ്റവും പുതിയ റിപ്പോർട്ടിലുള്ള വിവരം. എന്നാൽ പ്രതികളുടെ മൊഴികളിൽ വൈരുധ്യങ്ങളുണ്ടെന്നും പൊലീസ് വ്യക്തമാക്കുന്നു. അതുകൊണ്ടുതന്നെ കൊലപാതകത്തിന്റെ കൃത്യമായ ആസൂത്രണം, ഓരോരുത്തരുടെയും പങ്ക്, തെളിവുകൾ നശിപ്പിക്കാനുള്ള ശ്രമം എന്നിവയെല്ലാം അന്വേഷണവിധേയമാണ്.

ഒരു കൗമാരക്കാരന്റെ ജീവനെടുത്ത ഈ ക്രൂരകൃത്യത്തിൽ ഇനിയും പുറത്തുവരാനുള്ളത് നിരവധി ചോദ്യങ്ങൾ. അഭിരാമിന്റെ ഫോണുകൾ എവിടെ? കൊലപാതകത്തിന് പിന്നിലെ യഥാർഥ ആസൂത്രകൻ ആരാണ്? പ്രതികൾ തമ്മിലുള്ള ബന്ധത്തിന്റെ കൂടുതൽ വിവരങ്ങൾ എന്തൊക്കെയാണ്? ഡിജിറ്റൽ തെളിവുകൾ വീണ്ടെടുക്കുന്നതോടെ ഈ ചോദ്യങ്ങൾക്കുള്ള ഉത്തരങ്ങൾ ലഭിക്കുമെന്ന പ്രതീക്ഷയിലാണ് അന്വേഷണസംഘം.